នៅថ្ងៃទី០៨ ខែតុលា ឆ្នាំ២០២៤នេះ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានជួបសំណេះសំណាល និងសួរសុខទុក្ខថ្នាក់ដឹកនាំ មន្ត្រីរាជការនៃមន្ទីរផែនការខេត្តសៀមរាប ដើម្បីស្ដាប់នូវរបាយការណ៍ដែលអនុវត្តបានកន្លងមក ប្រមូលនូវបទពិសោធ និងបញ្ហាប្រឈមក្នុងការអនុវត្តការងារ ដោយមានការចូលរួមពី លោក សុខ ថុល អភិបាលរងខេត្តសៀមរាប រួមនិងប្រតិភូអមដំណើរជាច្រើនរូប។
បន្ទាប់ពីស្ដាប់របាយការណ៍របស់លោកប្រធានមន្ទីររួចមក ឯកឧត្តម រដ្ឋមន្ត្រី ប៊ិន ត្រឈៃ បានថ្លែងនូវការកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ និងមន្ត្រីរាជការនៃមន្ទីរផែនការខេត្តសៀមរាប ដែលបានខិតខំប្រឹងប្រែងអនុវត្តតួនាទីភារកិច្ចការងារយ៉ាងសកម្មនាពេលកន្លងមក និងបានលើកទឹកចិត្តដល់មន្ត្រីរាជការទាំងអស់ ក្នុងការបន្តកសាងនិងអភិវឌ្ឍសមត្ថភាព ដើម្បីក្លាយជាធនធានមនុស្ស និងជាសសរទ្រូងសម្រាប់អង្គភាព។ ឯកឧត្តម ក៏បានគាំទ្រចំពោះការរៀបចំចាត់ចែង និងបែងចែកតួចនាទីរបស់មន្ទីរដែលធ្វើឱ្យការងារអនុវត្តទៅបានដោយរលូន និងទទួលបានជោគជ័យផ្លែផ្កាផងដែរ។
ព័ត៌មានជាតិ ថ្មីៗ
ឯកឧត្តម រដ្ឋមន្ត្រី ក៏បានចែករំលែកយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល គឺការកែទម្រង់ និងពង្រឹងអភិបាលកិច្ច ដោយផ្ដោតការយកចិត្តទុកដាក់ខ្ពស់លើការកសាងមូលធនមនុស្ស តាមរយៈការអភិវឌ្ឍផ្នែកចំណេះដឹង ផ្សារភ្ជាប់នឹងសីលធម៌ ពោលគឺធនធានមនុស្សសម្រាប់ពេលអនាគត ត្រូវមានទាំងចំណេះដឹង និងសីលធម៌។ ក្នុងនោះចក្ខុវិស័យឆ្នាំ២០៥០ គឺជាចក្ខុវិស័យដ៏វែងឆ្ងាយមួយ ដែលរាជរដ្ឋាភិបាលគ្រប់ជំនាន់បានគិតគូរ និងអនុវត្ត ព្រមទាំងសម្រេចបានសមិទ្ធផលជាច្រើនរាប់ពុំអស់ ដើម្បីជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍជាតិ ដែលក្នុងនោះរួមមាន ការដាក់ចេញនូវយុទ្ធសាស្ត្រជាច្រើន សំដៅសម្រេចបានចក្ខុវិស័យរបស់កម្ពុជា ក្នុងការប្រែក្លាយជាប្រទេសមានចំណូលកម្រិតខ្ពស់ក្នុងឆ្នាំ២០៥០។
ឯកឧត្តម មានប្រសាសន៍ថា ជាមួយនឹងសមិទ្ធផលដែលយើងសម្រេចបានកន្លងមក និងបន្តទៅមុខទៀត គឺយើងមិនអាចបំភ្លេចបាននូវកត្តាសន្តិភាព ព្រោះសន្តិភាពមួយ ការអភិវឌ្ឍមួយ និងការបែងចែកផ្លែផ្កាសេដ្ឋកិច្ចប្រកបដោយសមភាព នឹងនាំកម្ពុជារក្សាបាននូវសន្តិភាពគង់វង្សយូរអង្វែង និងឆ្ពោះទៅសម្រេចបានចក្ខុវិស័យឆ្នាំ២០៥០។ ក្នុងនោះក្រសួងផែនការ នឹងពុំអាចសម្រេចបានលទ្ធផលការងារកន្លងមក និងពេលអនាគត ជូនរាជរដ្ឋាភិបាលនោះឡើយ ប្រសិនបើពុំមានកិច្ចសហការពីក្រសួងស្ថាប័នទាំងអស់ នៃរាជរដ្ឋាភិបាលនោះទេ។ ការផ្ដល់ធាតុចូល និងទស្សនទានបានទាន់ពេលវេលា ជាកត្តាយ៉ាងសំខាន់ ឈានទៅសម្រេចបានការកសាងផែនការយុទ្ធសាស្ត្រ គោលនយោបាយ ដែលមានភាពប្រទាក់ក្រឡា និងប្រសិទ្ធភាពខ្ពស់ សម្រាប់ការអភិវឌ្ឍជាតិ៕
អត្ថបទ និង រូបភាព៖ លោក អ៊ុន ណារាជ្យ
