ប្រធានមណ្ឌលសុខភាពគោកចក ក្រុងសៀមរាប លោកស្រី ភាសំបូ លីណា បានបង្ហាញថា ពលរដ្ឋភាគច្រើនពិតជាបានស្គាល់ពីជំងឺរបេង ដែលជាជំងឺឆ្លងតាមរយៈផ្លូវដង្ហើម មិនមែនជាជំងឺតំណពូជឡើយ ហើយជំងឺរបេង ដែលអាចឆ្លងពីមនុស្សម្នាក់ទៅមនុស្សម្នាក់ទៀតនោះ គឺជំងឺរបេងសួត ដោយជំងឺរបេងសួត ឆ្លងតាមរយៈការដកដង្ហើម ការក្អក កណ្តាស់ ហើយមេរោគរបេងសួតនេះ ងាយនឹងឆ្លងក្នុងស្ថានភាពត្រជាក់។
ក្នុងកម្មវិធីសន្ទនាមតិ នៅថ្ងៃទី០៧ ខែតុលា ឆ្នាំ២០២៤នេះ លោកស្រី ភាសំបូ លីណា បានឱ្យដឹងថា ជំងឺរបេង អាចបង្ហាញរោគសញ្ញាមួយចំនួនដូចជា អ្នកជំងឺធ្លាក់ខ្លួនស្គម អស់កម្លាំង ល្ហិតល្ហៃដៃជើង បែកញើសខ្នង ហើយក្នុងករណីនេះជាជំងឺរបេងសួត វាធ្វើឱ្យអ្នកជំងឺក្អករ៉ាំរ៉ៃ។ សម្រាប់មនុស្សមួយចំនួនតែងគិតថា ជំងឺរបេង ជាជំងឺតំណពូជ ពីព្រោះពួកគាត់តែងមានទស្សនៈថា កូនកំលោះក្រមុំរស់នៅក្នុងគ្រួសារដែលមានឪពុក ឬម្តាយកើតជំងឺរបេង តែងឆ្លងជំងឺនេះបន្ត។ ប៉ុន្តែការពិតទស្សនៈបែបនេះ វាហួសសម័យហើយ ពីព្រោះជំងឺរបេង អាចព្យាបាលជាសះស្បើយបាន ១០០ភាគរយ ដោយការប្រើប្រាស់ឱសថ និងការចាក់ថ្នាំ ដោយគ្រាន់តែឱ្យអ្នកជំងឺអនុវត្តការប្រើប្រាស់ឱសថតាមវេជ្ជបញ្ជា ឬបុគ្គលិកសុខាភិបាលឱ្យបានខ្ជាប់ខ្ជួនប៉ុណ្ណោះ ដែលការព្យាបាលដោយមិនគិតថ្លៃ។
ជាមួយគ្នានេះ លោកស្រីប្រធានមណ្ឌល ក៏បានសំណូមពរឱ្យប្រជាពលរដ្ឋ ត្រូវចេះយល់ដឹងពីសុខភាព និងមកទទួលសេវាឱ្យាបានត្រឹមត្រូវ កុំឱ្យប្រើប្រាស់ថ្នាំដោយខ្លួនឯង ធ្វើឱ្យស៊ាំថ្នាំពិបាកព្យាបាលនៅពេលក្រោយ ហើយជំងឺកាន់តែធ្ងន់ធ្ងរ។ ដូច្នេះត្រូវទៅពិគ្រោះជាមួយគ្រូពេទ្យ ដែលអាចទុកចិត្តបាន ដើម្បីឱ្យសុខភាពបានប្រសើរឡើង៕
អត្ថបទ៖ លោក ឡេង ពិសិដ្ឋ
កែសម្រួល៖ លោក អ៊ុន ណារាជ្យ
