សម្រាប់ដំណើរការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤នេះ គេសង្កេតឃើញថា ក្រុមយុវជនសហភាពសហព័ន្ធយុវជនកម្ពុជា (ស.ស.យ.ក) បានចូលរួមយ៉ាងសកម្មក្នុងការចូលថែរក្សាសណ្ដាប់ធ្នាប់ជាមួយកម្លាំងសមត្ថកិច្ច ដែលការងារនេះបានធ្វើឱ្យសហភាពសហព័ន្ធយុវជនកម្ពុជា បានក្លាយជាភាគីសំខាន់មួយក្នុងសកម្មភាពរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិកាលពីថ្ងៃទី០៨-០៩ ខែតុលា ឆ្នាំ២០២៤កន្លងទៅនេះ។
លោក ខុម ក្រឹម ប្រធានរដ្ឋបាលសហភាពសហព័ន្ធយុវជនកម្ពុជាខេត្ដសៀមរាប បានឱ្យដឹងថា ដោយមានការយកចិត្ដទុកដាក់ពីថ្នាក់នាំ សម្រាប់ដំណើរការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤នេះ ស.ស.យ.ក ខេត្តសៀមរាប ប្រមាណ ៤០០នាក់ បានចូលរួមយ៉ាងសកម្មនៅតាមគោលមណ្ឌលប្រឡងចំនួន១៦មណ្ឌល សម្រាប់រៀបចំកន្លែងផ្ញើម៉ូតូដោយមិនគិតថ្លៃ ព្រមទាំងជួយសម្រួលសណ្ដាប់ធ្នាប់ផងដែរ។
លោកបន្ដថា ក្រុមយុវជនទាំងអស់ បានលះបង់កម្លាំងកាយចិត្ដ ដោយមិនគិតពីការនឿយហត់ និងកម្រៃ ក្នុងការបំពេញការជួយសម្របសម្រួលដល់បេក្ខជន ដើម្បីជួយកាត់បន្ថយក្នុងចំណាយលើការផ្ញើកង់ម៉ូតូ ក៏ដូចជាកុំឱ្យមានការបាត់បង់ម៉ូតូរបស់បេក្ខជន។ ការជួយទទួលផ្ញើកង់ម៉ូតូ ដោយមិនគិតថ្លៃដល់បេក្ខជន គឺការងារមួយសាមញ្ញា ប៉ុន្ដែបើគិតឱ្យបានស៊ីជម្រៅ គឺពួកគាត់មានទឹកចិត្ដចេះជួយគ្នា និងការបណ្ដុះផ្នត់គំនិតឱ្យពួកគាត់ចេះចូលរួមមនុស្សធម៌ក្នុងសង្គម។
បើតាមតំណាងក្រុម សសយក បានឱ្យដឹងថា លោកក៏ដូចក្រុមការងារផ្សេងទៀត ពេញចិត្តចំពោះកិច្ចការមនុស្សធម៌នេះ ដោយលោកយល់ថា ការជួយគ្នាក្នុងកិច្ចការងារសង្គមគឺជាចូលរួមយ៉ាងមានតម្លៃបំផុត ទោះក្រោមកំដៅថ្ងៃ ឬក្រោមដំណក់ទឹកភ្លៀងក៏ដោយ។ លោកថា ក្រុមការងារយុវជន ស.ស.យ.ក បានខិតខំការទទួលផ្ញើកង់ម៉ូតូចាប់តាំងពីមុនប្រឡងមួយថ្ងៃ៕
អត្ថបទ និង រូបថត៖ លោក បូ សាវី
កែសម្រួល៖ លោក អ៊ុន ណារាជ្យ
