អស់រយៈកាល ៣ខែនៃការគង់ចាំវស្សា ក្នុងរដូវកាលកឋិនទាន វត្តព្រះព្រហ្មរ័ត្ន ស្ថិតក្នុងក្រុងសៀមរាប បានទទួលការដង្ហែអង្គកឋិនសាមគ្គិ ដែលមានពុទ្ធបរិស័ទយ៉ាងច្រើនកុះករ ប្រកបដោយទឹកមុខសប្បាយរីករាយ និងរួមមានបច្ច័យ ដើម្បីរួមចំណែកលើកកម្ពស់វិស័យព្រះពុទ្ធសាសនា និងទ្រទ្រង់ដល់ព្រះសង្ឃផងដែរ។
ព្រះសនសត្ថា តង់ តន ព្រះបាឡាត់គណខេត្ត និងជាព្រះគ្រូចៅអធិការវត្តព្រះព្រហ្មរ័ត្ន មានថេរដីកាថា អង្គកឋិនទានឆ្នាំនេះ វត្តព្រះព្រហ្មរ័ត្ន ទទួលបានបច្ច័យជាង ៤៧លានរៀល ក្រៅពីការលៃលកសម្រាប់ចង្ហាន់ព្រះសង្ឃ បច័្ចយមួយចំនួនធំត្រូវបែងចែកយកទៅជួសជុលកែលម្អគរុភ័ណ្ឌក្នុងវត្ត រួមមាន កុដិ សាលា ទីសេនាសនសង្ឃ និងរៀបចំបរិស្ថាន សួនច្បារ។
ចំពោះការ ធ្វើបុណ្យកឋិននេះដែរ ព្រះសនសត្ថា តង់ តន បញ្ជាក់ថា តាមពុទ្ធានុញ្ញាត កឋិនកាលមានរយៈពេល ២៩ថ្ងៃ ដែលប្រជាពុទ្ធបរិស័ទអាចធ្វើនៅថ្ងៃណាក៏បាន ប៉ុន្តែក្នុងមួយវត្ត អាចទទួលការដង្ហែអង្គកឋិនចូល បានតែម្ដងប៉ុណ្ណោះ។ ព្រះអង្គបន្ថែមថា ចំពោះបុគ្គលដែលធ្វើបុណ្យកឋិន គប្បីធ្វើឲ្យត្រូវតាមរបៀបវិន័យព្រះពុទ្ធសាសនា ទើបកើតជាកឋិនពេញលក្ខណៈ រីឯអានិសង្ស ដែលទាយក-ទាយិកាទទួល បានក៏ច្រើនទៅតាមកម្លាំងសទ្ធានោះ ដោយឡែក ភិក្ខុសង្ឃ ជាអ្នកទទួលក្រាលគ្រង និងអនុមោទនា ក៏បានអានិសង្ស៥យ៉ាងផងដែរ។
គួរជម្រាបថា កឋិនទាន ឬ រដូវបុណ្យកឋិន មានរយៈពេល ២៩ថ្ងៃ គឺចាប់ពីខែអស្សុជ ១៤ថ្ងៃ ពីត្រឹម១រោច ដល់១៤រោច (ខែដាច់) រហូតដល់ខែកត្តិក ១៥ថ្ងៃ ចាប់ពីថ្ងៃ ១កើត ដល់១៥កើត(ពេញបូណ៌មី)។
អត្ថបទ និងរូបភាព: ទ្រា ពន្លឺ
កែសម្រួល: មន្ទីរព័ត៌មានខេត្តសៀមរាប
