នៅខេត្តសៀមរាប ព្រឹកថ្ងៃទី១៦ ខែកញ្ញា ឆ្នាំ២០២៤នេះ មេបញ្ជាការកងទ័ពជើងអាកាស នៃប្រទេសទាំង ១០ ក្នុងតំបន់អាស៊ាន បានជួបប្រជុំគ្នាក្នុងសន្និសីទមេបញ្ជាការកងទ័ពជើងអាកាសអាស៊ាន លើកទី២១ ដែលដឹកនាំដោយ ឯកឧត្តម នាយឧត្តមសេនីយ៍ សឹង សំណាង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងអាកាសនៃព្រះរាជាណាចក្រកម្ពុជា ក្នុងនាមជាម្ចាស់ផ្ទះប្ដូរវេន។
តាមការបញ្ជាក់របស់ ឯកឧត្តម ឧត្តមសេនីយ៍ឯក គង់ មុនី មេបញ្ជាការរង និងជានាយសេនាធិការ កងទ័ពជើងអាកាស បង្ហាញថា នេះជាលើកទី២ហើយ ដែលប្រទេសកម្ពុជាទទួលធ្វើជាម្ចាស់ផ្ទះ ដែលមានគោលបំណង ពង្រឹងចំណងសាមគ្គីភាព បង្កើនកិច្ចសប្រតិបត្តិការសន្តិសុខផ្លូវអាកាសអាស៊ាន ចែករំលែក និងផ្តល់ព័ត៌មានដល់គ្នាទៅវិញទៅមក សំដៅពង្រឹងទំនាក់ទំនង សាមគ្គីភាពរួមគ្នាទប់ស្កាត់ បទល្មើសនានាតាមផ្លូវអាកាស។ លើសពីនេះ កិច្ចប្រជុំ ក៏បានលើកយកនូវយុទ្ឋសាស្ត្រគន្លឺះល្អៗ ដើម្បីសម្របសម្រួលការហោះហើរទៅបណ្តាប្រទេសក្នុងតំបន់អាស៊ាន ដែលជួបគ្រោះមហន្តរាយផ្សេងៗ ក្នុងការស្នើសុំឱ្យមានការជួយសង្គ្រោះ ពីទ័ពអាកាសនៃប្រទេសអាស៊ាន ដូចជាជួយអន្តរាគមន៍សង្គ្រោះ និងដឹកជញ្ជូនជំនួយមនុស្សធម៌ តបតាមភាពចាំបាច់ និងទាន់ពេលវេលា។
ឯកឧត្តម មេបញ្ជាការរង បញ្ជាក់បន្ថែមថា ក្នុងសន្និសីទនេះដែរ មេបញ្ជាការនៃប្រទេសអាស៊ានទាំង១០ ក៏បានចុះហត្ថលេខាលើ របៀបវារៈមួយចំនួនដូចជា កិច្ចសហប្រតិបត្តិការលើការបណ្ដុះបណ្ដាលធនធានមនុស្ស ការផ្លាស់ប្ដូរកិច្ចសហប្រតិបត្តិការលើការប្រយុទ្ធប្រឆាំងការជួញដូរមនុស្ស ជនអន្តោប្រវេសន៍ខុសច្បាប់តាមព្រំដែនអាកាស ការប្រយុទ្ធប្រឆាំងការជួញដូរគ្រឿងញៀនតាមផ្លូវអាកាស ការប្រយុទ្ធប្រឆាំងភារវកម្មតាមផ្លូវអាកាស និងកិច្ចសហការផ្លាស់ប្ដូរទស្សនកិច្ចគ្នាទៅវិញទៅមក នៃប្រទេសក្នុងសហគមន៍អាស៊ាន។
លោកឧត្តមសេនីយ៍ឯក គង់ មុនី ក៏បានលើកឡើងផងដែរថា នេះជាមោទនភាព ដែលប្រទេសកម្ពុជាបានធ្វើជាម្ចាស់ផ្ទះ ក្នុងអង្គសន្នីសិទ្ធនេះ ហើយក៏ជាកិច្ចខិតខំប្រឹងប្រែងទៅអនាគត របស់សមាជិកអាស៊ានទាំងអស់ សម្រាប់អ្នកជំនាន់ក្រោយ និង អ្នកបន្តវេន ដើមី្បរក្សាបាននូវ ស្ថេរភាព លទ្ធភាពនៅក្នុងតំបន់ ។
គួរជម្រាបថា សន្និសីទមេបញ្ជាការកងទ័ពជើងអាកាសអាស៊ាន លើកទី២២ ឆ្នាំ២០២៥ នឹងត្រូវរៀបចំនៅប្រទេសឥណ្ឌូនេស៊ី ដែលជាម្ចាស់ប្ដូរវេនវិញម្ដង។
អត្តបទ និងរូបភាព៖ លោក យូ វង្ស
កែសម្រួល៖ មន្ទីរព័ត៌មានខេត្តសៀមរាប
