នៅថ្ងៃទី១៦ ខែតុលា ឆ្នាំ២០២៤នេះ ជាខួបគម្រប់ ០១ឆ្នាំ នៃការបើកដំណើរការជាផ្លូវការ នៃអាកាសយានដ្ឋានអន្តរជាតិសៀមរាបអង្គរ ដែលស្ថិតនៅក្នុងស្រុកសូទ្រនិគម ខេត្តសៀមរាប។ ទន្ទឹមនោះ អាកាសយានដ្ឋានអន្តរជាតិកម្រិត 4E នេះ បានបង្ហាញថា មានអ្នកដំណើរ ហោះហើរចេញ និងចូល ជាង ១ ៣០០ ០០០នាក់ និងរំពឹងថាកើនដល់ ១ ៥០០ ០០០នាក់ នៅដំណាច់ឆ្នាំ២០២៤នេះ។
របាយការណ៍ដដែលនេះ ក៏បានបង្ហាញផងដែរថា ក្រៅពីកសាងហេដ្ឋារចនាសម្ព័ន្ធលើផ្ទៃដីទំហំ ៧០០ ហិកតា អាកាសយានដ្ឋានអន្តរជាតិសៀមរាបអង្គរ ក៏មានដីបម្រុងប្រមាណ ១០០០ហិកតា សម្រាប់ការកសាង តំបន់អភិវឌ្ឍពហុបំណង (សេដ្ឋកិច្ច-ទេសចរណ៍-កសិកម្ម-ឧស្សាហកម្ម) ដែលជាតំបន់រណបហៅថា «ទីក្រុងអាកាសយានដ្ឋាន ឬ Airport City» នាពេលខាងមុខ។
សមិទ្ធផលមួយ ដែលកើតចេញពីគំនិតផ្ដួចផ្ដើម “ខ្សែក្រវ៉ាត់ និងផ្លូវ” នេះ សម្ដេចធិបតី ហ៊ុន ម៉ាណែត បានទាញការចាប់អារម្មណ៍ថា ខេត្តសៀមរាប មិនត្រឹមតែមានសក្ដានុពលើវិស័យទេសចរណ៍នោះទេ តែបណ្ដាស្រុកដែលនៅជាប់ អាកាសយានដ្ឋានអន្តរជាតិ សៀមរាប អង្គរ អាចនឹងអភិវឌ្ឍជាតំបន់ឧស្សាហកម្ម ក្នុងកម្រិតណាមួយ។
