ក្នុងឱកាសអញ្ជើញបើកវិញ្ញាសាប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤នេះ នៅមណ្ឌលវិទ្យាល័យ ១០មករា ១៩៧៩ ក្រុងសៀមរាប នាព្រឹកថ្ងៃទី០៨ ខែតុលា ឆ្នាំ២០២៤នេះ ឯកឧត្តម ប្រាក់ សោភ័ណ អភិបាលខេត្តសៀមរាប បានប្រកាសថា សម្រាប់សិស្សដែលប្រឡងជាប់និទ្ទេស A នឹងទទួលបានម៉ូតូម្នាក់១គ្រឿង និងបានជំរុញដល់បេក្ខជនត្រូវប្រឹងប្រែងបញ្ចេញឱ្យអស់ពីសមត្ថភាពដែលបានរៀនអស់រយៈពេល១២ឆ្នាំកន្លងមក។
ឯកឧត្តម ប្រាក់ សោភ័ណ មានប្រសាសន៍ថា សម្រាប់ឆ្នាំ២០២៤នេះ មិនខុសពីបណ្តាឆ្នាំមុនៗនោះទេ សម្រាប់ប្អូនៗដែលប្រឡងជាប់និទ្ទេស A នឹងទទួលបានម៉ូតូម្នាក់១គ្រឿង ជាការលើកទឹកចិត្ត ដែលរង្វាន់នេះមិនរាប់បញ្ចូលរង្វាន់ដទៃទៀតពីសម្តេចធិបតី ហ៊ុន ម៉ាណែត នាយករដ្ឋមន្ត្រី នោះទេ។ ចំពោះការប្រឡងនាពេលនេះ វាជាការវាស់ស្ទង់នូវកម្រិតនៃចំណេះដឹងរបស់ក្មួយៗ ដែលត្រូវបានបញ្ចប់ការសិក្សានៅមធ្យមសិក្សាទុតិយភូមិ និងឈានចូលទៅសិក្សាបន្តនៅសកលវិទ្យាល័យ និងស្វែងរកនូវធនធានមនុស្សជាទំពាំងស្នងឫស្សី ក្នុងការចូលរួមអភិវឌ្ឍប្រទេសជាតិ ដែលរាជរដ្ឋាភិបាល បានចាត់ទុកវិស័យអប់រំ ជាវិស័យអាទិភាពចម្បង ក្នុងយុទ្ធសាស្ត្របញ្ចកោណដំណាក់កាលទី១។
ព័ត៌មានជាតិ ថ្មីៗ
ឯកឧត្តម ក៏បានជំរុញ និងលើកទឹកចិត្តដល់ប្អូនៗដែលត្រូវចូលប្រឡងសញ្ញាបត្រមធ្យមសិក្សាទុតិយភូមិនាពេលនេះ ត្រូវតែយកចិត្តទុកដាក់ខ្ពស់ និងខិតខំសរសេរឱ្យល្អត្រឹមត្រូវទៅលើក្រដាសវិញ្ញាសាមុននឹងឆ្លើយត្រូវគិតត្រិះរិះពិចារណាឱ្យបានគ្រប់ជ្រុងជ្រោយ និងត្រូវខិតខំប្រឹងប្រែងឱ្យអស់ពីសមត្ថភាព ដោយត្រូវគោរពឱ្យបានខ្ជាប់ខ្ជួននូវបទប្បញ្ញត្តិ និងបទបញ្ជាផ្ទៃក្នុងនៃការប្រឡង និងប្រកាន់យកនូវគោលការណ៍ «ចេះជាប់»។
គួររំលឹកថា កាលពីឆ្នាំ២០២៣ កន្លងទៅ ខេត្តសៀមរាប មានបេក្ខជនប្រឡងជាប់និទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ ចំនួន ១៨៨នាក់៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
