មន្ទីរវប្បធម៌ខេត្តសៀមរាប ក្រោមការគាំទ្រពីអាជ្ញាធរខេត្ត បានរៀបចំផ្ទាំងទស្សនីយភាព ល្ខោននិយាយរឿងផ្កាស្រពោន ជូនមហាជនទស្សនាដោយឥតគិតថ្លៃនៅផ្សារហើរីថេកវ៉កខេត្ដសៀមរាប ដោយមាន វត្តមានចូលរួមជាអធិបតី លោក សំកុល សុចិត្រា អភិបាលរងខេត្ដតំណាង ឯកឧត្តម ប្រាក់ សោភ័ណ អភិបាលនៃគណ:អភិបាលខេត្តសៀមរាប និងវត្តមានសមាជិកក្រុមប្រឹក្សាខេត្ត អគ្គកុងស៊ុលនៃសាធារណៈរដ្ឋកូរ៉េ ប្រចាំខេត្តសៀមរាប អគ្គកុងស៊ុលនៃសាធារណៈរដ្ឋប្រជាមានិតចិន ប្រចាំខេត្តសៀមរាប ប្រធានការិយាល័យ ទីប្រឹក្សាស្ថានទូតជប៉ុននៅកម្ពុជា ព្រមទាំងមហាជនយ៉ាងច្រើនកុះករ។
លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប បានថ្លែងថា នេះជាលើកទី១ ដែលមន្ទីរវប្បធម៌ និងវិចិត្រសិល្បៈខេត្ត សហការជាមួយនាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ និងសិល្បៈល្ខោនមហាជនខេត្ត បានលើកយកទស្សនីភាពខ្មែរ ទម្រង់ល្ខោននិយាយ ដែលកំពុងប្រឈមនឹងការបាត់បង់មកសម្តែងជូនសាធារណជន ពុកម៉ែ បងប្អូនខេត្តសៀមរាបបានទស្សនា ដោយលើកយករឿង “ផ្កាស្រពោន” ដែលជាស្នាដៃអក្សសិល្ប៍ដ៏មានប្រជាប្រិយភាពរបស់ខ្មែរក្នុងអំឡុងឆ្នាំ១៩៤៧។
លោកបានបន្ដថា កិច្ចសហការរៀបចំព្រឹត្តការណ៍សម្តែងរួមគ្នានេះក្នុងគោលបំណងទី១លើកទឹកចិត្ត ក៏ដូចជាការផ្តល់ឳកាសដល់សិល្បករល្ខោនខេត្តសៀមរាប ជាពិសេសបានមើលឃើញពួកគាត់បញ្ចេញទេពកោសល្យក្នុងការសម្តែង ទី២ ជម្រុញលើកទឹកចិត្តយុវជនឲ្យចូលរួមថែរក្សាមរតកល្ខោននិយាយឲ្យកាន់តែខ្លាំងក្លាថែមទៀត ព្រោះខេត្តសៀមរាបពុំដែលមានទម្រង់សិល្បៈល្ខោននិយាយនេះឡើយ ទី៣.ចង់ផ្សព្វផ្សាយទម្រង់ល្ខោននិយាយដល់ប្រជាពលរដ្ឋទូទៅក្នុងខេត្តសៀមរាប។ទី៤.បង្កបរិយាកាសឲ្យកាន់តែប្រសើរឡើងក្នុងខេត្តសៀមរាប នាឱកាសបុណ្យភ្ជុំបិណ្ឌនាពេលនេះ។ និង៥. ផ្សព្វផ្សាយពីសិល្បៈវប្បធម៌ ជាពិសេសទម្រង់ល្ខោននិយាយ”រឿងផ្កាស្រពោន”ដែលមានក្នុងអក្សរសិល្ប៍ខ្មែរ ដើម្បីជម្រុញវិស័យទេសចរណ៍ទាក់ទាញភ្ញៀវជាតិ និងអន្តរជាតិ រួមចំណែកលើកស្ទួយសេដ្ឋកិច្ចខេត្តសៀមរាប តាមរយៈកំណើន ទេសចរស្របតាមអនុសាសន៍ដ៏ខ្ពង់ខ្ពស់របស់ សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញនូវយុទ្ធសាស្ត្រ ទស្សនាខេត្តសៀមរាប ឆ្នាំ២០២៤។
