នាយកដ្ឋានគ្រប់គ្រងធនធានដីកសិកម្ម នៃអគ្គនាយកដ្ឋានកសិកម្ម ក្រសួងកសិកម្មរុក្ខាប្រមាញ់ និងនេសាទ សហការជាមួយមន្ទីរកសិកម្មខេត្ត និងរដ្ឋបាលខេត្តសៀមរាប បានរៀបចំវគ្គបណ្តុះបណ្តាលអប់រំសមត្ថភាពវិជ្ជាជីវៈស្តីពីបទដ្ឋានគតិយុត្ត នីតិវិធី និងវិធានការបច្ចេកទេសសម្រាប់ ការធ្វើអាជីវកម្មថ្នាំកសិកម្ម និងជីកសិកម្ម ជូនដល់អាជីវករលក់ដុំ និងរាយសម្ភារៈកសិកម្ម ចំនួន១១៧នាក់មកពី១២ខេត្ត-ក្រុង ដែលវគ្គនេះមានរយៈពេល០៣ថ្ងៃ ពីថ្ងៃទី១៦ ដល់ថ្ងៃទី១៨ ខែកញ្ញា ឆ្នាំ២០២៤ រៀបចំឡើងនៅស្ថានីយ៍ពិសោធន៍កសិកម្មទឹកវិល ។
លោក កន កុម្ភៈ អនុប្រធានគ្រប់គ្រងធនធានដីកសិកម្ម មានប្រសសន៍ថា តាមរយៈវគ្គបណ្តុះបណ្តាលនេះ មានគោលបំណងលើកកម្ពស់ការយល់ដឹងជាសាធារណៈ លើការអនុវត្តគ្រប់សកម្មភាពពាក់ព័ន្ធ ជាពិសេស ផ្តល់ឱ្យអ្នកលក់ដុំនិងរាយថ្នាំកសិកម្ម និងជីកសិកម្ម បានយល់ដឹងនូវលិខិតបទដ្ឋានគតិយុត្ត និងវិធានបច្ចេកទេសសម្រាប់ការគ្រប់គ្រងជី និងថ្នាំកសិកម្ម នូវកាតព្វកិច្ចរបស់ខ្លួនជាអ្នកលក់ ចូលរួមលើកកម្ពស់ និងទប់ស្កាត់បទល្មើសគ្រប់រូបភាពដែលកើតមានឡើងពាក់ព័ន្ឋ នឹងជី និងថ្នាំកសិកម្ម កាត់បន្ថយហានិភ័យដែលបង្កដោយការប្រើប្រាស់ថ្នាំកសិកម្មជាផលប្រយោជន៍របស់កសិករ និងប្រជាពលរដ្ឋទូទាំងប្រទេស ដោយធានាបាននូវសន្តិសុខស្បៀង សុខភាពសាធារណៈ និងនិរន្តរភាពបរិស្ថាន។
លោកមានជំនឿថា៖ អាជីករដែលបានចូលរួមវគ្គបណ្តុះបណ្តាល មុននឹងលក់សម្ភារៈកសិកម្ម ទៅដល់ដៃកសិករប្រើប្រាស់ ត្រូវជួយពន្យល់ណែនាំពីបច្ចេកទេសនៃការប្រើប្រាស់ សំដៅធ្វើអោយមានសុវត្តិភាពស្បៀង សុខភាពសាធារណៈ បរិស្ថានល្អ និងសុខដុមរមនា ដែលរួមចំណែកកាត់បន្ថយភាពក្រីក្រ កសាងសង្គមជាតិប្រកបដោយនិរន្តរភាព។
ថ្លែងបិទវគ្គបណ្តុះបណ្តាលលោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់ និងនេសាទ មានប្រសាសន៍ថា៖ ខណៈពេលដែលសេដ្ឋកិច្ចយើង មានការរីកចំរើនលើគ្រប់វិស័យនោះ សង្កេតឃើញថា ថ្នាំ និងជីកសិកម្មគ្រប់ប្រភេទ វត្ថុធាតុដើម និងសមាសធាតុ ផ្សេងទៀតនៃថ្នាំកសិកម្ម និងជីកសិកម្មគ្រប់ប្រភេទ ដែលប្រើប្រាស់ជាធាតុចូលនៅក្នុងផលិតកម្ម កសិកម្ម ត្រូវបានលាយផ្សំ ផលិត ចរាចរ និងប្រើប្រាស់យ៉ាងទូលំទូលាយ។
លោកបន្តថា៖ វគ្គបណ្តុះបណ្តាលនេះជាចលករជួយជំរុញសមត្ថភាពវិជ្ជាជីវៈសំរាប់អាជីវករលក់ដុំ និងរាយសម្ភារៈកសិកម្មទូទាំងខេត្ត ដោយត្រូវធានាសម្ភារៈសិកម្មក្នុងមូលដ្ឋានប្រកបដោយសុវត្ថិភាពសម្រាប់កសិករយកទៅប្រើប្រាស់ ស្របតាមបទដ្ឋានគតិយុត្ត និងច្បាប់ជាធរមាន។
លោកប្រធានមន្ទីរក៏បានជំរុញ ដល់មន្ត្រីបច្ចេកទេសបន្តអនុវត្តកម្មវិធីផ្សព្វផ្សាយ នូវសេចក្តីអំពាវនាវរបស់ក្រសួងស្តីពី “ ការប្រើប្រាស់ និងការធ្វើអាជីវកម្ម ជីកសិកម្ម ” ឲ្យស្របតាមរដូវកាល ដែលមានសកម្មភាពប្រើប្រាស់ និងចរាចរលក់ដូរជីដើម្បីបញ្រ្ជាបដល់កសិករ និងមានការប្រុងប្រយ័ត្នចំពោះការទិញយកមកប្រើប្រាស់នូវជីកសិកម្មក្លែងគុណភាព ថ្នាំកសិកម្មគ្រោះថ្នាក់ ឬសម្ភារៈកសិកម្មមានប្រភពល្មើសច្បាប់ដែលបង្កឲ្យគ្រោះថ្នាក់ ដល់សុខភាពសារធារណៈ និងបរិស្ថាន។
សូមបញ្ជាក់ផងដែរ៖ វគ្គបណ្តុះបណ្តាលនេះក៏ការប្រឡងវាស់ស្ទង់សមត្ថភាព តាមរយៈគូសលើសំណួរចំលើយ ហើយគណៈកម្មការក្រសួងកសិកម្មនឹងវាយតម្លៃចេញវិញ្ញាបនបត្របញ្ជាក់នៅពេលក្រោយទៅអាជីវករលក់រាយ បោះដុំសម្ភារៈកសិកម្មដែលគូស និងឆ្លើយបានត្រឹមត្រូវ។ នៅក្នុងរបាយការណ៍របស់មន្ទីរកសិកម្មខេត្ត ទូទាំងខេត្តសៀមរាបមានដេប៉ូលក់ដុំនិងលក់រាយថ្នាំនិងជីកសិកម្មចំនួន៤៩២ដេប៉ូ៕
អត្ថបទ និងរូបភាព ៖ យូ វង្ស
កែសម្រួល ៖ ហាំ ម៉េងហួត
