ថ្លែងក្នុងសិក្ខាសាលាផ្សព្វផ្សាយស្តីពីសារៈប្រយោជន៍នៃការចុះបញ្ជីវិស្វករនៅគណៈវិស្វករកម្ពុជា នៅខេត្តសៀមរាប នាព្រឹកថ្ងៃទី២០ ខែកញ្ញា ឆ្នាំ២០២៤ ឯកឧត្តម សុខុម រិទ្ធីវុធ អគ្គលេខាធិកាគណៈវិស្វករកម្ពុជា នៃក្រសួងការងារ មានប្រសាសន៍ថា ការចុះបញ្ជីវិស្វករ ពិតជាមានសារៈសំខាន់ និងមានមានសារៈប្រយោជន៍ណាស់សម្រាប់អ្នកប្រកបវិជ្ជាជីវៈជាវិស្វករ ព្រោះវាបានការពារវិជ្ជាជីវៈយើងទៅតាមផ្លូវច្បាប់ និងបានរួមចំណែករៀបចំវិជ្ជាជីវៈវិស្វកម្មកម្ពុជាឱ្យកាន់តែល្អប្រសើរ ដើម្បីការពារកិត្តិយស និងសេចក្តីថ្លៃថ្នូររបស់វិស្វករ។
ឯកឧត្តម សុខុម រិទ្ធីវុធ មានប្រសាសន៍ទៀតថា ការចុះបញ្ជីនេះដែរ ក៏ជាការពង្រឹងសមត្ថភាពបច្ចេកទេសគ្រប់ជំនាញ និងជួយពង្រីកធនធានមនុស្សប្រកបដោយគុណវុឌ្ឍ ស្របទៅនឹងការវិវត្តនៃបច្ចេកវិទ្យានាពេលបច្ចុប្បន្ន និងអនាគត ថែមទាំងផ្តល់ឱកាសការងារជាអតិបរមាដល់វិស្វករជាតិក្នុងវិស័យឧស្សាហកម្មវិស្វកម្ម ព្រមទាំងការពង្រឹង ពង្រីកកិច្ចសហប្រតិបត្តិការរវាងវិស្វកម្មជាតិ និងវិស្វកម្មអន្តរជាតិ ពិសេសនៅពេលដែលយើងបានចុះបញ្ជីដោយត្រឹមត្រូវ គឺនឹងមានការទទួលស្គាល់គុណវុឌ្ឍិវិស្វករជាតិ ក្នុងការទទួលបានគោរមងារជាវិស្វករអាជីពជាតិ និងអន្តរជាតិផងដែរ។
ឯកឧត្តមបន្ថែមថា ការចុះបញ្ជីវិស្វករជាតិនេះ នឹងបង្កើតឱ្យមាននូវស្តង់ដារជាក់លាក់មួយសម្រាប់វិជ្ជាជីវៈ និងគណនេយ្យភាពរបស់វិស្វករ ដោយស្តង់ដារនេះដែរ ត្រូវធានាបានថាវិស្វករដែលបានចុះបញ្ជី ត្រូវមានសម្បទា និងគុណវុឌ្ឍិសមស្រប ដូចជា៖បានបញ្ចប់ការសិក្សាលើជំនាញដោយជោគជ័យ មានបទពិសោធវិជ្ជាជីវៈគ្រប់គ្រាន់តាមមុខជំនាញ និងប្រកាន់ខ្ជាប់ក្រមសីលធម៌វិជ្ជាជីវៈរបស់ខ្លួន ព្រោះថាការចុះបញ្ជីវិស្វករ គឺបានលើកស្ទួយ និងធានាគុណភាពក្នុងការប្រកបវិជ្ជាជីវៈ តាមរយៈលក្ខខណ្ឌកំណត់នៃការចុះបញ្ជី ដែលតម្រូវឱ្យវិស្វករមានបទពិសោធគ្រប់គ្រាន់ស្របតាមស្តង់ដារ និងការបណ្តុះបណ្តាលបង្កើនសមត្ថភាពប្រតិបត្តិជំនាញវិជ្ជាជីវៈ និងទទួលបានទំនុកចិត្តពីសាធារណៈជន។
លោក ហែន ពុទ្ធី អភិបាលរងខេត្តសៀមរាប បានបង្ហាញការគាំទ្រចំពោះយន្តការនេះ ដែលជាការជួយពង្រឹងបាននូវការយល់ដឹងបន្ថែម ក្នុងការត្រៀមលក្ខណៈចុះបញ្ជីវិស្វករឱ្យសមស្របទៅតាមច្បាប់់។ លោកក៏បានណែនាំដល់អ្នកចូលរួមទាំងអស់ដែលកំពុងសិក្សាទៅលើទំនាញវិស្វករនេះ សូមខិតខំប្រេងប្រែងយកចិត្តទុកដាក់នៅក្នុងការសិក្សា ព្រោះជំនាញវិស្វករនេះ ជាទ្រព្យសកម្ម ដែលផ្តល់ប្រយោជន៍ដ៏ធំធេងសម្រាប់សង្គមជា រួមចំណែកបង្កើតទ្រព្យសម្បត្តិជូនជាតិ ដោយបង្កបង្កើត កែច្នៃហេដ្ឋារចនាសម្ព័ន្ធ ការកសាងរោងចក្រ កសាងផ្លូវថ្នល់ ស្ពាន និងផ្សេងៗទៀត ដែលជាតម្រូវការរបស់ប្រជាជនទូទៅ ក្នុងការចូលរួមជួយអភិវឌ្ឍន៍ជាតិ៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
