នៅព្រឹកថ្ងៃទី១៩ ខែកញ្ញា ឆ្នាំ២០២៤នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប និង ឯកឧត្តម ប្រាក់ សោភ័ណ អភិបាលខេត្ត បានដឹកនាំថ្នាក់ដឹកនាំខេត្ត មន្ទីរអង្គភាព មន្ត្រីរាជការក្នុងខេត្ត រួមនឹងប្រជាពុទ្ធបរិស័ទជិតឆ្ងាយ បាននាំយកទេយ្យទាន ទេយ្យវត្ថុ រួមនឹងបច្ច័យ ចូលរួមកាន់បិណ្ឌវេនទី២ នៃពិធីបុណ្យភ្ជុំបិណ្ឌ នៅវត្តរាជបូណ៌ និង វត្តទេពពោធិវង្ស ហៅវត្តថ្មី ក្រុងសៀមរាប។
សម្តេចព្រះព្រហ្មរតនមុនី ពិន សែម សិរីសុវណ្ណោ គណៈមហានិកាយ ឧត្តមទីប្រឹក្សាគណៈសង្ឃនាយក និងជាសមាជិកថេរសភាព្រះពុទ្ធសាសនានៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ បានមានសង្ឃដីកាថា ពិធីបុណ្យភ្ជុំបិណ្ឌ កាន់បិណ្ឌ គឺជាពិធីបុណ្យប្រពៃណីជាតិបែបព្រះពុទ្ធសាសនាដ៏ធំមួយនៅកម្ពុជា ហើយក៏ជាទំនៀមទម្លាប់មួយ ដែលប្រជាជាតិខ្មែរនិយមធ្វើតៗគ្នាតាំងពីបុរាណកាលមក។ ពិធីបុណ្យនេះមានរយៈពេល១៥ថ្ងៃ គិតចាប់ពីថ្ងៃ១រោច ដល់ថ្ងៃ១៥រោច ខែភទ្របទ។
ក្នុងឱកាសនោះដែរ សម្តេចព្រះព្រហ្មរតនមុនី ពិន សែម បានជំរុញឱ្យប្រជាពលរដ្ឋខ្មែរ ដែលជាពុទ្ធសាសនិកជន គប្បីនាំគ្នាថែរក្សាពិធីបុណ្យ ដែលជាមរតកកេរ្តិ៍ដំណែល វប្បធម៌របស់ដូនតាខ្មែរឱ្យបានស្ថិតស្ថេរ គង់វង្ស តាមរយៈការបណ្ដុះស្មារតីដល់យុវជន និងកូនចៅជំនាន់ក្រោយ ឱ្យចេះធ្វើបុណ្យទាននៅក្នុងរដូវបុណ្យភ្ជុំបិណ្ឌ រួមនឹងពិធីបុណ្យផ្សេងៗទៀត នៅតាមទីវត្តអារាមនានាទូទាំងប្រទេស ដើម្បីធ្វើយ៉ាងណាអភិរក្សពិធីបុណ្យប្រពៃណីជាតិដ៏ល្អផូរផង់របស់ខ្មែរយើង កុំឱ្យបាត់បង់។
សូមជម្រាបថា ក្នុងឱកាសនោះ ឯកឧត្តម លោកជំទាវជាថ្នាក់ដឹកនាំ រួមនឹងមន្ត្រីរាជការ ប្រជាពុទ្ធបរិស័ទ បានធ្វើការវេរប្រគេននូវទ័យ្យទាន ជាគ្រឿងឧបភោគបរិភោគ វេរប្រគេនដល់ព្រះសង្ឃដែលគង់ចាំព្រះវស្សាអស់កាលត្រីមាស ក្នុងវត្តទាំង២ គឺវត្តរាជបូណ៍ និង វត្តទេពពោធិវង្ស ដោយក្នុងមួយវត្តៗមាន៖ គ្រឿងឧបភោគបរិភោគចំនួន១០មុខ និងបច្ច័យ ២លានរៀល និងចែកជូនដល់សីលវ័ន្ត សីលវន្តី ចំនួន៥០នាក់ ដោយក្នុងម្នាក់ទទួលបាន ក្រណាត់ស១ដុំ និងបច្ច័យ ១ម៉ឺនរៀល៕
អត្ថបទ និងរូបភាព៖ លោក ទ្រា ពន្លឺ , មុី សុខារិទ្ធិ
កែសម្រួល៖ លោក អ៊ុន ណារាជ្យ
