អគារសិក្សា មួយខ្នងចំនួន ០២បន្ទប់ រួមជាមួយសម្ភារសិក្សា និង ឧបករណ៍លេងកម្សាន្ត ដែលជាជំនួយលើក៣ ឧបត្ថម្ភដោយព្រះតេជគុណ ជិន ហ្សង់ ព្រះចៅអធិការវត្ត យ៉ន់ហ្វាសារ និងប្រជាជន នៃសាធារណរដ្ឋកូរ៉េ ត្រូវបានសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី២៤ ខែកញ្ញានេះ ដោយ លោក ពៅ ប៊ុនធឿន អភិបាលស្រុកអង្គរធំ សប្បុរសជនម្ចាស់ជំនួយ និងលោកគ្រូ អ្នកគ្រូយ៉ាងច្រើនកុះករ។
ក្នុងឱកាសដ៏សប្បាយរីករាយនេះ ព្រះតេជគុណ ជិន ហ្សង់ មានសង្ឃដីកាថា តម្រូវការ និងភាពចាំបាច់ របស់កុមារ គឺចំណេះដឹង។ ស្នាមញញឹមរបស់កុមារនៅសាលាបឋមសិក្សាលៀបចាស់នេះ បានបញ្ជាក់ថាការផ្ដល់ជូនរបស់ព្រះអង្គគឺជាត្រឹមត្រូវ និងមានតម្លៃចំពោះពួកគាត់យ៉ាងពិតប្រាកដ។
ក្នុងពិធីសម្ពោធនេះ ព្រះតេជគុណ សង់ ក្វាន់ ប្រធានអង្គការឡូទុសវើល បានបង្ហាញនូវព្រះទ័យសប្បាយរីករាយ ជាមួយសិស្សានុសិស្ស និងលោកគ្រូ អ្នកគ្រូនា ដោយព្រះតេជគុណ ជិន ហ្សង់ បាននឹងសន្យាផ្ដល់អគារបណ្ណាល័យបន្ថែមទៀត ដល់សាលាបឋមសិក្សាមួយនេះពេលខាងមុខ។
ក្នុងនាមអាជ្ញាធរស្រុក លោក ពៅ ប៊ុនធឿន បានអរព្រះគុណ និងអរគុណ ដល់ព្រះតេជគុណទាំង ២អង្គ ក្រុមការងារអង្គការឡូទុសវើល និងសប្បុរសជនកូរ៉េទាំងអស់ ដែលបានគិតគូរពីការអប់រំនៅជនបទ និងលើកទឹកចិត្តដល់ក្មួយៗឱ្យខិតខំសិក្សារៀនសូត្រ ថ្វីត្បិតតែសាលាបឋមសិក្សាលៀបចាស់នេះ នៅមានការខ្វះខាតច្រើន ជាមួយនោះរាជរដ្ឋាភិបាលកម្ពុជា នៅតែបន្តលើកកម្ពស់វិស័យអប់រំ ជាវិស័យអាទិភាព។
គួររំលឹកថា ជំនួយសប្បុរសធម៌ផ្ដល់ដោយប្រជាជន សាធារណរដ្ឋកូរ៉េ តាមរយៈអង្គការឡូទុសវើល (LOTUS WORLD) ជូនដល់សាលាបឋមសិក្សា លៀបចាស់នេះ
លើកទី១ នៅខែតុលា ឆ្នាំ២០២២ និងលើកទី២ នៅខែកុម្ភៈ ឆ្នាំ២០២៣។
អត្ថបទ និងរូបភាព៖ លោក ហេង វន្នី
កែសម្រួល៖ មន្ទីរព័ត៌មានខេត្តសៀមរាប