សៀមរាបជាខេត្តប៉ូលសេដ្ឋកិច្ចដ៏សំខាន់មួយរបស់កម្ពុជា ជាពិសេសវិស័យទេសចរណ៍ បានដើរតួនាទីយ៉ាងសំខាន់នៅក្នុងការជំរុញកំណើនសេដ្ឋកិច្ចនេះ ហើយក្រៅពីប្រាសាទបុរាណរាប់រយ ខេត្តសៀមរាប នៅមានសក្តានុពលផ្សេងៗទៀតដូចជា វិស័យកសិកម្ម កសិឧស្សាហកម្ម និងវិស័យដឹកជញ្ជូនផ្លូវអាកាស ដែលមិនគួរមើលរំលង ដែលយើងត្រូវបង្ហាញឱ្យគេបានដឹង បានឃើញ និងប្រើឱ្យអស់លទ្ធភាព។
នេះបើតាមការបញ្ជាក់របស់ ឯកឧត្តមបណ្ឌិតសភាចារ្យ សុក ស៊ីផាន់ណា ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានលេខាធិការដ្ឋាន នៃគណៈកម្មាធិការផ្តល់យោបល់លើគោលនយោបាយពាណិជ្ជកម្ម ក្នុងពិធីប្រកាសដាក់ឱ្យប្រើប្រាស់ជាផ្លូវការនូវសៀវភៅ “មគ្គុទេសក៍ក្នុងការធ្វើអាជីវកម្ម និងវិនិយោគក្នុងខេត្តសៀមរាប” នាព្រឹកថ្ងៃទី០៧ ខែតុលា ឆ្នាំ២០២៤នេះ នៅសាលាខេត្តសៀមរាប។
ព័ត៌មានជាតិ ថ្មីៗ
ឯកឧត្តម សុក ស៊ីផាន់ណា លើកឡើងថា ក្រៅពីប្រាសាទបុរាណ យើងមានបឹងទន្លេសាប ដែលគេរំពឹងថា នឹងក្លាយជាផ្លូវដឹកជញ្ជូនកសិផលដ៏សំខាន់មួយភ្ជាប់ខេត្តជុំវិញបឹងនេះ ទៅកាន់ទន្លេបាសាក់ និងទៅកាន់ព្រែកជីកហ្វូណនតេជោ។ ដោយឡែក ព្រលានយន្តហោះអន្តរជាតិសៀមរាប អង្គរ ក៏ជាច្រកនាំចេញដ៏ធំមួយដែរ ដែលជាច្រកនាំចេញសំខាន់មួយ ពិសេសលើផលិតផលគ្រឿងអេឡិកត្រូនិក។ ដូច្នេះការបង្កើតតំបន់សេដ្ឋកិច្ចពិសេសមួយដែលប្រមូលផ្តុំដោយរោងចក្រផលិតគ្រឿងអេឡិកត្រូនិកនៅជិតព្រលានយន្តហោះនេះ ក៏ជួយដល់សេដ្ឋកិច្ចជាតិបានយ៉ាងច្រើនដែរ។
ឯកឧត្តម សុក ស៊ីផាន់ណា លើកឡើងថា ក្រៅពីវិស័យខាងលើនេះ ខេត្តសៀមរាប នៅមានវិស័យដែលជាសក្តានុពលដ៏ច្រើនផ្សេងទៀត ហើយវិស័យទាំងនោះបានចងក្រងបញ្ចូលទៅក្នុងសៀវភៅ “មគ្គុទេសក៍ក្នុងការធ្វើអាជីវកម្ម និងវិនិយោគក្នុងខេត្តសៀមរាប” ដែលសៀវភៅនេះ បានបោះពុម្ពជា ២ភាសា គឺភាសាខ្មែរ និងភាសាអង់គ្លេស។ ឯកឧត្តមរំពឹងថា សៀវភៅនេះ ជាចំណែកមួយនៅក្នុងការបង្ហាញសក្តានុពលរបស់ខេត្តសៀមរាប ទៅកាន់ពិភពលោក ព្រោះក្រៅពីការបែងចែកនៅក្នុងស្រុក សៀវភៅនេះ ក៏នឹងត្រូវបញ្ជូនទៅកាន់គ្រប់បណ្តាស្ថានឯកអគ្គរាជទូតរបស់កម្ពុជា នៅក្រៅប្រទេសផងដែរ។
