នៅថ្ងៃទី២០ ខែតុលានេះ ប្រជាពុទ្ធបរិស័ទជិតឆ្ងាយ បានធ្វើការដង្ហែអង្គកឋិនទានចូលទៅកាន់វត្តវត្តបុព្វទិសារាម ស្ថិតក្នុងឃុំកំពង់ក្ដី ស្រុកជីក្រែង ខេត្តសៀមរាប ដើម្បីចូលរួមជួយទ្រទ្រង់ដល់វិស័យព្រះពុទ្ធសាសនា និងទំនុកបម្រុងដល់ព្រះភិក្ខុសង្ឃដែលគង់ចាំវស្សាអស់រយៈពេលបីខែកន្លងមក។
ព្រះបវរវិជ្ជា ទេព ភឿន ព្រះគ្រូសារធម្មបាល ព្រះវិន័យធរគណខេត្ត និងជាចៅអធិការវត្តបុព្វទិសារាម បង្ហាញថា បច្ច័យដែលទទួលបានពីអង្គកឋិននៅឆ្នាំនេះ សរុបចំនួនជាង ៦០លានរៀល។ បច្ច័យទាំងនេះ គណៈកម្មការវត្ត គ្រោងនឹងរៀបចំ បែងចែកទុកផ្គត់ផ្គង់ចង្ហាន់ប្រចាំថ្ងៃព្រះសង្ឃ និងមួយចំនួនធំយកទៅទិញសម្ភារៈ សាងសង់អគារមហាកុដិមួយខ្នងស្ថិតក្នុងបរិវេណវត្ត ខណៈអគារនេះចាប់កសាងតាំងពីឆ្នាំ២០១៩ និងបច្ចុប្បន្នសាងសង់បានប្រហែល៤០ភាគរយ។
ព្រះបវរវិជ្ជា ទេព ភឿន បានសម្តែងនូវព្រះទ័យសោមនស្សសាទរ ចំពោះសទ្ឋាជ្រះថ្លារបស់ប្រជាពុទ្ឋបរិស័ទជិតឆ្ងាយដែលបានស្រុះស្រួលគ្នាដង្ហែអង្គកឋិននេះឡើង ដែលបញ្ជាក់ឱ្យឃើញពីស្មារតីសាមគ្គី ក្នុងការជួយគ្នាទ្រទ្រង់ព្រះពុទ្ធសាសនាឱ្យបានចម្រើនរុងរឿងគង់វង្សនៅយូរអង្វែង និងជាផ្តល់កម្លាំងកាយចិត្ត ដល់ព្រះភិក្ខុសង្ឃ ជាសាសនទាយាទបន្តអាយុព្រះពុទ្ធសាសនាតទៅមុខទៀត។
គួរជម្រាបថា កឋិនទាន ឬ រដូវបុណ្យកឋិន មានរយៈពេល ២៩ថ្ងៃ គឺចាប់ពីខែអស្សុជ ១៤ថ្ងៃ ពីត្រឹម១រោច ដល់១៤រោច (ខែដាច់) រហូតដល់ខែកត្តិក ១៥ថ្ងៃ ចាប់ពីថ្ងៃ ១កើត ដល់១៥កើត(ពេញបូណ៌មី)។ ក្នុងរយៈពេល ២៩ថ្ងៃនេះ ប្រជាពុទ្ធបរិស័ទ អាចដង្ហែអង្គកឋិនទាននៅថ្ងៃណាក៏បាន ប៉ុន្តែមិនអាចដង្ហែទៅកាន់វត្តដែលទទួលបានអង្គកឋិន រួចហើយនោះទេ ពោលគឺក្នុងមួយវត្ត ទទួលបានកឋិនទាន តែម្ដងប៉ុណ្ណោះ។
អត្ថបទ និងរូបភាព: យូ វង្ស
កែសម្រួល: មន្ទីរព័ត៌មានខេត្តសៀមរាប
