នៅថ្ងៃទី១៧ ខែកញ្ញា ឆ្នាំ២០២៤ ឯកឧត្តម សែម សុវណ្ណនី ប្រធានក្រុមការងារចុះមូលដ្ឋានស្រុកបន្ទាយស្រី បានដឹកនាំក្រុមការងារ ចុះជួបសំណេះសំណាលសួរសុខទុក្ខប្រជាពលរដ្ឋ និងនាំយកអំណោយជាគ្រឿងឧបភោគបរិភោគ របស់ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិ ជូនដល់គ្រួសារដែលមានជីវភាពខ្វះខាតចំនួន ២០គ្រួសារ នៅក្នុងឃុំរំចេក ស្រុកបន្ទាយស្រី ខេត្តសៀមរាប។
ក្នុងឱកាសចុះជួបសំណេះសំណាលសួរសុខទុក្ខនោះ ឯកឧត្តម សែម សុវណ្ណនី បានលើកទឹកចិត្តដល់ក្រុមគ្រួសារដែលមានភាពខ្វះខាត សូមកុំមានការបាក់ទឹកចិត្តចំពោះជីវភាពរបស់ខ្លួន ព្រោះក្រុមការងារចុះមូលដ្ឋានជានិច្ចកាលតែងតែខិតខំប្រឹងប្រែងយកចិត្តទុកដាក់ ជួយឧបត្ថម្ភដល់បងប្អូនប្រជាពលរដ្ឋខ្វះខាតទៅតាមលទ្ធភាពជារឿយៗដូចជាភ្លៀងរលឹម គោលដៅលើកកម្ពស់ជីវភាពឲ្យកាន់តែល្អប្រសើរ កាត់បន្ថយការចំណាកស្រុក ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ក្នុងការកំណែទម្រង់នានា ពិសេសលើកកម្ពស់ការផ្តល់សេវាសាធារណៈ និងការអភិវឌ្ឍមូលដ្ឋាន ដែលជាការឆ្លើយតបទៅនឹងសេចក្តីត្រូវការរបស់ប្រជាពលរដ្ឋប្រកបដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌ក្នុងសង្គម ដែលនេះផ្ដើមចេញពីគោលនយោបាយជាវិជ្ជមាន របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ជាមួយនោះដែរ ឯកឧត្តម បានជម្រុញអាជ្ញាធរមូលដ្ឋាន រៀបចំឯកសារ ស្នើរសុំច្បាប់អនុញ្ញាតិពីអាជ្ញាធរជាតិអប្សរា ដើម្បីជួសជុលលំនៅឋានដែលមានសភាពឌ្រុតឌ្រមឡើងវិញ និងគ្រោងឧបត្ថមបន្ថែមដល់គ្រួសារដែលមានជីវភាពខ្វះខាតចំនួន ៨២គ្រួសារបន្ថែមទៀត ។
សូមបញ្ជាក់ថា អំណោយដែលបានឧបត្ថមដល់គ្រួសារដែលមានជីវភាពខ្វះខាតចំនួន២០គ្រួសារ ក្នុងនោះ ១គ្រួសារ ទទួលបានអង្ករចំនួន៥០គីឡូ មីម៉ាម៉ា១កេស ទឹកត្រី១យួរ ទឹកស៊ីអ៊ីវ១យួរ ព្រមទាំងថវិការមួយគ្រួសារ៤០០០០រៀល និងបានឧបត្ថមរទះរុញសម្រាប់មធ្យោបាយធ្វើដំណើរចំនួនមួយ ដល់ជនពិការម្នាក់ផងដែរ។
អត្ថបទ និងរូបភាព ៖ស៊ុំ គីន
កែសម្រួល ៖ ហាំ ម៉េងហួត
