នាព្រឹកថ្ងៃទី១៨ ខែកញ្ញា ដែលត្រូវនឹងបិណ្ឌវេនទី១ ឯកឧត្ដម សែម សុវណ្ណនី ប្រធានក្រុមការងាររាជរដ្ឋាភិបាលចុះមូលដ្ឋាន ក្រុងរុនតាឯកតេជោសែន បានដឹកនាំក្រុមការងារ រួមជាមួយរដ្ឋបាលក្រុង បានចូលរួមចាប់មគ្គផល និងឧទ្ទិសកុសលផលបុណ្យ ក្នុងពិធីកាន់បិណ្ឌវេនទី១ នៅវត្តជ័យមុនីរង្សី ហៅវត្តរុន ស្ថិតនៅភូមិរុន សង្កាត់រុនតាឯក។
មានប្រសាសន៍សំណេះសំណាលនាឱកាសនោះ ឯកឧត្ដម សែម សុវណ្ណនី បាននាំយកការផ្ដាំផ្ញើការសួរសុខទុក និងយកយកចិត្តទុកដាក់ពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្ដម ទៀ សីហា ឧបនាយករដ្ឋមន្ត្រី ប្រគេន និងជូនដល់ព្រះសង្ឃ និងប្រជាពលរដ្ឋរស់នៅក្រុងរុនតាឯកតេជោសែនទាំងអស់។ ជាមួយនោះ ឯកឧត្ដម បានបង្ហាញនូវទឹកចិត្តសប្បាយរីករាយ ជាមួយបងប្អូនប្រជាពលរដ្ឋក្នុងមូលដ្ឋាន ដែលមានសទ្ធាជ្រះថ្លា និងបានប្រកាន់ខ្ជាប់នូវប្រពៃណីទំនៀមទម្លាប់ ដែលជាអត្តសញ្ញាណរបស់ខ្លួន។
ឯកឧត្តម សែម សុវណ្ណនី បញ្ជាក់ថា សមិទ្ធផល និងការរីកចម្រើនដែលប្រទេសកម្ពុជា ផ្ដល់ជូនប្រជាពលរដ្ឋសព្វថ្ងៃនេះ គឺជាការរក្សាបានសន្តិភាព និងស្ថិរភាពនយោបាយ។ ដោយឡែក បើក្រឡេកទៅអតីតកាល ប្រទេសកម្ពុជា បានរងគ្រោះដោយសង្គ្រាម ដែលធ្វើឱ្យប្រទេសជាតិធ្លាក់ដល់ចំណុចសូន្យ និងមានការសម្លាប់ជាតិសាសន៍ឯងយ៉ាងរង្គាល ជាក់ស្ដែងក្នុងសម័យប្រល័យពូជសាសន៍ប៉ុល ពត។ សុខសន្តិភាព និងការរីកចម្រើននាពេលបច្ចុប្បន្ន គឺជាកញ្ចក់ឆ្លុះបញ្ចាំងពីការដឹកនាំដ៏ត្រឹមត្រូវរបស់អតីតនាយករដ្ឋមន្ត្រី សម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នាអាណត្តិទី៧នេះ។
ទន្ទឹមនឹងពិធីកាន់បិណ្ឌនាឱកាសនេះ ឯកឧត្តមប្រធានក្រុមការងារ បានរំលឹកគុណដល់វីរយុទ្ធជនកម្ពុជាទាំងអស់ ដែលបានពលីជីវិតដើម្បីរំដោះប្រទេស និងប្រជាជនខ្មែរ ចេញពីសង្គ្រាម និង បានឧទ្ទិសកុសលផលបុណ្យជូនដល់ដួងវិញាណក្ខន្ឌ វីរយុទ្ធជនខ្មែរទាំងអស់ សូមទទួលបាននូវបុណ្យកុសល ក្នុងពិធីបុណ្យកាន់បិណ្ឌនាពេលនេះ។
ក្នុងឱកាសនោះ ឯកឧត្ដម សែម សុវណ្ណនី និងក្រុមការងាររាជរដ្ឋាភិបាលចុះមូលដ្ឋានក្រុងរុនតាឯកតេជោសែន បានប្រគេនបច្ច័យ ដល់ព្រះចៅអធិការវត្តចំនួន ០៦អង្គ រួមមាន វត្តជ័យគិរិមុន្នីរស្សី (ហៅវត្តរុន) វត្តគិរី (ហៅវត្តភ្នំបូក) វត្តស្នារសង្រ្គម វត្តស្នារតេជោ៣១៧ វត្តប្រាសាទចៅស្រីវិបុល និងវត្តធម្មជាតិរុនតាឯក(វត្តទើបបង្កើតថ្មី) ដោយក្នុងមួយអង្គចំនួន ១០ម៉ឺនរៀល, បច្ច័យព្រះសង្ឃចំនួន ០៣អង្គ ក្នុងមួយអង្គចំនួន ៥ម៉ឺនរៀល, សាដកចំនួន ០៩ឈុត សរុបថវិកា៤៥ម៉ឺនរៀល, ក្រុមអាចារ្យចំនួន ២០ម៉ឺនរៀល, បច្ច័យកសាងវត្ត ក្នុងវត្តចំនួន ២លានរៀល, គ្រឿងឧបភោគបរិភោគ និងទេយ្យទានដល់វត្តទាំង០៦ សរុបថវិកាចំនួន ៣លាន៦០ម៉ឺនរៀល, បច្ច័យធ្វើចង្ហាន់រាប់បាត្រ ០៦វត្តចំនួន ១លាន២០ម៉ឺនរៀល ឧបត្ថម្ភប្រជាការពារ កងកម្លាំងនគរបាល កងរាជអាវុធហត្ថក្រុង ក្រុមការងារក្រុង ក្រុមប្រឹក្សាសង្កាត់ទាំង០២ សរុប ៣លាន៦០ម៉ឺនរៀល និងឧបត្ថម្ភជូនយាយជី តាជី ចំនួន៤០០នាក់ ក្នុងម្នាក់ៗទទួលបានសារ៉ុង១ និងថវិកា១ម៉ឺនរៀល។
អត្ថបទ និងរូបភាព ៖ ហេង វន្នី
កែសម្រួល ៖ មន្ទីរព័ត៌មានខេត្តសៀមរាប