លោកថា នៅកម្មវិធីខាងលើនេះ ប្រព្រឹត្តទៅបាន ដោយសារមានការចូលរួមឧបត្ថម្ភគាំទ្រយ៉ាងពេញទំហឹង ពីឆន្ទៈ ពីបេះដូង របស់ប្រជា ពលរដ្ឋកម្ពុជា របស់ថ្នាក់ដឹកនាំខេត្តគ្រប់លំដាប់ថ្នាក់ ក្នុងការចូលរួមលើកស្ទួយវិស័យសិល្បៈខ្មែរមួយនេះឲ្យបានផុសផុលនឹងរស់រវើកឡើងវិញ។ លោកសង្កេតឃើញថា ទស្សនាទស្សនីយភាពខ្មែរ ពីទម្រង់ល្ងោននិយាយ ដំបូងខេត្ដសៀមរាប មានការចូលរួមចំណែកជាថវិកាមានចាប់ពី ៤០០ ៛ ១,០០០៛ រហូតដល់ ៥០០$ នេះកាយវិការដែលពុំអាចកាត់ថ្លៃបានឡើយ។
ក្នុងឱកាសនេះដែរ លោក សំកុល សុចិត្រា អភិបាលរង តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាលបាលខេត្តសៀមរាប មានប្រសាសន៍ថា អាជ្ញាធរខេត្ដ មានកិត្ដិយស ដែលមានកម្មវិធីបើកការទស្សនាទស្សនីយភាពខ្មែរ ទម្រង់ល្ខោននិយាយ រឿង «ផ្កាស្រពោន» នាពេលនេះ ដោយផ្តោតសំខាន់ទៅលើការលើកកម្ពស់ស្មារតីសិល្បៈល្ខោន មហាជនខេត្តសៀមរាប ជាពិសេសក្នុងស្រទាប់យុវជនដែលជាអ្នកបន្តវេនឲ្យកាន់តែមានការយល់ដឹងពីតម្លៃពិត នៃវប្បធម៌ដ៏សម្បូរណ៍បែបរបស់ដូនតាខ្លួនបានបន្សល់ទុកមក ដើម្បីឲ្យបន្តរស់រវើកប្រកបដោយសុខដុមភាព ដែលជាមូលដ្ឋានគ្រឹះនៃសេចក្តីស្រឡាញ់ មានសីលធម៌ គុណធម៌ និងការអភិវឌ្ឍន៍។
លោកបន្ថែមថា ក្នុងនាមយើងទាំអស់គ្នាដែលជាអ្នកបន្តវេន ត្រូវបំពេញកាតព្វកិច្ចក្នុងការធានាឲ្យបាននូវសុខដុមភាពនៃវប្បធម៌ជាតិ តាមរយៈការយកចិត្តទុកដាក់ថែរក្សា ការពារ និងអភិវឌ្ឍន៍តាមរយៈការបណ្តុះបណ្តាល ការផ្សព្វផ្សាយ ការផ្ទេរចំណេះដឹង ជំនាញបច្ចេកទេស និងទេពកោសល្យវប្បធម៌ដ៏សំបូរណ៍បែបឲ្យបានដល់សាធារណៈជន ពិសេសដល់អ្នកជំនាន់ក្រោយដែលជាអ្នកបន្តវេន។
លោកបានកោតសរសើរ ដែលមន្ទីរវប្បធម៌ និងវិចិត្រសិល្បៈបានបង្កើតព្រឹត្តិការដ៏វិសេសវិសាលនេះឡើង ដែលជាមោទនៈភាព ជាមុខមាត់ខេត្ត ក៏ដូចជាកិត្យានុភាពជាតិទាំងមូល និងការអភិរក្ស ដើម្បីរក្សាការពារមិនឲ្យបាត់បង់នូវទម្រង់សិល្បៈល្ខោននិយាយមួយនេះ ហើយថែមទាំងបានបង្កើនសកម្មភាពផ្សព្វផ្សាយដល់សាធារណៈជនខេត្តសៀមរាបសំដៅរួមចំណែកក្នុងការអភិវឌ្ឍន៍វិស័យទេសចរណ៍ វប្បធម៌នៅក្នុងខេត្តសៀមរាប។
អត្ថបទ និងរូបភាព ៖ឈិត សាវី
កែសម្រួល ៖ ហាំ ម៉េងហួត
