ប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤ ដូចបណ្ដាឆ្នាំកន្លងទៅដែរ សម្រាប់ខេត្តសៀមរាប សិស្សានុសិស្ស ដែលមកប្រឡង អាចផ្ញើកង់-ម៉ូតូ នៅតាមមណ្ឌលប្រឡងរបស់ខ្លួន ដោយមិនគិតថ្លៃ និងប្រកបដោយសុវត្ថិភាព ដែលរៀបចំដោយសហភាពសហព័ន្ធយុវជនកម្ពុជាខេត្តសៀមរាប។ ទន្ទឹមនឹងនេះ ដើម្បីឱ្យការប្រឡងប្រព្រឹត្តិទៅដោយភាពប្រក្រតី មានសណ្តាប់ធ្នាប់របៀបរៀបរយសាធារណៈល្អនិង ធានាបាននូវយុត្តិធម៌ជូនបេក្ខជន និងមាតាបិតា ឬអាណាព្យាបាល គណៈបញ្ជាការឯកភាពរដ្ឋបាលខេត្ត ក៏បានរៀបចំកម្លាំងការពារសន្តិសុខ សុវត្ថិភាព និងរក្សាសណ្តាប់ធ្នាប់របៀបរៀបរយតាមមណ្ឌលប្រឡងនីមួយៗ រក្សាសន្តិសុខ សុវត្ថិភាពក្នុងការដឹកជញ្ជូននិងរក្សាទុកហិបវិញ្ញាសារក្នុងបានយ៉ាងល្អប្រសើរ ព្រមទាំងរក្សានូវសន្តិសុខ សុវត្ថិភាពដល់គណៈមេប្រយោគគ្រប់លំដាប់ថ្នាក់នៅគ្រប់ដំណាក់កាលនៃការប្រឡងផងដែរ។
ក្នុងឱកាសបើកវិញ្ញាសារប្រឡងមធ្យមសិក្សាទុតិយភូមិឆ្នាំ២០២៤ នៅវិទ្យាល័យ១០មករា១៩៧៩ នាព្រឹកថ្ងៃទី០៨ ខែតុលា ឆ្នាំ២០២៤ របស់ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប។
ឯកឧត្តមអភិបាលខេត្ត ក៏បានជំរុញលើកទឹកចិត្តដល់បេក្ខជនប្រឡងមធ្យមសិក្សាទុតិយភូមិឆ្នាំនេះ ទាំងអស់ប្រឹងប្រែងឱ្យអស់ពីសមត្ថភាព និងត្រូវគោរពតាមវិន័យលក្ខខ័ណ្ឌកំណត់ និងបម្រាមទាំងឡាយរបស់ក្រសួងអប់រំ យុវជន និងកីឡា ព្រមទាំងគោរព និងស្តាប់តាមការណែនាំរបស់អនុរក្សចៀសវាងប្រព្រឹត្តិផ្ទុយនូវការណែនាំ និងលក្ខខ័ណ្ឌកំណត់ផ្សេងៗ ជាពិសេសក្នុងការបើកបរមកប្រឡងត្រូវរក្សាសុវត្ថិភាព និងប្រុងប្រយត្ន័ក្នុងការបើកបរយានយន្តឱ្យបានជាប្រចាំ។
ឯកឧត្តម ប្រាក់ សោភ័ណ បានថ្លែងកោតសរសើរ ដល់ការរៀបចំរបស់ក្រសួងអប់រំ យុវជន និងកីឡា និងគណៈបញ្ជាការឯកភាពរដ្ឋបាលខេត្ត ព្រមទាំងកម្លាំងយុវជនសហភាពសហព័ន្ឋកម្ពុជាខេត្តសៀមរាប ដែលបានសហការល្អ សំដៅរួមចំណែករក្សាសន្តិសុខ សុវត្ថិភាព សណ្តាប់ធ្នាប់របៀបរៀបរយល្អប្រសើរ ជាពិសេស គ្រប់សមាសភាពគណៈកម្មការក៍ចាត់ចែងដំណើរការប្រឡងបានបំពេញតួនាទីភារកិច្ចប្រកបដោយរលូនផងដែរ។
