ដើម្បីចូលរួមចំណែកក្នុងការបណ្តុះបណ្តាលធនធានមនុស្សក្នុងវិស័យព្រះពុទ្ធសាសនា កាលពីថ្ងៃទី០៣ ខែតុលា ឆ្នាំ២០២៤ម្សិលមិញនេះ លោក ច័ន្ទ ថោងសេរី សប្បុរសជនរស់នៅប្រទេសអាល្លឺម៉ង បានប្រគេនអង្ករចំនួន១០តោន ដល់វត្តស្វាយរមៀត ក្រុងសៀមរាប សម្រាប់ទ្រទ្រង់ចង្ហាន់ព្រះសង្ឃ និងសាមណសិស្សចំនួន៥០អង្គ ដែលកំពុងស្នាក់នៅសិក្សារៀនសូត្រ ទាំងចំណេះដឹងទូទៅ និងភាសាបាលី។
ព្រះសច្ចានុបាល នឿម វុទ្ធី ព្រះគ្រូចៅអធិការវត្តស្វាយរមៀត មានថេរដីកាថា សាលាពុទ្ធិកបឋមសិក្សាវត្តស្វាយរមៀត បានបើកដំណើរបង្រៀនព្រះសង្ឃអស់រយៈពេលជាច្រើនឆ្នាំមកហើយ ក្នុងនោះមានព្រះសង្ឃជាច្រើនអង្គបានទទួលចំណេះដឹង និងបានក្លាយជាធនធានមនុស្សដ៏ល្អ សម្រាប់សង្គមជាតិ ដោយអ្នកខ្លះសឹកទៅបានក្លាយជាមន្រ្តីរាជការ អ្នកខ្លះជាអ្នកប្រកបមុខរបរស៊ីមានជីវភាពធូរធា។ ហើយបច្ចុប្បន្ននេះ មានសាមណសិស្សចំនួន៥០អង្គ បានកំពុងតែសិក្សានៅសាលាពុទ្ធិកបឋមសិក្សាវត្តស្វាយរមៀតនេះ។ក្នុងនោះមានព្រះសង្ឃនៅក្នុងខេត្តសៀមរាបផង និងព្រះសង្ឃនិមន្តមកពីបណ្តាខេត្តផ្សេងៗផង។ សមណសិស្សទាំងនេះ ភាគច្រើនជាកូនអ្នកដែលមានជីវភាពខ្វះខាត ហើយសាលាពុទ្ធិកបឋមសិក្សាវត្តស្វាយរមៀតនេះ។ ជាមួយគ្នានេះ ព្រះតេជគុណក៏បានផ្តល់អាហាររូបករណ៍ឱ្យសមណសិស្សមួយចំនួនបានបន្តការសិក្សានៅសាកលវិទ្យាល័យផងដែរ។
ព្រះតេជគុណបានបន្តថា បើទោះបីរាជរដ្ឋាភិបាលកម្ពុជា បានធ្វើការអភិវឌ្ឍវិស័យអប់រំឱ្យមានការរីកចម្រើន តាមរយៈការអភិវឌ្ឍសមត្ថភាពលោកគ្រូ អ្នកគ្រូ និងបានសាងសង់សាលារៀនស្ទើរគ្រប់ភូមិទាំងអស់នៅទូទាំងប្រទេសក៏ដោយ ប៉ុន្តែវត្តអារាមនៅមានតួនាទីសំខាន់ក្នុងការបង្ហាត់បង្រៀនដល់យុវជនកម្ពុជា ជាពិសេសអ្នកដែលមានជីវភាពខ្វះខាត។ ព្រះសច្ចានុបាល នឿម វុទ្ធី ក៏បានថ្លែងអំណរគុណចំពោះសប្បុរសជនមកពីប្រទេសអាល្លឺម៉ង ដែលបានប្រគេនអង្ករនាពេលនេះ ស្របពេលដែលវត្តមានការចំណាយច្រើន ក្នុងការផ្គត់ផ្គង់សាមណសិស្សទាំងចង្ហាន់ និងសម្ភារៈសិក្សា។
ព័ត៌មានជាតិ ថ្មីៗ
លោក ច័ន្ទ ថោងសេរី បានថ្លែងថា ដោយមើលឃើញពីតួនាទីមិនអាចខ្វះបានរបស់ព្រះសង្ឃពោលគឺទីវត្តអារាម។ តាំងតែពីដើមមករហូតដល់បច្ចុប្បន្នវត្តអារាមព្រះពុទ្ធសាសនាបានចូលរួមអភិវឌ្ឍសង្គមកម្ពុជាស្ទើរតែគ្រប់វិស័យ ដូចវិស័យអប់រំ សុខាភិបាល សេដ្ឋកិច្ច សង្គមកិច្ច និងវប្បធម៌ជាដើម ទើបលោកមានសទ្ធាជ្រះថ្លាប្រគេនអង្ករសម្រាប់ទ្រទ្រង់ចង្ហាន់ព្រះសង្ឃ និងសាមណសិស្ស ក្នុងគោលបំណង គឺចងឱ្យសាមណសិស្សបានរៀនសូត្រ ធម៌ បាលី ឱ្យបានជ្រៅជ្រះ ក្លាយជាធនធានមនុស្សដ៏ល្អសម្រាប់សង្គមជាតិ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក អ៊ុន ណារាជ្យ
