នៅព្រឹកថ្ងៃទី០៩ ខែតុលា ឆ្នាំ២០២៤នេះ វិញ្ញាបនបត្រសម្គាល់ម្ចាស់អចលនវត្ថុ ឬបណ្ណកម្មសិទ្ធិចំនួន២.៩៨៨ក្បាលដី ស្ថិតក្នុងភូមិចំនួន៤ នៃស្រុកក្រឡាញ់ ខេត្តសៀមរាប ត្រូវបានអាជ្ញាធរខេត្ត ប្រគល់ជូនពលរដ្ឋជាម្ចាស់កម្មសិទ្ធិយកទៅប្រើប្រាស់ជាផ្លូវការ នៅក្នុងបរិវេណវត្តក្រឡាញ់ ក្រោមវត្តមាន លោក ហែន ពុទ្ធី អភិបាលរងខេត្តសៀមរាប និង លោក ប៊ូ ជុំសម្បត្តិ អនុប្រធានមន្ទីររៀបចំដែនដីខេត្តសៀមរាប ដោយមានការចូលរួមពីអាជ្ញាធរមូលដ្ឋាន និងអ្នកពាក់ព័ន្ធជាច្រើនរូប។
លោក ប៊ូ ជុំសម្បត្តិ បញ្ជាក់ថា បណ្ណដែលផ្ដល់ជូនបងប្អូននាពេលនេះ មន្រ្តីជំនាញបានធ្វើដោយប្រុងប្រយ័ត្ន និងទទួលខុសត្រូវខ្ពស់ រហូតបានផ្ដល់ជូនដល់បងប្អូននាពេលនេះ។ ការផ្ដល់ជូននេះដែរ គឺសម្រាប់ភូមិចំនួន៤ នៃស្រុកក្រឡាញ់ មានភូមិតាច្រែង ភូមិអូរក្រឡាញ់ ភូមិកោះក្របៅ និងភូមិសំពៅលូន ដែលមានក្បាលដីសរុប ៣.២៨៤ក្បាលដី ហើយចេញបណ្ណបានចំនួន ២.៩៨៨ក្បាលដី។ លោកថា ចំពោះក្បាលដីដែលប្រគល់បណ្ណកម្មសិទ្ធិនៅពេលនេះ គឺជាក្បាលដីដែលមិនមានទំនាស់តវ៉ា មិនជាប់ពាក់ព័ន្ធនឹងបុរាណដ្ឋាន ឬតំបន់រក្សា ហើយចំពោះក្បាលដីជាប់ពាក់ព័ន្ធនឹងទំនាស់តវ៉ាផ្សេងៗ គណៈកម្មការរដ្ឋបាល នឹងបន្តពិនិត្យ និងដោះស្រាយតាមនីតិវិធីជាបន្តបន្ទាប់ ដើម្បីឈានទៅដល់ការចេញបណ្ណកម្មសិទ្ធិជូនម្ចាស់ដីជាបន្តទៀត។
ព័ត៌មានជាតិ ថ្មីៗ
លោក ហែន ពុទ្ធី អភិបាលរងខេត្ត មានប្រសាសន៍ថា ការផ្ដល់បណ្ណកម្មសិទ្ធិនេះ នឹងបញ្ចៀសបាននូវបញ្ហាជម្លោះដីធ្លី ហើយចំពោះបណ្ណកម្មសិទ្ធិនេះ គឺផ្ដល់ជូនបងប្អូនដែលបានបំពេញគ្រប់លក្ខខណ្ឌ និងបទដ្ឋានបច្ចេកទេស ស្របតាមច្បាប់ និងបទដ្ឋានគតិយុត្តជាធរមាន ទើបអាចធ្វើបណ្ណកម្មសិទ្ធិនេះបាន ដើម្បីធានាសុវត្ថិភាពដល់ប្រជាពលរដ្ឋជាម្ចាស់ដី និងអ្នកកាន់កាប់។ ក្នុងនោះសូមឱ្យបងប្អូនដែលទើបតែទទួលបានបណ្ណកម្មសិទ្ធិ ត្រូវយករក្សាទុក និងប្រើប្រាស់ឱ្យបានត្រឹមត្រូវ ជៀសវាងការបាត់បង់ ជាពិសេសសូមកុំយកទៅអ៊ុតថង់ប្លាស្ទិកជាដាច់ខាត។ ជាមួយនោះក៏សូមឱ្យអាជ្ញាធរមូលដ្ឋាន ជួយផ្សព្វផ្សាយដល់ប្រជាពលរដ្ឋឱ្យមកទទួលយកវិញ្ញាបនបត្រសម្គាល់ម្ចាស់អចលនវត្ថុនេះឱ្យបានគ្រប់ៗគ្នា និងពន្យល់ ណែនាំពួកគាត់អំពីឯកសារពាក់ព័ន្ធផ្សេងៗ ដែលទាក់ទងនឹងការមកទទួលបណ្ណកម្មសិទ្ធិនេះ។
ក្នុងឱកាសនោះ លោក សៀន សុខសាន អនុប្រធានការិយាល័យពន្ធដារស្រុកក្រឡាញ់ ក៏បានបញ្ជាក់បន្ថែមពីកាតព្វកិច្ចបង់ពន្ធលើវិស័យអចលនទ្រព្យ ដោយ សង្ខេបជូនដល់បងប្អូនប្រជាពលរដ្ឋដែលមកទទួលបណ្ណកម្មសិទ្ធិ ព្រោះជាការពិតណាស់ ពន្ធគឺជាចំណូលថវិការដ្ឋដ៏ធំសម្រាប់ការអភិវឌ្ឍប្រទេស។ ចំពោះប្រភេទពន្ធដែលទាក់ទងជាមួយនឹងអចលនទ្រព្យ មានដូចជា៖ ១.ពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ,២.ពន្ធអចលនទ្រព្យ និងទី៣.ពន្ធលើដីទំនេរដែលមិនបានប្រើប្រាស់។ ជាមួយនេះក៏សូមអំពាវនាវដល់បងប្អូនប្រជាពលរដ្ឋទាំងអស់ សូមចូលរួមកាតព្វកិច្ចឱ្យបានគ្រប់ៗគ្នា ដើម្បីជាប្រយោជន៍ជាតិក្នុងអនុវត្ត ព្រមទាំងបញ្ជ្រាបសេវាឱ្យកាន់តែខិតជិតបងប្អូនប្រជាពលរដ្ឋផងដែរ៕
អត្ថបទ និង រូបថត៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
