នាព្រឹកថ្ងៃទី២១ ខែតុលា ឆ្នាំ២០២៤នេះ នាយទាហាន នាយទាហានរង និងពលទាហាន ដែលត្រូវចូលនិវត្តន៍ជាង ៤១៣នាក់ មកពីបណ្ដាអង្គភាពចំណុះទីបញ្ជាការយោធភូមិភាគទី៤ ត្រូវបានបំពាក់ឋានន្តរសក្ដិ និងគ្រឿងឥស្សរិយយស ដែលពិធីនេះធ្វើឡើងនៅទីបញ្ជាការយោធភូមិភាគទី៤ ខេត្ដសៀមរាប ក្រោមអធិបតីភាព ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ និង លោក អុឹង គឹមលាង អភិបាលរងខេត្តសៀមរាប។
ឯកឧត្ដម ឧត្ដមសេនីយ៍ឯក ពៅ ហេង មានប្រសាសន៍ថា យោធិនដែលត្រូវចូលសោធននិវត្តន៍នៅពេលនេះ គឺជាអ្នកដែលបានចូលរួមធ្វើពលិកម្មដ៏ធំធេងក្នុងការរំដោះប្រទេសជាតិបានផ្តួលរំលំ និងទប់ស្កាត់ការវិលត្រឡប់មកវិញ នូវរបបប្រល័យពូជសាសន៍ ប៉ុល ពត និងបានចូលរួមយ៉ាងសកម្មក្នុងចលនាបង្រួបបង្រួមជាតិតាមរយៈនយោបាយ ឈ្នះ ឈ្នះ ដែលនាំមកនូវសុខសន្តិភាពការឯកភាពជាតិ និងការអភិវឌ្ឍប្រទេសជាតិឲ្យរីកចម្រើនមកដល់សព្វថ្ងៃនេះ។ ចំពោះការបំពាក់ឋានន្តរសក្តិនាពេលនេះ គឺតាមគោលនយោបាយរបស់រាជរដ្ឋាភិបាល តែងតែយកចិត្តទុកដាក់គិតគូរដល់បងប្អូនយោធិនចូលសោធននិវត្តន៍ ឈរលើគោលការណ៍ផ្តល់កិត្តិយស លើកទឹកចិត្ត តបស្នងសងគុណ និងដើម្បីលើកស្ទួយជីវភាពបងប្អូនឱ្យកាន់តែប្រសើរឡើង នៅពេលពួកគាត់វិលត្រឡប់ទៅរួមរស់នៅក្នុងជីវភាពជាជនសុីវិលវិញ។
ឯកឧត្ដម ពៅ ហេង មានប្រសាសន៍ទៀតថា គោលនយោបាយរបស់រាជរដ្ឋាភិបាល តែងតែយកចិត្តទុកដាក់គិតគូរពីសុខទុក្ខយោធិនគ្រប់ពេលវេលា ទោះបីកំពុងបំពេញភារកិច្ច ពេលចូលនិវត្តន៍ ឬក្រោយចូលនិវត្តន៍ក្តី ហើយក៏មិនអាចបំភ្លេចបានចំពោះការលះបង់របស់បងប្អូន ដែលបានរួមចំណែកធ្វើពលិកម្មយ៉ាងធំធេងក្នុងបុព្វហេតុជាតិមាតុភូមិ និងប្រជាជន។ ក្រោមគោលនយោបាយ ឈ្នះ ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្ត្រី និងដឹកនាំបន្តសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន បានដាក់ចេញនូវយុទ្ធសាស្ត្របញ្ចកោណដំណាក់កាលទី១ និងគោលនយោបាយដ៏ត្រឹមត្រូវ ប្រទេសជាតិមានសុខសន្តិភាព និងការឯកភាពជាតិពេញលេញមានការអភិវឌ្ឍរីកចម្រើនលើគ្រប់វិស័យ និងមានកិត្យានុភាពជាតិល្បីរន្ទឺលើឆាកអន្តរជាតិស្មើមុខស្មើមាត់ជាមួយប្រទេសក្នុងតំបន់ និងនៅលើពិភពលោក។
ឯកឧត្ដម មានប្រសាសន៍បន្ថែមថា គ្រប់ការអភិវឌ្ឍន៍ទៅបាន គឺពិតជាមិនអាចកាត់ផ្តាច់ចេញពីកត្តាសន្តិភាពបានឡើយ ព្រោះថាបើប្រទេសជាតិមានសង្គ្រាម យើងមិនអាចកសាង និងអភិវឌ្ឍន៍ឱ្យរីកចម្រើនបានដូចសព្វថ្ងៃនេះទេ ហើយក៏មិនអាចមានឱកាស ជួបជុំគ្នាដូចថ្ងៃនេះដែរ។ សុខសន្តិភាពដែលបានមកដល់សព្វថ្ងៃនេះពិតជាបានមកដោយលំបាកខ្លាំងណាស់ គឺបានមកដោយមានការលះបង់ សាច់ស្រស់ឈាមស្រស់ពីយុទ្ធមិត្តអ្នកស្នេហាជាតិ និងបងប្អូនទាំងអស់៕
អត្ថបទ និងរូបថត៖ លោក បូ សាវី
កែសម្រួល៖ លោក អ៊ុន ណារាជ្យ
