រសៀលថ្ងៃទី២១ ខែតុលា ឆ្នាំ២០២៤ គណៈកម្មការប្រយុទ្ធប្រឆាំងអំពើមនុស្សខេត្តសៀមរាប (គ.ខ.ប.ជ) បានសហការជាមួយមន្ទីរធម្មការ និងសាសនាខេត្ត ដោយមានការគាំទ្រពីរដ្ឋបាលសាលាខេត្តសៀមរាប រួមនឹងអង្គការដៃគូ បានរៀបចំទិវាជាតិអន្តរសាសនាប្រឆាំងការជួញដូរមនុស្សលើកទី៨ ឆ្នាំ២០២៤ ក្រោមប្រធានបទ “ការអប់រំសីលធម៌តាមវិស័យសាសនា បង្ការទប់ស្កាត់អំពើជួញដូរមនុស្សក្នុងសម័យឌីជីថល” ដោយមានការចូលរួមពីថ្នាក់ដឹកនាំខេត្ត មន្ទីរអង្គភាព និងអ្នកពាក់ព័ន្ធជាច្រើនរូប។
លោកស្រី ម៉ន់នី រង្សី អភិបាលរងខេត្ត និងជាអនុប្រធានអចិន្ត្រៃយ៍ គ.ខ.ប.ជ មានប្រសាសន៍ថា សកម្មភាពនៃការឆបោក និងជួញដូរមនុស្សតាមប្រព័ន្ធឌីជីថលនាសម័យបច្ចុប្បន្ន គឺកំពុងបន្តកើតមានឡើងយ៉ាងគួរឱ្យកត់សម្គាល់ តាមគ្រប់ទម្រង់ និងគ្រប់រូបភាព ដោយជនល្មើសតែងតែមានមធ្យោបាយ និងវិធីសាស្ត្រប្លែកៗ និងថ្មីៗជានិច្ច។ ហេតុនេះទើបក្រុមការងារប្រយុទ្ធប្រឆាំងអំពើជួញដូរមនុស្សបានកំណត់យកការចូលរួមពីគ្រប់វិស័យសាសនាទាំងអស់ ជាអាទិភាពមួយក្នុងការជួយបង្ការការទប់ស្កាត់ ហើយយកមកធ្វើជាយុទ្ធសាស្ត្រចម្បង ដើម្បីបង្ការអំពើជួញដូរមនុស្ស បង្កភាពងាយរងគ្រោះដល់មនុស្សគ្រប់វ័យ គ្រប់ស្ថានភាព ដោយធ្វើការបណ្តុះស្មារតីតាមរយៈសាសនានេះ។
ព័ត៌មានជាតិ ថ្មីៗ
លោកស្រី ម៉ន់នី រង្សី មានប្រសាសន៍ទៀតថា កត្តានេះក៏ជាផ្នែកមួយសំខាន់ក្នុងការបង្ហាញពីកិច្ចសហប្រតិបត្តិការជាធ្លុងមួយពីសំណាក់មេដឹកនាំ និងសាសនិក នៃសាសនានានា ក្នុងបរិបទសង្គមប្រកបដោយសុខសន្តិភាព តាមរយៈអនុវត្តសកម្មភាពដើម្បីសម្រេចគោលបំណងរួម គឺបង្ការទប់ស្កាត់សំដៅលុបបំបាត់អំពើជួញដូរមនុស្សគ្រប់ទម្រង់ និងជាការបញ្ជាក់ពីគោលជំហរ និងការប្តេជ្ញាចិត្តដ៏មុតមាំរបស់រាជរដ្ឋាភិបាលកម្ពុជា ក្នុងកិច្ចខិតខំប្រឹងប្រែងប្រយុទ្ធប្រឆាំងអំពើជួញដូរមនុស្សទាំងនៅក្នុងប្រទេសកម្ពុជាកម្រិតតំបន់ និងកម្រិតអន្តរជាតិផងដែរ។
លោកស្រីបន្តថា ការជួញដូរមនុស្ស គឺជាការងារមួយដែលរាជរដ្ឋាភិបាលបានយកចិត្តទុកដាក់ខ្ពស់ ក្នុងនោះបានដាក់ចេញនូវផែនការយុទ្ធសាស្ត្រ ដោយមានគោលការណ៍ចំនួន៣ គឺទី១.សង្គ្រោះជនរងគ្រោះឱ្យបានទាន់ពេលវេលា ,ទី២.ស៊ើបអង្កេតរកជនល្មើស និងបក្ខពួកមេខ្លោង យកមកផ្តន្ទាទោសតាមច្បាប់ដោយគ្មានលើកលែង និងទី៣.ត្រួតពិនិត្យប្រមូលភ័ស្តុតាង ដើម្បីបិទអាជីវកម្មខុសច្បាប់ដែលពាក់ព័ន្ធ និងសម្អាតប្រាក់របស់ជនល្មើស។ លោកស្រីក៏បានសំណូមពរដល់គ្រប់អ្នកពាក់ព័ន្ធទាំងអស់ ចូលរួមជាមួយរាជរដ្ឋាភិបាលក្នុងការអនុវត្តផែនការសម្មភាពប្រឆាំងអំពើជួញដូរមនុស្សនេះឱ្យបានគ្រប់ៗគ្នា ដើម្បីរក្សាឱ្យបាននូវកិត្យានុភាព និងសន្តិភាព ដែលកម្ពុជាយើងកំពុងខិតខំកសាងសម្រាប់ប្រជាពលរដ្ឋ អ្នកវិនិយោគ និងអ្នកទេសចរ។
បើតាម លោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប បានឱ្យដឹងថា ទិវាជាតិអន្តរសាសនាប្រឆាំងអំពើជួញដូរមនុស្ស បានចាប់ផ្តើមប្រារព្ធធ្វើឡើងតាំងពីឆ្នាំ២០១៧មកម្ល៉េះ ក្រោមការផ្តួចផ្តើមរបស់ គ.ប.ជ អង្គការការីតាស់កម្ពុជា មេដឹកនាំសាសនាធំៗទាំងបី ដោយឯកភាពគ្នារៀបចំឡើង។ ដោយឡែកសម្រាប់ខេត្តសៀមរាប គ.ខ.ប.ជ បានសហការជាមួយមន្ទីរធម្មការ និងសាសនាខេត្តសៀមរាប ក៏បានរៀបចំទិវាជាតិអន្តរសាសនាតាមរយៈនៃការជួបជុំលក្ខណៈទ្រង់ទ្រាយតូចៗ និងបានជូនដំណឹងទៅដល់បណ្តាសាសនានានាៗ ក្នុងការចូលរួមទូងស្គរ គោះជួង គោះរគាំង កងរំពង ទៅតាមគ្រប់អារាម និងវិហារសាសនាទូទាំងខេត្ត និងមានការផ្សព្វផ្សាយនូវបទយកការណ៍អមដោយរបាយការណ៍ និងការប្តេជ្ញាចិត្តរបស់រាជរដ្ឋាភិបាល ក្នុងការប្រយុទ្ធប្រឆាំងអំពើជួញដូរមនុស្សជារៀងរាល់ឆ្នាំផងដែរ៕
អត្ថបទ និង រូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
