ថ្លែងក្នុងកិច្ចប្រជុំប្រចាំឆមាសទី១ ត្រីមាសទី៣ ឆ្នាំ២០២៤ និងទិសដៅអនុវត្តបន្ត របស់ក្រុមការងារគណៈកម្មការក្រុមប្រឹក្សាសកម្មភាពជនពិការខេត្តសៀមរាប (ក.ស.ជ.ខ) នៅថ្ងៃទី១៤ ខែតុលា ឆ្នាំ២០២៤នេះ លោក នាក់ ណេរ៉ុន អភិបាលរងខេត្តសៀមរាប និងជាប្រធានក្រុមប្រឹក្សាសកម្មភាពជនពិការខេត្ត បានជំរុញឱ្យអ្នកពាក់ព័ន្ធទាំងអស់ ត្រូវបន្តសហការគ្នាក្នុងការប្រមូល និងគ្រប់គ្រងទិន្នន័យធ្វើសមាហរណកម្ម ចំពោះជនមានពិការមួយចំនួន ដែលដើរអនាធិបតេយ្យតាមទីសាធារណៈ គ្មានអាសយដ្ឋានជាក់លាក់។
លោក នាក់ ណេរ៉ុន ក៏បានណែនាំដល់ក្រុមការងារទាំងអស់ ត្រូវបន្តបណ្តុះបណ្តាល និងផ្សព្វផ្សាយបន្ថែមដល់រដ្ឋបាលក្រុងស្រុក មន្ទីរអង្គភាព ឃុំសង្កាត់ សាលារៀន គ្រឹះស្ថានសាធារណៈរបស់រដ្ឋមួយចំនួន ឱ្យមានហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាព។ ពិសេសត្រូវបន្តផ្តល់គ្រឿងឧបភោគ បរិភោគ ជូនជនមានពិការភាព មានជីវភាពខ្វះខាត និងផ្សព្វផ្សាយដំណឹងស្វែងរកការងារធ្វើជូនជនមានពិការភាព បន្តជំរុញស្ថាប័នរដ្ឋ វិស័យឯកជន រោងចក្រ សហគ្រាស ទទួលយកជនពិការភាពចូលបម្រើការងារ និងផ្តល់លក្ខខណ្ឌការងារសមរម្យជូនពួកគាត់ ហើយត្រូវពិនិត្យ និងឆ្លើយតប រាល់បញ្ហា សំណូមពរផ្សេងៗរបស់ជនមានពិការភាពឱ្យបានទាន់ពេលវេលា។ ជាមួយនោះ លោកក៏បានសម្ដែងនូវការកោតសរសើរ ចំពោះការខិតខំប្រឹងប្រែង និងការសហការគ្នាបានល្អរបស់ក្រុមការងារ ក្នុងការអនុវត្តសកម្មភាពការងារក្នុងត្រីមាសទី៣នេះ ប្រកបដោយរលូន និងទទួលបានលទ្ធផលល្អប្រសើរ។
បើតាម លោក បឹង ពេជ្រ អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានឱ្យដឹងថា សម្រាប់ត្រីមាសទី៣ នៃឆមាសទី១នេះ ក្រុមការងារបានកំណត់អត្តសញ្ញាណកម្មជនមានពិការភាពតាមគំរូសង្គម និងសិទ្ធិជាមូលដ្ឋានចំនួន ១០០ឃុំសង្កាត់ ដោយធ្វើការសម្ភាសន៍បានចំនួន ២៧៨នាក់ ដោយមានពិការភាពកាយសម្បទា ១៣នាក់ ពិការភាពកាយញ្ញាណដឹង ៨០នាក់ និងពិការភាពសតិបញ្ញា ២៦នាក់ ពិការភាពផ្លូវចិត្ត ២នាក់ និងពិការភាពផ្សេងៗ ២០នាក់ ហើយតាមរយៈការស្វែងរកសេវាគាំទ្រ ក្រុមការងារបានបញ្ជូនទៅគ្រួសារក្នុងសហគមន៍វិញបានចំនួន ៨៤នាក់។
លោកបានឱ្យដឹងទៀតថា ចំពោះមជ្ឈមណ្ឌលស្តារលទ្ធភាពពលកម្ម បានបំពាក់ជើងសិប្បនិម្មិតក្រោមជង្គង់ចំនួន ៣៦គ្រឿង លើជង្គង ៥គ្រឿង ផ្តល់ឈើច្រត់ទល់ឃ្លៀក ១១១គ្រឿង ឈើច្រត់កំភួនដៃ ៩៣គ្រឿង បំពាក់រណបជើង និងដៃ ៤គ្រឿង បំពាក់ដៃសិប្បនិម្មិត ៤គ្រឿង និងបានផ្តល់រទះរុញគ្រប់ប្រភេទចំនួន៣២គ្រឿង រទេះត្រាយស៊ីខោ ៣គ្រឿង បានជួសជុលឈើច្រត់គ្រប់ប្រភេទចំនួន ៦៣គ្រឿង ជួសជុលជើងគ្រប់ប្រភេទចំនួន ២០៦គ្រឿង ជួសជុលរណបគ្រប់ប្រភេទ ១១គ្រឿង ជួសជុលរទេះរុញចំនួន ១៩គ្រឿង ថែមទាំងបានផ្តល់សេវាជួសជុលចល័តចំនួន ៣៣៤នាក់ និងអ្នកជំងឺមកព្យាបាលដោយចលនាចំនួន ៩៧នាក់ផងដែរ៕
អត្ថបទ និង រូបថត៖ លោក ស៊ុំ គីន
កែសម្រួល៖ លោក អ៊ុន ណារាជ្យ
