នៅព្រឹកថ្ងៃទី២៣ ខែកញ្ញា ឆ្នាំ២០២៤ គណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប ហៅកាត់ថា គ.ក.ស.ក.ខ បានបើកកិច្ចប្រជុំសាមញ្ញលើកទី៣ ប្រចាំខែកញ្ញា និង ប្រចាំត្រីមាសទី៣ ឆ្នាំ២០២៤ ក្រោមអធិបតីភាព លោកជំទាវ ស៊ិន ណម ប្រធានគណៈកម្មាធិការពិគ្រោះយោបល់កិច្ចការស្រ្តី និងកុមារខេត្តសៀមរាប និង លោកស្រី ម៉មនី រង្សី អភិបាលរងខេត្ត ដោយមានការចូលរួមពីអ្នកពាក់ព័ន្ធជាច្រើនរូប។
លោកជំទាវ ស៊ិន ណម មានប្រសាសន៍ថា ដើម្បីធ្វើការពិនិត្យលើការងាររបស់ គ.ក.ស.ក.ខ សម្រាប់ខែកញ្ញា ក្នុងការងារលើកកម្ពស់ការយល់ដឹង និងការប្រើប្រាស់បទដ្ឋានគតិយុត្តជាតិ និងអន្តរជាតិដែលមានស្រាប់ សំដៅការពារកុមារពីការរំលោភបំពាន និងកេងប្រវ័ញ្ចផ្លូវភេទដែលអនុវត្តក្នុងពេលកន្លងមក។ ក្នុងនោះលោកជំទាវ ក៏បានធ្វើការណែនាំដល់ក្រុមការងារទាំងអស់ ត្រូវបន្តយកចិត្តទុកដាក់អប់រំផ្សព្វផ្សាយអំពីច្បាប់ទាក់ទងទៅនឹងស្ត្រី និងកុមារ ការលើកកម្ពស់ សីលធម៌សង្គមពង្រឹងភាពអង់អាចដល់ស្ត្រី ជួយអន្តរាគមន៍ជនរងគ្រោះ និងងាយរងគ្រោះ ដោយអំពើហិង្សាក្នុងគ្រួសារ និងជំរុញការអប់រំកុមារតូចៗដែលគ្រប់អាយុចូលរៀនបានទៅចូលរៀន ព្រមទាំងលើកកម្ពស់សុខមាលភាពមាតា និងទារក មុនពេលសម្រាល និងក្រោយពេលសម្រាលឱ្យបានល្អប្រសើរ។
លោកជំទាវ ក៏បានជំរុញឱ្យ គ.ក.ស.ក.ឃុំសង្កាត់ ត្រូវតាមដានករណីបណ្ណក្រីក្រជាមួយមន្ទីរផែនការខេត្ត និងចុះពិនិត្យតាមដានកុមារដែលបានបោះបង់ការសិក្សាឱ្យបានចូលរៀនទៀងទាត់វិញ និងសូមឱ្យក្រុងស្រុកត្រូវបន្តការខិតខំអនុវត្តទៅតាមសមត្ថកិច្ចជំនាញរបស់ខ្លួន។ ម៉្យាងទៀតវិស័យដែលពាក់ព័ន្ធ ត្រូវបន្តកិច្ចសហការជាមួយអជ្ញាធរមានសមត្ថកិច្ច និង ឃុំសង្កាត់ ក្រុងស្រុកខេត្ត ក្នុងការអនុវត្តឱ្យទទួលបានលទ្ធផលល្អ។
លោកជំទាវប្រធានគណៈកម្មាធិការ បញ្ជាក់ថា រាល់បទពិសោធ និងលទ្ធផលដែលក្រុមការងារទទួលបាន គឺសម្រាប់ឱ្យក្រុមការងារថ្នាក់ស្រុកយកទៅអនុវត្ត និងបន្តយកចិត្តទុកដាក់អប់រំ ផ្សព្វផ្សាយអំពីច្បាប់ទាក់ទងទៅនឹងស្ត្រី និងកុមារ និងបង្កើននូវកិច្ចទំនាក់ទំនងល្អនៅក្នុងមូលដ្ឋាន និងសូមឱ្យអង្គការដៃគូ ក្នុងការចូលរួមជាសំខាន់លើការងារប្រមូលក្រុមជនអនាថា ដែលបង្កភាពអាណាធិបតេយ្យក្នុងក្រុង ធ្វើឱ្យប៉ះពាល់ដល់សណ្តាប់ធ្នាប់សាធារណៈ និងភ្ញៀវទេសចរជាដើម៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
