មន្ត្រីជាន់ខ្ពស់ក្រសួងបរិស្ថាន បានរំពឹងថា តាមរយៈកម្មវិធីរត់ប្រណាំងនៅភ្នំគូលែន ដែលនឹងប្រារព្ធធ្វើឡើងនៅចុងខែនេះ នឹងជួយជំរុញការផ្សព្វផ្សាយសក្តានុពលទេសចរណ៍បែបធម្មជាតិ នៅភ្នំគូលេនឱ្យកាន់តែល្បីល្បាញបន្ថែមទៀត។
ក្នុងសន្និសីទសារព័ត៌មាន ស្តីពីព្រឹត្តិការណ៍រត់ប្រណាំងនៅភ្នំគូលែន នារសៀលថ្ងៃទី១០ ខែតុលា ឆ្នាំ២០២៤នេះ រដ្ឋលេខាធិការក្រសួងបរិស្ថាន លោកជំទាវ ងិន លីណា មានប្រសាសន៍ថា ភ្នំគូលែន ជាតំបន់ការពារធម្មជាតិដែលគ្រប់គ្រប់ក្រសួងបរិស្ថាន នៅតំបន់នេះមានកន្លែងកម្សាន្តប្រមាណជាង៨០ទីតាំង ដែលសុទ្ធសឹងតែជាកន្លែងមានសក្តានុពលក្នុងការទាក់ទាញអ្នកទេសចរដែលចូលចិត្តដំណើរផ្សងព្រេង ឬទេសចរកីឡា។
ព័ត៌មានជាតិ ថ្មីៗ
លោកជំទាវ មានប្រសាសន៍ទៀតថា សម្រាប់ព្រឹត្តិការណ៍រត់ប្រណាំងនៅភ្នំគូលែន រដូវកាលទី៣ ដែលគ្រោងធ្វើឡើងនៅថ្ងៃទី២៧ ខែតុលា ឆ្នាំ២០២៤ខាងមុខនេះ វាពិតជាបានរួមចំណែកយ៉ាងធំធេងនៅក្នុងការផ្សព្វផ្សាយដល់តំបន់កម្សាន្តទាំងនោះ។ លោកជំទាវថា កាលណាកីឡាករគាត់រត់ទៅដល់ទីតាំងនីមួយៗ គាត់អាចនឹងថតសែលហ្វ៊ី ឬថតរូបភាពផ្សេងៗ បង្ហោះនៅក្នុងបណ្តាញសង្គម ដែលនេះជាផ្នែកមួយក្នុងការជំរុញបង្កើតនូវផលិតផលទេសចរណ៍នៅក្នុងខេត្តសៀមរាបក្រៅប្រាសាទ ហើយវាក៏ផ្តល់ប្រយោជន៍សេដ្ឋកិច្ចមួយផ្នែកធំដល់ប្រជាសហគមន៍នៅតំបន់ភ្នំគូលេននេះផងដែរ។
អ្នករៀបចំកម្មវិធី លោក យ៉ាន់ ផានិត បានឱ្យដឹងថា នៅក្នុងខេត្តសៀមរាប នៅរដូវភ្លៀងមានអ្នកទេសចរមកលេងតិច ដូច្នេះការបង្កើតព្រឹត្តិការណ៍ផ្សេងៗ នៅរដូវភ្លៀង ជាការជំរុញសកម្មភាពទេសចរណ៍ឱ្យរស់រវើកស្របតាមគោលនយោបាយរបស់រាជរដ្ឋាភិបាល ជាពិសេសក្រសួងទេសចរណ៍ក្នុងការធ្វើយ៉ាងណាឱ្យខេត្តសៀមរាប កាន់តែមានភាពរស់រវើកថែមទៀត។ លោកថា សម្រាប់កម្មវិធីរត់ប្រណាំងនេះ ក្រៅពីអ្នករត់អាជីព ប្រជាពលរដ្ឋទូទៅក៏អាចចុះឈ្មោះរត់កម្សាន្តសប្បាយជាលក្ខណៈគ្រួសារ ឬជាមួយសត្វចិញ្ចឹមរបស់ពួកគេបានដែរ៕
អត្ថបទ និង រូបថត ៖ លោក ជា ស្រស់
កែសម្រួល៖ លោក អ៊ុន ណារាជ្យ
