ក្នុងពិធីចែកកង់ សម្លៀកបំពាក់ និងសម្ភារៈសិក្សាដល់កុមារគោលដៅរបស់គម្រោងកិច្ចអន្តរាគមន៍ស្នូលសម្រាប់ឆ្នាំ២០២៤ ក្នុងវិស័យសិប្បកម្មផលិតឥដ្ឋនៅស្រុកសូទ្រនិគម នៅព្រឹកថ្ងៃទី០៣ ខែមករា ឆ្នាំ២០២៥នេះ អនុប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប លោកជំទាវ យូ សុភា បានអំពាវនាវដល់គ្រប់ភាគីពាក់ព័ន្ធ សូមបន្តចូលរួមក្នុងការងារទប់ស្កាត់ពលកម្មកុមារ ព្រោះពលកម្មកុមារ គឺជាបញ្ហាលក្ខណៈសកល ហើយនៅតែបន្តកើតមានអាស្រ័យកត្តាសំខាន់បី គឺការអប់រំសង្គម ការអនុវត្តច្បាប់ និងការឆក់ឱកាសពីជនល្មើស។
លោកជំទាវ យូ សុភា មានប្រសាសន៍ថា ការកេងប្រវ័ញ្ចពលកម្មកុមារ គឺជាការប្រើប្រាស់ពលកម្មកុមារ ដែលធ្វើឱ្យមានផលប៉ះពាល់ដល់សុខុមាលភាពរបស់កុមារ ការអប់រំ ការអភិវឌ្ឍ និងការរស់រាន់របស់កុមារនៅថ្ងៃអនាគត។ ពលកម្មកុមារ គឺជាប្រភេទការងារដែលបង្កឱ្យមានគ្រោះថ្នាក់ ការបំពាននានា និងការកេងប្រវ័ញ្ចញើសឈាមរបស់កុមារ ហើយធ្វើឱ្យកុមារឃ្លាតឆ្ងាយពីការទទួលបានការអប់រំ។ ស្របជាមួយគ្នានេះ រាជរដ្ឋាភិបាលកម្ពុជា បានធ្វើឱ្យប្រទេសកម្ពុជាក្លាយជាប្រទេសមួយនាំមុខគេ ក្នុងចំណោមប្រទេសទាំង៥ ក្នុងពិភពលោក ដែលបានលុបបំបាត់ពលកម្មកុមារ និងមានលក្ខខណ្ឌការងារល្អប្រសើរ មានគោលនយោបាយច្បាស់លាស់ ក្នុងការប្រឆាំងនឹងពលកម្មកុមារ និងជាប្រទេសនាំមុខមធ្យម ក្នុងចំណោមប្រទេសនាំមុខទាំង១៣ នៅលើពិភពលោក ក្នុងវឌ្ឍនភាពប្រឆាំងពលកម្មកុមារ។
លោកជំទាវ ក៏សូមអំពាវនាវឱ្យមានការចូលរួមពីគ្រប់អ្នកពាក់ព័ន្ធ ក្នុងការទប់ស្កាត់ពលកម្មកុមារនៅក្នុងមូលដ្ឋាន រួមមាន៖ ទី១.នៅសាលារៀន គឺយើងមានគ្រូបង្រៀនជាអ្នកតាមឃ្លាំមើលក្មេង កុំឱ្យគាត់ចេញពីសាលារៀនទៅធ្វើការ, ទី២.អាជ្ញាធរភូមិឃុំ ធ្វើការគ្រប់គ្រង និងតាមដានតាមខ្នងផ្ទះ ដើម្បីទប់ស្កាត់កុំឱ្យកុមារ ចូលទៅកន្លែងធ្វើការ ពិសេសនៅក្នុងរង្វង់សិប្បកម្មផលិតឥដ្ឋ, ទី៣.អាណាព្យាបាលដែលធ្វើការ ឬស្នាក់នៅក្នុងបរិវេណសិប្បកម្ម ហាមដាច់ខាតនាំកូនចូលទៅក្នុងបរិវេណនៃសង្វាក់ផលិតកម្ម ឬប្រើប្រាស់ពលកម្មកុមារ ហើយត្រូវបញ្ចូនកូនឱ្យចូលរៀនឱ្យបានគ្រប់ៗគ្នា និងទី៤.និយោជក ឬម្ចាស់សិប្បកម្ម ត្រូវមានការប្រុងប្រយ័ត្នដោយមិនត្រូវជ្រើសរើសកុមារក្រោមអាយុ ១៥ឆ្នាំ ឱ្យចូលធ្វើការ ហើយក្រុមអធិការកិច្ចការងារ ត្រូវចុះទៅពិនិត្យលក្ខខណ្ឌការងារហើយទប់ស្កាត់កុមារកុំឱ្យចូលធ្វើការ។
ព័ត៌មានជាតិ ថ្មីៗ
លោកស្រី ប៊ុន ច្រិប អនុប្រធានមន្ទីរការងារនិងបណ្តុះបណ្តាលវិជ្ជាជីវៈខេត្តសៀមរាប បានឱ្យដឹងថា ការចែកកង់ សម្លៀកបំពាក់ ស្បែកជើង និងសម្ភារៈសិក្សាដល់កុមារ គឺទទួលបានការគាំទ្រពីក្រសួងការងារ និងបណ្តុះបណ្តាលវិជ្ជាជីវៈ ជូនដល់កុមារគោលដៅនៅក្នុងគម្រោងកិច្ចអន្តរាគមន៍ស្នូល ក្នុងវិស័យសិប្បកម្មផលិតឥដ្ឋ គឺមានពីរគោលដៅ សរុប៦០នាក់។ ដោយឡែកនាពេលនេះ គឺមានចំនួន៤០នាក់ ដែលកំពុងសិក្សានៅសាលាបឋមសិក្សាវត្តសីលា ក្នុងឃុំដានរុន និងបានចែកជូនកុមារចំនួន២០នាក់ កាលពីថ្ងៃទី០២ ខែមករា ឆ្នាំ២០២៥ នៅសាលាបឋមសិក្សាកណ្តឹង ស្ថិតនៅក្នុង ឃុំឃុនរាម ស្រុកបន្ទាយស្រី៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
