ការដាក់ដេញថ្លៃគម្រោងជួសជុលផ្លូវដីក្រាលគ្រួសធម្មជាតិ ២ខ្សែ និងលូកាត់ផ្លូវ ២កន្លែង ក្នុងភូមិបង្កោង និងភូមិត្រពាំងវែង ឃុំក្ដីរុន ស្រុកពួក ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០៩ ខែតុលា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
ប្រធានគណៈកម្មការលទ្ធកម្មឃុំក្ដីរុន លោក វ៉ន វ៉ែន បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំក្ដីរុន បានដាក់ដេញថ្លៃជួសជុលផ្លូវដីក្រាលគ្រួសធម្មជាតិ ២ខ្សែ ប្រវែង១.៤៨០ម៉ែត្រ ទទឹង៤ម៉ែត្រ កម្រាស់០.១៥ម៉ែត្រ ព្រមទាំងដាក់លូការពារផ្លូវទាំង២ និងស្លាកសញ្ញាគម្រោងចំនួន២ ក្នុងតម្លៃប៉ាន់ស្មាន ១១៧.៨១៩.៤៤៩រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន គី ពក ក្នុងតម្លៃ ១១៦.២០០.០០០រៀល។
ជាមួយនឹងការទទួលបានសិទ្ធិនៃការជួសជុលនេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាជួសជុលឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការជួសជុល និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និង រូបថត៖ ហេង វ៉ានី
កែសម្រួល៖ លោក អ៊ុន ណារាជ្យ
