ក្រុមការងាររាជរដ្ឋាភិបាល ចុះមូលដ្ឋានខេត្ដសៀមរាប និងប្រជាពលរដ្ឋ ដឹកនាំដោយឯកឧត្ដម ខៀវ ឆេន បានចូលរួមកាន់បិណ្ឌវេនទី១២ នៅវត្ដមនោរម្យ ហៅវត្ដព្រៃឆ្ការ ស្ថិតនៅឃុំពង្រលើ ស្រុកជីក្រែង នាថ្ងៃទី២៩ ខែកញ្ញា ឆ្នាំ២០២៤នេះ ដើម្បីឧទ្ទិសមគ្គផលដល់បុព្វការរីជន និងបានអំពាវនាវប្រជាពលរដ្ឋចូលរួមថែរក្សាសន្តិភាពនៅកម្ពុជា ដើម្បីការរីកចំរើនក្នុងវិស័យពទ្ធសាសនា និងអភិវឌ្ឍន៍សង្គមជាតិ ។
ឯកឧត្តម ឧត្តមសេនីយ៍ឯក ខៀវ ឆេន រដ្ឋលេខាធិការក្រសួងការពារជាតិ និងជានាយកខុទ្ទកាល័យឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសាសន៍ថា ការធ្វើបុណ្យកាន់បិណ្ឌ ឬបុណ្យភ្ជុំបិណ្ឌដ៏មានអត្ថន័យនាពេលនេះ ទៅតាមប្រពៃណីទំនៀមទម្លាប់របស់ខ្មែរ ដើម្បីយកបច្ច័យ ក៍ដូចជាទ័យទានប្រគេនចំពោះព្រះភិក្ខុសង្ឃ ដែលគង់ចាំវស្សា សម្រាប់ឧទ្ទិសកុសលទៅឱ្យបុព្វការីជន ។
ឯកឧត្ដមបានបង្ហាញថា កម្ពុជា កំពុងតែដើរលើផ្លូវត្រូវ និងត្រូវតែបន្តដើរលើមាគ៌ាដ៏ត្រឹមត្រូវនេះបន្តទៀត ដើម្បីប្រជាពលរដ្ឋ ប្រទេសជាតិមានការអភិវឌ្ឍន៍ទាំងវិស័យពុទ្ធចក្រ និងអាណាចក្រ និងជាពិសេស បានធ្វើឱ្យប្រជាពលរដ្ឋមានជីវភាពធូរធារ ក្នុងការចូលរួមធ្វើបុណ្យទានគ្រប់រដូវកាល មិនថាបុណ្យភ្ជុំបិណ្ឌ ឬបុណ្យចូលខ្មែរឆ្នាំ ឬពិធីបុណ្យផ្សេងទៀត។
ជាមួយមាគ៌ាដ៏ត្រឹមត្រូវនេះ ក៍បានជំរុញឱ្យមានការអភិវឌ្ឍ កសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើន ទៅមុខបន្តទៀត។ នាឱកាសកាន់បិណ្ឌនេះ ឯកឧត្ដមអនុប្រធានក្រុមការងាររាជរដ្ឋាភិបាល ចុះមូលដ្ឋានខេត្ដសៀមរាប បានអំពាវនាវដល់ ព្រះសង្ឍ បងប្អូនប្រជាពលរដ្ឋគ្រប់រូប ចូលរួមថែរក្សា ការពារសន្តិភាពនៅកម្ពុជាឲ្យបានគង់វង្ស តាមរយៈព្រះធម៌ផ្សាភ្ជាប់ នឹងសង្គម ។
ឯកឧត្ដម ខៀវ ឆេន បាននាំយកការផ្ដាំផ្ញើសាកសួរសុខទុក និងយកចិត្តទុកដាក់ពីសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្ដម នាយឧត្ដមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ដ្រីក្រសួងការពារជាតិ នាឱកាសពិធីបុណ្យកាន់បិណ្ឌ ភ្ជុំបិណ្ឌនាពេលនេះផងដែរ។នៅឱកាសពិធីកាន់បិណ្ឌនៃពិធីបុណ្យភ្ជុំបិណ្ឌនេះដែរ ក្រុមកងារងារបានប្រគេនបច្ច័យជូនចៅអធិការវត្ត បច្ច័យកសាងវត្ត គ្រឿងឧបគោគបរិភោគជាច្រើនទៀតផងដែរ។
បើតាមលោក បូ ម៉េងទ្រី អភិបាលស្រុកជីក្រែង ខេត្ដសៀមរាប មានប្រសាសន៍ថា តាមការពិនិត្យចាប់តាំងពីបិណ្ឌមួយរហូតមកនេះ មានប្រជាពុទ្ធបរិស័ទជិតឆ្ងាយបានបំពេញកុសលផលបុណ្យនៅវត្តច្រើនជាងឆ្នាំមុនៗ ពោលនៅក្នុងវត្ដមានចង្ហាន់គ្រប់គ្រាន់ ជាក់ស្ដែងពិធីកាន់បិណ្ឌនៅវត្ដមនោរម្យ ហៅវត្ដព្រៃឆ្ការ មានចង្ហាន់ប្រគេនព្រះសង្ឃបបូរ ដែលនេះបង្ហាញថា ពិធីបុណ្យនៅជនបទក្ដីនៅទីក្រុងក្ដី គឺមានប្រជាពលរដ្ឋជាច្រើនកុះករបានថែរក្សាទំនៀមទម្លាប់ប្រពៃណីសាសនាកុំឲ្យបាត់បង់ ក៍ដូចជាចូលរួមថែរក្សាទម្រង់នៃទំនៀមទម្លាប់ប្រពៃណីសាសនាឲ្យបានល្អផងដែរ៕
អត្ថបទ និងរូបភាព ៖ ឈិត សាវី
កែសម្រួល ៖ ហាំ ម៉េងហួត
