ការសិក្សាជំនាញវិស្វកម្មអគ្គិសនី មានជំនាញជាច្រើនដែលត្រូវសិក្សា ដូចជាមូលដ្ឋានគ្រឹះអេឡិចត្រូនិច បណ្តាញនៅក្នុងអាគារ ដែនអាកាស និងគំនូសបច្ចេកទេស។ល។ ហើយនៅវិទ្យាស្ថានពហុបច្ចេកទេសភូមិភាគតេជោសែនសៀមរាប សិក្ខាកាមដែលបញ្ចប់វគ្គសិក្សាជំនាញនេះ ភាពច្រើនសិក្ខាកាមជាស្ត្រី មានភាពងាយស្រួលរកការងារធ្វើជាងបុរស នាពេលបច្ចុប្បន្ននេះ។
នេះបើតាមការលើកឡើងពី លោក ស៊ិន សៀងលី អនុប្រធានការិយាល័យស្រាវជ្រាវមុខរបរ និងទំនាក់ទំនងឧស្សាហកម្ម នៃវិទ្យាស្ថានពហុបច្ចេកទេសភូមិភាគតេជោសែនសៀមរាប ក្នុងកម្មវិធីសន្ទនាមតិ របស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី២០ ខែកញ្ញា ឆ្នាំ២០២៤នេះ។
ព័ត៌មានជាតិ ថ្មីៗ
លោក ស៊ិន សៀងលី បានឱ្យដឹងថា សិក្ខាកាមជាស្ត្រីដែលចាប់យកជំនាញវិស្វកម្មអគ្គិសនី ភាគច្រើនពួកគាត់បារម្ភខ្លាចនៅពេលរៀនចប់ពួកគាត់មិនងាយរកការងារធ្វើបាន ឬត្រូវឡើងតបណ្តាញខ្សែភ្លើងតាមបង្គោលធំជាដើម។ ប៉ុន្តែក្នុងន័យនេះ លោក ស៊ិន សៀងលី បានបញ្ជាក់ថា ការសិក្សាជំនាញអគ្គិសនី មិនប្រាកដថា ត្រូវតែធ្វើជាជាងតបណ្ដាញអគ្គិសនីទេ តែសិក្ខាកាមមានការងារពាក់ព័ន្ធនឹងអគ្គិសនីជាច្រើនទៀតដែលអាចធ្វើបាន។
បើតាមកញ្ញា នី ស្រីនីត និស្សិតជំនាញថ្នាក់សញ្ញាបត្រជាន់ខ្ពស់បច្ចេកទេស ជំនាញអគ្គិសនី នៅវិទ្យាស្ថានពហុបច្ចេកទេសភូមិភាគតេជោសែនសៀមរាប បានបង្ហាញថា ដោយមើលឃើញពីទីផ្សារនាពេលបច្ចុប្បន្ននេះ ផ្នែកវិស្វកម្មអគ្គិសនីកំពុងតែត្រូវការជាចាំបាច់ ក៏ដូចជាកញ្ញាមានឆន្ទះខ្ពស់ក្នុងការស្រឡាញ់នូវមុខជំនាញមួយនេះ ទើបកញ្ញាសម្រេចចិត្តក្នុងការចាប់យកជំនាញមួយនេះដើម្បីសិក្សាដោយមិនខ្វល់ថាខ្លួនជាស្រ្តីនោះឡើយ។ កញ្ញាបានលើកទឹកចិត្តទៅកាន់មនុស្សស្រីទាំងអស់ ត្រូវមានការយល់ដឹងឱ្យបានច្រើន និងកុំគិតថាការងារវិស្វកម្មអគ្គិសនីបានតែបុរសទេដែលអាចធ្វើបាន៕
អត្ថបទ និងរូបភាព៖ លោកស្រី ភី រចនា
កែសម្រួល៖ លោក អ៊ុន ណារាជ្យ
