អាជ្ញាធរខេត្តសៀមរាប បានជំរុញឱ្យមន្ត្រីពាក់ព័ន្ធទាំងអស់ យកចិត្តទុកដាក់លើការងារគ្រប់គ្រងឱ្យច្បាស់លាស់លើការចុះបញ្ជីដីធ្លីនៅដីតំបន់៣ និងតំបន់២ នៃបឹងទន្លេសាប ជាពិសេសការស្នើសុំចុះបញ្ជីដីធ្លីតំបន់បុរាណដ្ឋានរបស់អាជ្ញាធរជាតិអប្សរា និងការចុះបញ្ជីដីធ្លីជាលក្ខណៈប្រព័ន្ធជូនប្រជាពលរដ្ឋឱ្យបានរួចរាល់ នៅឆ្នាំ២០២៥ខាងមុខ។
ក្នុងឱកាសបិទសន្និបាតបូកសរុបលទ្ធផលការងារឆ្នាំ២០២៤ និងទិសដៅឆ្នាំ២០២៥ របស់មន្ទីររៀបចំដែនដី នគរូបនីយកម្ម និងសំណង់ ខេត្តសៀមរាប នៅរសៀលថ្ងៃទី១៦ ខែតុលា ឆ្នាំ២០២៤ លោក ហែន ពុទ្ធី អភិបាលរងខេត្តសៀមរាប បានវាយតម្លៃខ្ពស់ ចំពោះមន្ត្រីពាក់ព័ន្ធនៃមន្ទីររៀបចំដែនដីខេត្តសៀមរាប ដែលជាសេនាធិការឱ្យក្រសួងរៀបចំដែនដី ក្នុងការអនុវត្តការងារចុះបញ្ជីដីធ្លីជូនប្រជាពលរដ្ឋកន្លងមក ទទួលបានលទ្ធផលផ្លែផ្កាគួរគត់សម្គាល់។ ការសម្រេចបាននេះដែរ ស្របតាមផែនការយុទ្ធសាស្ត្រអភិវឌ្ឍជាតិ និងយុទ្ធសាស្ត្ររបស់រាជរដ្ឋាភិបាលកម្ពុជា ដែលត្រូវបានជំរុញ និងលើកកម្ពស់ការគាំទ្ររដ្ឋបាលថ្នាក់ក្រោមជាតិ ក្នុងគោលដៅធានាការប្រើប្រាស់ដី ការអភិវឌ្ឍដី និងការគ្រប់គ្រងដី តាមផែនការរៀបចំដី និងផែនការប្រើប្រាស់ដី ប្រកបដោយសមធម៌ សមភាពយេនឌ័រ ព្រមទាំងការពារ និងគាំទ្រដល់ជីវភាពរស់នៅ របស់ប្រជាពលរដ្ឋគ្រប់លំដាប់ថ្នាក់ ដើម្បីឆ្លើយតបឱ្យបានត្រឹមត្រូវមានប្រសិទ្ធភាព និងស្របតាមល្បឿននៃការអភិវឌ្ឍខេត្ត ប្រទេសជាតិ និងកំណើនប្រជាជនក្នុងខេត្ត។
លោកអភិបាលរងខេត្ត បានស្នើដល់អាជ្ញាធរមូលដ្ឋាន និងមន្ទីរពាក់ព័ន្ធ ចូលរួមសហការជាមួយមន្ទីរជំនាញឱ្យបានកាន់តែប្រសើរថែមទៀត ដើម្បីផ្តល់សេវាជូនប្រជាពលរដ្ឋឱ្យកាន់តែមានប្រសិទ្ធភាព ស្របតាមគោលនយោបាយរបស់ក្រសួងរៀបចំដែនដី ការចុះបញ្ជីដីបង្ហើយ បរិយាកាសគ្មានវិវាទ និងការផ្តល់សេវាគាប់ចិត្តជូនដល់ប្រជាពលរដ្ឋ ស្របនឹងការងារចុះបញ្ជីដីធ្លីជាលក្ខណៈប្រព័ន្ធជូនប្រជាពលរដ្ឋឱ្យបានរួចរាល់ នៅឆ្នាំ២០២៥ខាងមុខ។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តសៀមរាប បានបញ្ជាក់ថា វិស័យរៀបចំដែនដី និងនគរូបនីយកម្ម បានដើរតួយ៉ាងសំខាន់ក្នុងការចូលរួមចំណែកអភិវឌ្ឍប្រទេសជាតិ គឺមានគោលដៅរៀបចំទីក្រុង រៀបចំប្លង់គោលប្រើប្រាស់ដីរាជធានីខេត្ត និងផែនការប្រើប្រាស់ដីថ្នាក់ឃុំសង្កាត់ ដើម្បីការអនុវត្តការប្រើប្រាស់ដីឱ្យចំទិសដៅ និងមានប្រសិទ្ធភាព ដោយផ្អែកលើបទប្បញ្ញត្តិជាច្រើននៅកម្ពុជា។ ក្នុងទិសដៅអនុវត្តបន្តឆ្នាំ២០២៥ លើការរៀបចំតំបន់រមណីយដ្ឋានអង្គរ និងបន្តការចុះបញ្ជីដីតំបន់បុរាណដ្ឋានមានចំនួន ១១.៥៥៩កន្លែងបុរាណដ្ឋាន តាមការស្នើសុំចុះបញ្ជីរបស់អាជ្ញាធរជាតិអប្សរា៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
