ក្នុងពិធីជួបសំណេះសំណាល ដើម្បីចែករំលែក ផ្តល់នូវពុទ្ធិ ចំណេះដឹង ចំណេះធ្វើ និងលើកទឹកចិត្ដដល់ប្អូនៗសិស្សានុសិស្សថ្នាក់ទី១២ មកពីវិទ្យាល័យចំនួន៧ ក្នុងក្នុងស្រុកជីក្រែង និងស្រុកសូទ្រនិគម ខេត្ដសៀមរាប នៅរសៀលថ្ងៃទី១៩ ខែកញ្ញា ឆ្នាំ២០២៤ ឯកឧត្ដម ផៃ សុខខេង នាយករងខុទ្ធការល័យ ឯកឧត្ដម នាយឧត្ដមសេនីយ៍ ទៀ សីហា ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ បានជំរុញ និងលើកទឹកចិត្តដល់ប្អូនៗសិស្សានុសិស្សថ្នាក់ទី១២ ទាំងអស់ ត្រូវរក្សាសុខភាពឱ្យបានល្អ និងត្រូវយកចិត្ដទុកដាក់ខិតខំរៀនសូត្រ ដើម្បីទទួលបានជោគជ័យនៃការប្រឡងសញ្ញាបត្រមធ្យមសិក្សាទុតិយភូមិ នាខែតុលា ខាងមុខនេះ។
ឯកឧត្ដម ផៃ សុខខេង បានបញ្ជាក់ថា ការចូលរួមចំណែកពីគ្រប់អ្នកពាក់ព័ន្ធ រួមមានការខិតខំប្រឹងប្រែងពីមន្ត្រីអប់រំគ្រប់លំដាប់ថ្នាក់ សហគមន៍ សប្បុរសជនជាតិ អន្តរជាតិ អង្គការដៃគូអភិវឌ្ឍនានា ការគាំទ្រពីអាជ្ញាធរដែនដី ព្រមទាំងក្រុមការងាររាជរដ្ឋាភិបាល បានជំរុញឱ្យវិស័យអប់រំ ក្នុងខេត្តសៀមរាបមានការរីកចម្រើនគួរឱ្យកត់សម្គាល់។ ចំពោះលទ្ធផលដ៏ជោគជ័យនៃការប្រឡងសញ្ញាបត្រមធ្យមសិក្សាទុតិយភូមិនាពេលកន្លងមក បានឆ្លុះបញ្ចាំងឱ្យឃើញពីស្មារតីទទួលខុសត្រូវ សាមគ្គីភាព កិច្ចសហការល្អប្រសើរ ក្នុងដំណើរឆ្ពោះទៅកាន់គោលដៅអភិវឌ្ឍដោយចីរភាព គាំទ្រឱ្យសម្រេចបាននូវចក្ខុវិស័យរបស់រាជរដ្ឋាភិបាល ឆ្នាំ២០៣០ និងឆ្នាំ២០៥០។
លោក អ៊ាម ជា អនុប្រធានការិយាល័យអប់រំយុវជន និងកីឡា ស្រុកជីក្រែង បង្ហាញថា គ្រប់ស្ថាប័នអ្នកពាក់ព័ន្ធដែលចែករំលែកចំណេះដឹងបន្ថែមនេះ ជាការលើកទឹកចិត្ដដល់ពួកគាត់ឱ្យមានការខិតខំប្រឹងប្រែងមើលមេរៀនថែមទៀត ដើម្បីសម្រេចបានជោគវាសនាល្អរបស់ពួកគាត់នាពេលប្រឡងបាក់ឌុបខាងមុខ។លោកថាមានតែចំណេះវិជ្ជាទេ ដែលធ្វើឱ្យប្រទេសជាតិនិងសង្គមគ្រួសារមានការរីកចម្រើន៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