លោក សុខ ថុល អភិបាលរងខេត្តសៀមរាប មានប្រសាសន៍ថា ពិតណាស់កម្ពុជា ក្រោមកិច្ចដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា និង សម្តេចធិបតី ហ៊ុន ម៉ាណែត នាយករដ្ឋមន្រ្តី បានប្រែក្លាយខេត្តសៀមរាប ជាខេត្តមួយដ៏មានសក្តានុពលដ៏ខ្លាំងក្លារបស់ប្រទេស ក្នុងការចូលរួមលើកស្ទួយ ក៏ដូចជាជំរុញកំណើនសេដ្ឋកិច្ចជាតិ ហើយដែលត្រូវបានប្រសិទ្ធនាមថា “តារារះ នាទិសឧត្តរ”។ ជាមួយនោះ ក្រុងសៀមរាប ត្រូវបានកែប្រែមុខមាត់ថ្មី ក្នុងការទាក់ទាញភ្ញៀវជាតិ និងអន្តរជាតិ តាមរយៈគម្រោងស្ថាបនា និងកែលម្អផ្លូវ ៣៨ខ្សែក្នុងក្រុង ដែលជួយឱ្យក្រុងមានសោភ័ណ្ឌភាពប្រកបដោយភាពទាក់ទាញ រួមជាមួយនូវការកែលម្អនូវដងស្ទឹងសៀមរាប និងការរៀបចំនូវទីធ្លាសាធារណៈនានា ឱ្យមានភាពបៃតងគួរឱ្យគយគន់សម្រាប់ភ្ញៀវទេសចរដែលចូលមកកម្សាន្ត។
លោកមានប្រសាសន៍ទៀតថា នាពេលដ៏ឆាប់ៗខាងមុខនេះ ខេត្តសៀមរាប នឹងទទួលបាននូវសមិទ្ធផលដ៏ធំមួយបន្ថែមទៀត ដែលបម្រើឱ្យការដឹកជញ្ជូន និងការធ្វើដំណើរមកកាន់ខេត្តសៀមរាប នោះគឺ ផ្លូវល្បឿនលឿនទី៣ ដែលអាចតភ្ជាប់ខេត្តសៀមរាប ទៅកាន់រាជធានីភ្នំពេញ ទីក្រុងហូជីមិញ នៃប្រទេសវៀតណាម និងទីក្រុងបាងកក នៃប្រទេសថៃ ហើយដែលផ្លូវល្បឿនលឿនថ្មីនេះ នឹងរួមចំណែកផ្តល់ឱកាសដ៏ធំមួយសម្រាប់ខេត្តសៀមរាប ក៏ដូចបងប្អូនជាប្រជាជនខេត្ត ក្នុងការលើកកម្ពស់កំណើនសេដ្ឋកិច្ចរបស់ខ្លួន។ លើសពីនេះទៀត គម្រោងព្រែកជីកហ្វូណនតេជោ ដែលជាគម្រោងដ៏ធំមួយ និងជាប្រវត្តិសាស្រ្តរបស់កម្ពុជា ដើម្បីតភ្ជាប់ការដឹកជញ្ជូនផ្លូវទឹករបស់ខ្លួន ពីទឹកសាបទៅកាន់សមុទ្រទឹកជ្រៅក្នុងខេត្តព្រះសីហនុ។ ហើយតាមរយៈគម្រោងដ៏ធំមហាសាលនេះ ខេត្តសៀមរាប ក៏នឹងទទួលផលផ្លែផ្កាផ្នែកសេដ្ឋកិច្ចពីគម្រោងដ៏ធំនេះផងដែរ ពីព្រោះខេត្តសៀមរាប មានព្រំប្រទល់ជាប់នឹងបឹងទន្លេសាប ហើយដែលអាចធ្វើការដឹកជញ្ជូនទំនិញ និងការធ្វើដំណើរនានាពីបឹងទន្លេសាប ភ្ជាប់ទៅកាន់ទន្លេបាសាក់ និងឆ្ពោះទៅកាន់ខេត្តកែប និងខេត្តព្រះសីហនុផ្ទាល់ផងដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
