ដើម្បីរួមចំណែកគិតគូរពីបរិស្ថាន និងថែរក្សាព្រៃឈើ នៅព្រឹកថ្ងៃទី១៧ ខែកញ្ញា ឆ្នាំ២០២៤នេះលោក ថាប់ សារ៉ន ប្រធានក្រុមប្រឹក្សាស្រុក និងលោក រិន ឡូត អភិបាលស្រុកបន្ទាយស្រី បានដឹកនាំមន្ត្រីរដ្ឋបាលស្រុក យុវជនស្ម័គ្រចិត្ត លោកគ្រូអ្នកគ្រូ សិស្សានុសិស្ស និងប្រជាពលរដ្ឋចំនួន ៥០០នាក់ ដាំកូនឈើចម្រុះ នៅតាមដងផ្លូវព្រំប្រទល់ឃុំរំចេក និងត្បែង នៃស្រុកបន្ទាយស្រី ខេត្តសៀមរាប។
តាមការលើកឡើងរបស់លោក អភិបាលស្រុក កូនឈើដែលបានយកមកដាំនេះ រួមមាន ដើមឈើទាល ដើមក្ងោក ដើមបេង ដែលមានចំនួនសរុប ៥២៥ដើម។ លោកបន្ថែមថា ទោះបីមានភ្លៀវធ្លាក់ក្ដី ប៉ុន្តែអ្នកចូលរួមបានបង្ហាញនូវចិត្តសប្បាយរីករាយ ក្នុងកិច្ចការសង្គមនេះ ដែលស្របតាតាមគំនិតផ្ដួចផ្ដើមរបស់ឯកឧត្តម ប្រាក់ សោភ័ណ អភិបាលខេត្តសៀមរាប ក្នុងការបំផុសចលនាប្រជាពលរដ្ឋតាមបណ្ដាក្រុង ស្រុកទាំងអស់ ចូលរួមដាំងដើមឈើ និងផ្កាតាមដងផ្លូវឱ្យបានច្រើន ដើម្បីបង្កើតម្លប់កាត់បន្ថយកម្ដៅ និងបង្កើនទេសភាពបៃតង ដែលជាសោភណ្ឌភាពនៅក្នុងមូលដ្ឋាន។
គួររំលឹកថា នេះជាលើកទី២ ហើយក្នុងឆ្នាំ២០២៤ ដែលរដ្ឋបាលស្រុកបន្ទាយស្រី បានបំផុសចលនាដាំកូនដល់អាជ្ញាធរ និងប្រជាពលរដ្ឋក្នុងស្រុកដែលមានចំនួនសរុប ៦ ០០០ដើម ក្នុងភូមិសាស្ត្រឃុំទាំង៥។ ជារៀងរាល់ឆ្នាំ ស្រុកបន្ទាយស្រី បានទាក់ទាញភ្ញៀវទេសចរប្រមាណជាងកន្លះលាននាក់ មកទស្សនាតំបន់រមណីយដ្ឋាន និងសហគមន៍របស់ខ្លួន ដែលក្នុងនោះ ធម្មជាតិបៃតងដ៏ស្រស់បំព្រង ជាការទាក់ទាញដ៏សំខាន់មួយ របស់ស្រុកមួយនេះ។
អត្ថបទ និងរូបភាព៖ លោក ធន់ ពូថេ
កែសម្រួលអត្ថបទ៖ មន្ទីរព័ត៌មានខេត្តសៀមរាប