ឯកឧត្តមបណ្ឌិត សោម រតនា អនុរដ្ឋលេខាធិការ ក្រសួងអប់រំយុវជន និងកីឡា តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា ក៍បានណែនាំ និងផ្តាំផ្ញើមួយចំនួន ដល់លោកគ្រូអ្នកគ្រូ ជាអនុរក្ស និង និងមេប្រយាគ ព្រមទាំងក្មួយៗសិស្សានុសិស្ស បេក្ខជនទាំងពីរភេទ ត្រូវយកចិត្តទុកដាក់ ប្រឹងប្រែងឱ្យអស់ពីសមត្ថភាព ដើម្បីឈានទៅទទួលលទ្ឋផលល្អនៅពេលប្រកាសលទ្ឋផល។
ឯកឧត្តមមានប្រសាសន៍ថា៖ ការប្រឡងនេះ គឺជាការវាស់ស្ទង់នូវរាល់កម្រិតនៃចំណេះដឹងរបស់ក្មួយៗ ដែលបានខិតខំប្រឹងប្រែងសិក្សារៀនសូត្រអស់រយៈពេល១២ឆ្នាំកន្លងមក ហើយលទ្ឋផលយ៉ាងណាៗនោះគឺអាស្រ័យលើសមត្ថិភាពបេក្ខជនម្នាក់ៗ ពោលគឺ អ្នកចេះគឺជាប់ តែយ៉ាងណាក្តី ក៏យើងចង់ឱ្យបេក្ខជនមកប្រឡងជាប់ទាំងអស់គ្នាមិនថាទទួលបាននិទ្ទេសល្អឬមិនល្អនោះទេ។
ឯកឧត្តម បានបញ្ជាក់ថា៖ក្មួយៗកុំបារម្ភពីបញ្ហាវិញ្ញាសារដែលក្មួយៗប្រឡងនាពេលនេះឡើយ ក្រសួងអប់រំមិនបានធ្វើឲ្យបែកធ្លាយឬមានបញ្ហាអ្វីចេញទៅក្រៅនោះទេ គឺ មានតែក្មួយៗទាំងអស់ បានឃើញក្នុងពេលប្រឡងតែប៉ុណ្ណោះ ហើយសូមរក្សានូវវិន័យ សីលធម៌ គោរពនូវលក្ខន្តិកៈក្នុងពេលប្រឡងឲ្យបានល្អ។ ឯកឧត្តម បានផ្តាំផ្ញើ និងរំលឹកដល់អនុរក្សគណៈកម្មការទាំងអស់ព្រមទាំងសមត្ថកិច្ចឱ្យខិតខំប្រឹងប្រែងអនុវត្តដោយប្រកាន់ឱ្យបានខ្ជាប់ខ្ជួននូវតួនាទីភារកិច្ចចៀសវាងបញ្ហាផ្សេងៗកើតឡើង។
ការប្រឡងមានរយៈពេលពីរថ្ងៃ នៅថ្ងៃទី០៨និងទី០៩ ខែតុលា ឆ្នាំ២០២៤នេះ នៅតាមមណ្ឌលប្រឡងនីមួយៗ ពុំអនុញ្ញាតិឱ្យយកចូលនូវអាវុធជាតិផ្ទុះគ្រប់ប្រភេទ ហាមយកចូលសំណៅឯកសារគ្រប់រូបភាព កាតាប កាបូបយួរដៃ ថង់ សំពៀត កញ្ចប់ផ្សេងៗ និងទឹកលុបពណ៌ស និងហាមយកចូលឧបករណ៍អេឡិចត្រូនិក ទូរស័ព្ទដៃ ប្រដាប់គិតលេខ នាឡិកាដៃដែលអាចគិតលេខបាន ។
ក្នុងរបាយការណ៍របស់ មន្ទីរអប់រំយុវជន និង កីឡាខេត្តសៀមរាប បានឲ្យដឹងថា៖ការប្រឡងសញ្ញាប័ត្រមធ្យមសិក្សាទុតិយភូមិ ឆ្នាំសិក្សា២០២៣/២០២៤នេះ ខេត្តសៀមរាបមានមណ្ឌលប្រឡង ចំនួន១៦មណ្ឌលនិង មានបន្ទប់ចំនួន ៤៣៣បន្ទប់ ក្នុងនោះផ្នែកវិទ្យាសាស្ត្រ មានចំនួន ៥មណ្ឌល ស្មើ១២៨បន្ទប់។ផ្នែក វិទ្យាសាស្ត្រសង្គម ១១មណ្ឌល ស្មើ៣០៥ បន្ទប់ ។ មានបេក្ខជន ចំនួនសរុប ១០៧៣៦នាក់ ក្នុងនោះស្រី ៦២៥៧នាក់។
អត្ថបទ ៖យូ វង្ស
