នៅព្រឹកថ្ងៃទី០៧ ខែតុលា ឆ្នាំ២០២៤នេះ ក្រុមការងារគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានរៀបចំកិច្ចប្រជុំពិភាក្សាត្រៀមរៀបចំយុទ្ធនាការ “ដើរដើម្បីបញ្ឃប់អំពើជួញដូរមនុស្សលើកទី៣ ឆ្នាំ២០២៤” ដឹកនាំដោយ លោកស្រី ម៉ននី រង្សី អភិបាលរងខេត្ត និងជាអនុប្រធានអចិន្រ្តៃយ៍ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត (គ.ខ.ប.ជ) ដោយមានការចូលរួមពីថ្នាក់ដឹកនាំមន្ទីរ អង្គភាពជុំវិញខេត្ត អង្គការដៃគូ និងអ្នកពាក់ព័ន្ធជាច្រើនរូប។
លោកស្រី ម៉ននី រង្សី មានប្រសាសន៍ថា កិច្ចប្រជុំនេះគឺ ធ្វើការពិភាក្សាគ្នាក្នុងការត្រៀមលក្ខណៈផ្សេងៗរៀបចំកម្មវិធីដើរ ដើម្បីបញ្ឃប់អំពើជួញដូរមនុស្សលើកទី៣ ឆ្នាំ២០២៤ ដែលនឹងប្រព្រឹត្តទៅនៅថ្ងៃទី១៩ ខែតុលា ឆ្នាំ២០២៤ ខាងមុខនេះ ក្នុងគោលដៅបំផុសស្មារតីដល់សាធារណជនទូទៅក្នុងការលុបបំបាត់រាល់សកម្មភាពជួញដូរមនុស្សគ្រប់រូបភាព និងបង្ការទប់ស្កាត់ បង្ក្រាបរាល់បទល្មើសនានា ពាក់ព័ន្ធនឹងការជួញដូរមនុស្ស អំពើហិង្សាទាក់ទងនឹងយេនឌ័រ ព្រមទាំងការការពារជនរងគ្រោះដោយអំពើជួញដូរ ដែលកំពុងបន្តកើតមានក្នុងប្រទេសកម្ពុជា និងនៅលើពិភពលោក។
លោកស្រី រំពឹងថា កម្មវិធីដើរ ដើម្បីបញ្ឃប់អំពើជួញដូរមនុស្សលើកទី៣ នឹងមានថ្នាក់ដឹកនាំ មន្រ្តីរាជការ និងប្រជាពលរដ្ឋចូលរួមច្រើន ដើម្បីជាការលើកមុខមាត់ដល់ខេត្តសៀមរាប ព្រោះយុទ្ធនាការប្រយុទ្ធប្រឆាំងអំពើជួញដូរមនុស្សនេះ គឺជាយុទ្ធនាការសកលមួយ ដែរធ្វើឡើងនៅតាមបណ្តាប្រទេសផ្សេងៗ នៅលើពិភពលោក ហើយវាជាលើកទី៣ សម្រាប់ខេត្តសៀមរាប និងជាលើកទី១០ នៅទូទាំងសកលលោក។ លើសពីនេះ ចំពោះប្រទេសកម្ពុជាយើង កន្លងមកក៏មានបណ្តាខេត្តមួយចំនួនរៀបចំឡើង ដែរនេះការបង្ហាញនូវការយកចិត្តទុកដាក់របស់រាជរដ្ឋាភិបាល ថ្នាក់ដឹកនាំខេត្ត និងប្រជាជនកម្ពុជា ក្នុងការប្រឆាំងអំពើជួញដូរមនុស្សនេះ។
លោកស្រីអនុប្រធានអចិន្រ្តៃយ៍ ក៏បានជំរុញឱ្យក្រុមការងារលេខាធិការដ្ឋានប្រយុទ្ធប្រឆាំងអំពើជួញដូរមនុស្សខេត្ត ត្រូវសហការគ្នាឱ្យបានល្អ ជាមួយមន្ទីរអង្គភាពពាក់ព័ន្ធ រដ្ឋបាលក្រុងស្រុក អង្គការដៃគូ កងកម្លាំងប្រដាប់អាវុធនានា និងក្រុមការងារពាក់ព័ន្ធ ធ្វើយ៉ាងណាឱ្យយុទ្ធនាការនេះប្រព្រឹត្តិទៅដោយរលូន និងទទួលបានផ្លែផ្កាល្អប្រសើរផងដែរ៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
