នៅព្រឹកថ្ងៃទី២០ ខែកញ្ញា ឆ្នាំ២០២៤នេះ លោកជំទាវ ស៊ិន ណម សមាជិកក្រុមប្រឹក្សាខេត្តសៀមរាប, លោក នាក់ ណេរ៉ុន និង លោក ឌី រ៉ាដូ អភិបាលរងខេត្ត រួមនិងឯកឧត្តម លោកជំទាវសមាជិកក្រុមប្រឹក្សាខេត្ត លោកលោកស្រីថ្នាក់ដឹកនាំមន្ទីរអង្គភាព មន្ត្រីរាជការក្នុងខេត្ត បានបន្តនាំយកទេយ្យទាន ទេយ្យវត្ថុ និងបច្ច័យ ចូលរួមកាន់បិណ្ឌវេនទី៣ នៃពិធីបុណ្យភ្ជុំបិណ្ឌ នៅវត្តពុទ្ធស្ថាននគររាជធម្មមេត្តា និង វត្តព្រះឥន្ទកោសីយ៍ (ហៅវត្តលើ) ក្រុងសៀមរាប។
ព្រះគ្រូ ច័ន្ទ សុវណ្ណ ព្រះគ្រូចៅអធិការវត្តព្រះឥន្ទកោសីយ៍ មានសង្ឃដីកាថា ពិធីបុណ្យភ្ជុំបិណ្ឌ កាន់បិណ្ឌ គឺជាពិធីបុណ្យប្រពៃណីជាតិបែបព្រះពុទ្ធសាសនាដ៏ធំមួយនៅកម្ពុជា ហើយក៏ជាទំនៀមទម្លាប់មួយ ដែលប្រជាជាតិខ្មែរនិយមធ្វើតៗគ្នាតាំងពីបុរាណកាលមក។ ពិធីបុណ្យនេះមានរយៈពេល១៥ថ្ងៃ គិតចាប់ពីថ្ងៃ១រោច ដល់ថ្ងៃ១៥រោច ខែភទ្របទ។ ក្នុងនោះសូមឱ្យប្រជាពលរដ្ឋខ្មែរ ដែលជាពុទ្ធសាសនិកជន គប្បីនាំគ្នាថែរក្សាពិធីបុណ្យ ដែលជាមរតកកេរ្តិ៍ដំណែល វប្បធម៌របស់ដូនតាខ្មែរឱ្យបានស្ថិតស្ថេរ គង់វង្ស តាមរយៈការបណ្ដុះស្មារតីដល់យុវជន និងកូនចៅជំនាន់ក្រោយ ឱ្យចេះធ្វើបុណ្យទាននៅក្នុងរដូវបុណ្យភ្ជុំបិណ្ឌ រួមនឹងពិធីបុណ្យផ្សេងៗទៀត នៅតាមទីវត្តអារាមនានាទូទាំងប្រទេស ដើម្បីធ្វើយ៉ាងណាអភិរក្សពិធីបុណ្យប្រពៃណីជាតិដ៏ល្អផូរផង់របស់ខ្មែរយើង កុំឱ្យបាត់បង់។
សូមជម្រាបថា ក្នុងឱកាសនោះ ឯកឧត្តម លោកជំទាវ លោកលោកស្រីជាថ្នាក់ដឹកនាំ រួមនឹងមន្ត្រីរាជការ ប្រជាពុទ្ធបរិស័ទ បានធ្វើការវេរប្រគេននូវទ័យ្យទាន ជាគ្រឿងឧបភោគបរិភោគ វេរប្រគេនដល់ព្រះសង្ឃដែលគង់ចាំព្រះវស្សាអស់កាលត្រីមាស ក្នុងវត្តទាំង២ គឺវត្តពុទ្ធស្ថាននគររាជធម្មមេត្តា និង វត្តព្រះឥន្ទកោសីយ៍ ដោយក្នុងមួយវត្តៗមាន៖ គ្រឿងឧបភោគបរិភោគចំនួន១០មុខ និងបច្ច័យ ២លានរៀល និងចែកជូនដល់សីលវ័ន្ត សីលវន្តី ចំនួន៥០នាក់ ដោយក្នុងម្នាក់ទទួលបាន ក្រណាត់ស១ដុំ និងបច្ច័យ ១ម៉ឺនរៀល៕
អត្ថបទ និងរូបភាព៖ លោក ទ្រា ពន្លឺ, មុី សុខារិទ្ធ
កែសម្រួល៖ លោក អ៊ុន ណារាជ្យ
