គ្រួសារប្រជាពលរដ្ឋមានជីវភាពខ្វះខាតមួយគ្រួសារ រស់នៅក្រុងរុនតាឯកតេជោសែន ខេត្តសៀមរាប ទទួលបានផ្ទះមួយខ្នង ពីអង្គការក្តីសង្ឃឹមថ្មីនៅកម្ពុជា (New Hope Cambodia) ដែលពិធីប្រគល់នេះធ្វើឡើងនៅថ្ងៃទី២៤ ខែកញ្ញា ឆ្នាំ២០២៤នេះ ក្រោមវត្តមាន លោក អុឹង សុភ័ណ អភិបាលក្រុងរុនតាឯកតេជោសែន រួមនឹងវត្តមានសប្បុរសជន អាជ្ញាធរមូលដ្ឋាន និងប្រជាពលរដ្ឋជាច្រើនរូបទៀត។
លោក សូត្រ សួរ ប្រធានក្រុមប្រឹក្សាភិបាលអង្គការក្ដីសង្ឃឹមថ្មីនៅកម្ពុជា បានបញ្ជាក់ថា ដោយមើលឃើញពីការលំបាក និងដើម្បីជួយសម្រួលក្នុងជីវភាពរស់នៅរបស់ក្រុមគ្រួសារពលរដ្ឋខាងលើ តាមរយៈការសម្របសម្រួលរបស់អង្គការក្តីសង្ឃឹមថ្មីនៅកម្ពុជា អង្គការដៃគូ និងសប្បុរសជននានា ក៏បានសហការសាងសង់ផ្ទះមួយខ្នង ដើម្បីជាអំណោយជូនដល់ពួកគាត់ សង់ឡើងតាមរចនាបទផ្ទះខ្មែរ មានទទឹង ៥ម៉ែត្រ បណ្តោយ ៩ម៉ែត្រ កម្ពស់ ៤ម៉ែត្រកន្លះ ធ្វើអំពីឈើ ប្រក់ស័ង្កសី និងមានបំពាក់អុីសូឡង់ការពារកម្តៅថ្ងៃ មានបន្ទប់ទឹកមួយ ព្រមទាំងមានបំពាក់បន្ថែមនូវប្រព័ន្ធទឹក និងប្រព័ន្ធភ្លើងផង។ ក្រៅពីនេះ អង្គការក៏បានផ្តល់នូវសម្ភារៈផ្ទះបាយ សម្ភារៈក្នុងបន្ទប់គេង និងគ្រឿងបរិក្ខារមួយចំនួនទៀត ដែលចំណាយថវិកាសរុប ១០.០០០ដុល្លារសហរដ្ឋអាមេរិក។
លោក សូត្រ សួរ បន្តថា ផ្ទះខាងលើជាគម្រោងទី៤០ របស់អង្គការក្តីសង្ឃឹមថ្មីនៅកម្ពុជា ដែលក្នុងនោះយើងមានគម្រោងសាងសង់ផ្ទះចន្លោះពី២ ទៅ៥ខ្នង ក្នុងមួយឆ្នាំជូនប្រជាពលរដ្ឋក្រីក្រ ក្នុងខេត្តសៀមរាប។ ចំពោះផ្ទះនាពេលនេះដែរ គឺប្រគល់ជូនគ្រួសារ លោក សុខ ហេង អាយុ៣០ឆ្នាំ និងប្រពន្ធឈ្មោះ សៀម ដែលមានកូន ២នាក់ កំពុងសិក្សានៅបឋមសិក្សា ហើយជាពលរដ្ឋដែលបានស្ម័គ្រចិត្តយល់ព្រមផ្លាស់ទីលំនៅចេញតំបន់អង្គរ មករស់នៅក្នុងក្រុងរុនតាឯកតេជោសែន នេះ។
ក្នុងនាមអាជ្ញាធរមូលដ្ឋាន លោក អុឹង សុភ័ណ អភិបាលក្រុង បានអបអរសាទរជាមួយគ្រួសារ លោក សុខ ហេង ដែលបានទទួលផ្ទះ១ខ្នងនេះ ដែលនឹងជួយសម្រាលបន្ទុកមួយចំណែកធំក្នុងគ្រួសារ ផ្តល់នូវទីជម្រកដ៏សមរម្យមួយសម្រាប់ក្មេងៗ និងផ្តល់នូវភាពសុខដុមរមនាក្នុងជីវភាពរស់នៅ។ សមិទ្ធផលថ្ងៃនេះ គឺជាការបង្ហាញពីការចូលរួមរបស់អង្គការជាដៃគូ ជាមួយនឹងរាជរដ្ឋាភិបាលកម្ពុជា ក្នុងការស្តារ និងអភិវឌ្ឍប្រទេសជាតិលើគ្រប់វិស័យ ព្រមទាំងការយកចិត្តទុកដាក់ចំពោះប្រជាពលរដ្ឋដែលស្ម័គ្រចិត្តផ្លាស់ប្តូរទីលំនៅពីតំបន់រមណីយដ្ឋានអង្គរ មកកាន់ក្រុងរុនតាឯកតេជោសែននេះ។
លោកក៏បានថ្លែងអំណរគុណ ដល់ប្រមុខដឹកនាំកម្ពុជា ដែលបានអភិវឌ្ឍហេដ្ឋារចនាសម្ព័ន្ធ ផ្លូវថ្នល់ ប្រព័ន្ធទឹកស្អាត ផ្សារ សាលារៀន មន្ទីរពេទ្យជាដើម ជួយដល់ទីក្រុងរុនតាឯកតេជោសែន ដែលជាទីក្រុងទី២ របស់ខេត្តសៀមរាប។ ដូច្នេះដើម្បីតបទៅនឹងការយកចិត្តទុកដាក់របស់រាជរដ្ឋាភិបាលក៏ដូចជាអង្គការដៃគូនានាក្នុងការអភិវឌ្ឍតំបន់អភិវឌ្ឍរុនតាឯកតេជោសែន ឱ្យក្លាយជាទីក្រុងមានសោភ័ណភាពស្រស់ត្រកាល និងប្រជាពលរដ្ឋមានជីវភាពធូរធារ ចាំបាច់បងប្អូនប្រជាពលរដ្ឋត្រូវរួមចំណែកអភិវឌ្ឍ និងកសាងសង្គមគ្រួសាររបស់ខ្លួនឱ្យមានការរីកចម្រើន តាមរយៈការបង្កបង្កើនផលដាំដំណាំ ចិញ្ចឹមសត្វ ជំរុញឱ្យកូនចៅសិក្សារៀនសូត្រ ស្វែងរកការសិក្សាវិជ្ជាជីវៈជំនាញ ពោលគឺប្រឹងប្រែងឱ្យអស់ពីកម្លាំងកាយចិត្តទាំងអស់គ្នាទើបសេដ្ឋកិច្ច និងជីវភាពគ្រួសារនីមួយៗបានរីកចម្រើន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
