នាព្រឹកថ្ងៃទី០៨ ខែតុលា ឆ្នាំ២០២៤ នៅបន្ទប់ប្រជុំសាលាខេត្ត គណៈកម្មការវាយតម្លៃអង្គភាពផ្ដល់សេវាសាធារណៈថ្នាក់ខេត្ត(គ.វ.រ.) បានរៀបចំកិច្ចប្រជុំដើម្បីជំរុញ និងគាំទ្របេក្ខភាពអង្គភាពផ្ដល់សេវាសាធារណៈគំរូថ្នាក់ខេត្តក្នុងវិស័យអប់រំ និងវិស័យសុខាភិបាល សម្រាប់ឆ្នាំ២០២៤ ដឹកនាំដោយ លោកស្រី ម៉ននី រង្សី អភិបាលរងខេត្ត អនុប្រធាន គ.វ.រ. តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប ឯកឧត្តម តោ គិមស៊ាន សមាជិកក្រុមប្រឹក្សាខេត្ត និងជាសមាជិកគណៈកម្មការវាយតម្លៃអង្គភាពផ្ដល់សេវាសាធារណៈគំរូថ្នាក់ខេត្ត និងមានការចូលរួមពីតំណាងមន្ទីរអង្គភាពពាក់ព័ន្ធ ។
លោកស្រី ម៉ននី រង្សី អនុប្រធានគណៈកម្មការវាយតម្លៃអង្គភាពផ្ដល់សេវាសាធារណៈគំរូថ្នាក់ខេត្ត មានប្រសាសន៍ថាកិច្ចប្រជុំនេះមានគោលបំណងឱ្យមន្ទីរអង្គភាព និងអ្នកពាក់ព័ន្ធសហការគ្នាក្នុងការជំរុញដល់បេក្ខភាពអង្គភាពផ្ដល់សេវាសាធារណៈគំរូថ្នាក់ខេត្តដែលត្រូវបានបញ្ជូនទៅប្រកួតប្រជែងនៅថ្នាក់ជាតិឱ្យរៀបចំខ្លួនបន្ថែមទៀតក្នុងការអភិវឌ្ឍអង្គភាពរបស់ខ្លួនស្របទៅតាមចំណុចលម្អិតៗនៃតារាងលក្ខណៈវិនិច្ឆ័យសម្រាប់ការវាយតម្លៃ និងការទទួលស្គាល់អង្គភាពផ្ដល់សេវាសាធារណៈគំរូ ។
សូមបញ្ជាក់ថាលក្ខណៈវិនិច្ឆ័យសម្រាប់ការវាយតម្លៃនិងការទទួលស្គាល់បេក្ខភាពអង្គភាពផ្ដល់សេវាសាធារណៈគំរូ ទៅលើលក្ខណៈវិនិច្ឆ័យគោលទាំង៨ មាន៖
១. ស្ដង់ដាសេវាសាធារណៈ
២. ស្ដង់ដាឬនិយាម នៃការផ្ដល់សេវាសាធារណៈសម្រាប់អង្គភាព
៣. ការគ្រប់គ្រងហិរញ្ញវត្ថុសាធារណៈនៅក្នុងអង្គភាព
៤. ការគ្រប់គ្រង និងការអភិវឌ្ឍធនធានមនុស្សនៅក្នុងអង្គភាព
៥. ការរៀបចំ និងកែលម្អបរិស្ថានក្នុងអង្គភាព
៦. ទំនាក់ទំនងល្អជាមួយប្រជាពលរដ្ឋ សហគមន៍ និងដៃគូអភិវឌ្ឍ ព្រមទាំងការចូលរួមវាយតម្លៃពីអ្នកប្រើប្រាស់សេវាសាធារណៈ
៧. ការដោះស្រាយបញ្ហាប្រឈមជាមួយប្រជាពលរដ្ឋ អាជ្ញាធរ និងសហគមន៍
៨. ការផ្ដួចផ្ដើមគំនិតថ្មីៗ និងនវានុវត្តន៍ ដើម្បីធ្វើឱ្យអង្គភាពមានដំណើរការល្អប្រសើរ។
គួររំលឹកថា ដោយផ្អែកតាមការវាតម្លៃទូទាំងប្រទេស អង្គភាពផ្តល់សេវាសាធារណៈគំរូក្នុងខេត្តសៀមរាប ដែលទទួលបានជ័យលាភីក្នុងវិស័យអប់រំ និងវិស័យសុខាភិបាល ប្រចាំឆ្នាំ២០២៣ មានមណ្ឌលសុខភាពគោកចក ក្រុងសៀមរាប ទទួលបានចំណាត់ថ្នាក់លេខ២ អនុវិទ្យាល័យមិត្តភាពខ្មែរ-ជប៉ុន ព្រះឥន្ទកោសា ទទួលបានចំណាត់ថ្នាក់លេខ២ សាលាបឋមសិក្សាវត្តបូព៌ ក្រុងសៀមរាប ទទួលបានចំណាត់ថ្នាក់លេខ៣ សាលាបឋមសិក្សាក្រវ៉ាន់ ក្រុងសៀមរាប ទទួលបានចំណាត់ថ្នាក់លេខ៦៕
អត្ថបទ និងរូបភាព៖ ធន់ ពូថេ
កែសម្រួល៖ ហាំ ម៉េងហួត
