ខេត្ដសៀមរាប ទិន្នផលត្រីក្នុងរយៈពេល៩ខែ ឆ្នាំ២០២៤នេះ ប្រមូលបានចំនួន ៣៥.៦៨៤តោន ដោយនេសាទគ្រួសារមាន ៣០.០៤០តោន និងវាលស្រែ ៥.៦៤៤តោន កើនឡើង ១,២៦ភាគរយ ធៀបនឹងឆ្នាំ២០២៣ ខណៈផលត្រីចិញ្ចឹមសរុបមានចំនួន ២១.៨៤១តោន សម្រាប់ប្រើប្រាស់ក្នុងស្រុក និងនាំចេញ។
ក្នុងកិច្ចប្រជុំបូកសរុបលទ្ធផលការងារពាក់ព័ន្ធនឹងការទប់ស្កាត់បទល្មើសនេសាទ ក្នុងរដូវបិទនេសាទ ឆ្នាំ២០២៤ ក្នុងភូមិសាស្ត្រខេត្តសៀមរាប នៅថ្ងៃទី១៤ ខែតុលា ឆ្នាំ២០២៤នេះ លោក ធិននី សុទ្ធី នាយខណ្ឌជលផលខេត្ដសៀមរាប បានបញ្ជាក់ថា ទន្ទឹមនឹងផលត្រីដែលមានការកើនឡើងនេះ ក្រុមការងារក៏នៅតែបន្តចុះត្រួតពិនិត្យ តាមដាន ស្រាវជ្រាវ និងបង្ក្រាបបទល្មើសជលផលជាប្រចាំ ដោយក្នុងរយៈពេល៩ខែ ឆ្នាំ២០២៤នេះ បានបង្ក្រាបបទល្មើសជលផលចំនួន ៣០២ករណី ដោយបានបំផ្លាញចោលវត្ថុតាងនៅនឹងកន្លែង និងបានបំពេញសំណុំរឿងទៅសាលាដំបូងខេត្ត តាមនីតិវិធីច្បាប់ផងដែរ។
មានប្រសាសន៍ក្នុងឱកាសនោះ លោក អុឹង គឹមលាង អភិបាលរងខេត្ដសៀមរាប បានស្នើឱ្យស្ថាប័នពាក់ព័ន្ធ ចូលរួមសហការគ្នា ទប់ស្កាត់ និងបង្ក្រាបនូវរាល់បទល្មើសជលផលដែលបានកើតឡើងនៅតាមភូមិសាស្ដ្ររបស់ខ្លួន ឱ្យបានជាប់ជាប្រចាំ ដើម្បីរក្សាបាននូវកំណើនផលត្រី។ ចំពោះអាជ្ញាធរពាក់ព័ន្ធ ត្រូវផ្សព្វផ្សាយ និងចាត់វិធានការប្រមូលនូវឧបករណ៍នេសាទខុសច្បាប់ ជាពិសេសឧបករណ៍ឆក់នៅតាមផ្ទះរបស់ប្រជាពលរដ្ឋ ដោយធ្វើកិច្ចសន្យាបញ្ឈប់ការធ្វើនេសាទ។
លោកអភិបាលរងខេត្ត ក៏បានជំរុញដល់អាជ្ញាធរស្រុកជាប់បឹងទន្លេសាប ត្រូវគ្រប់គ្រង និងហាមឃាត់ដាច់ខាត ចំពោះអ្នកធ្វើអាជីវកម្ម ផលិតឧបករណ៍នេសាទខុសច្បាប់លក់ឱ្យអ្នកនេសាទ ដែលនេះជាការចូលរួមទប់ស្កាត់បទល្មើសនេសាទផងដែរ។ ដោយឡែក រដ្ឋបាលជលផល ក៏ដូចជាស្ថាប័នពាក់ព័ន្ធ ត្រូវចូលរួមគ្រប់គ្រងតំបន់អភិរក្ស ដើម្បីឱ្យក្លាយជាកន្លែងមានចំណូលសេដ្ឋកិច្ចផ្នែកវិស័យទេសចរណ៍ និងត្រូវរៀបចំស្ថានីយភ្ញាស់ត្រីឡើងវិញផងដែរ៕
អត្ថបទ និង រូបថត៖ លោក បូ សាវី
កែសម្រួល៖ លោក អ៊ុន ណារាជ្យ
