នៅថ្ងៃទី០៣ ខែមករា ឆ្នាំ២០២៥នេះ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានរៀបចំសិក្ខាសាលាបូកសរុបលទ្ធផលការងារកសិកម្ម រុក្ខាប្រមាញ់ និងនេសាទប្រចាំឆ្នាំ២០២៤ និងទិសដៅអនុវត្តបន្តឆ្នាំ២០២៥ ក្រោមអធិបតី ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីសំណាក់ ឯកឧត្តម ម៉ក់ សំភា សមាជិកក្រុមប្រឹក្សាខេត្ត និង លោក អុឹង គឹមលាង អភិបាលរងខេត្ត លោកលោកស្រីថ្នាក់ដឹកនាំ មន្ទីរអង្គភាពក្នុងខេត្ត រួមនឹងមន្ត្រី និងអ្នកពាក់ព័ន្ធជាច្រើនរូប។
លោក ទា គឹមសុទ្ឋ ប្រធានមន្ទីរ បង្ហាញថា សិក្ខាសាលានាពេលនេះ ធ្វើឡើងដើម្បីបង្ហាញពីសមិទ្ធផលដែលមន្ទីរសម្រេចបានកន្លងមក ក្នុងវិស័យកសិកម្ម និងពិភាក្សាពីបញ្ហាប្រឈមនានា ដើម្បីកំណត់បាននូវដំណោះស្រាយ ឈានទៅលើកទិសដៅអនុវត្តការងារបន្ត និងធ្វើការកែលម្អការអនុវត្តសកម្មភាពឆ្នាំ២០២៤កន្លងទៅ ឱ្យទទួលលទ្ធផលឆ្លើយតបតាមតម្រូវការ សម្រាប់កំណើនប្រើប្រាស់ក្នុងស្រុក និងភ្ញៀវទេសចរ ក្នុងន័យធ្វើយ៉ាងណាបានច្រើនជាងមុន រហ័សជាងមុន និងប្រកបដោយសុវត្ថិភាពជាងមុន។
លោក អុឹង គឹមលាង អភិបាលរងខេត្ត បានវាយតម្លៃខ្ពស់ ចំពោះលទ្ធផលការងាររបស់មន្ទីរ ដែលអនុវត្តបានកន្លងមក ដែលជាការខិតខំប្រឹងប្រែងរបស់ថ្នាក់ដឹកនាំ និងមន្រ្តីរាជការទាំងអស់ ក្នុងកិច្ចសហការសម្របសម្រួល និងបំពេញការងារ ព្រមទាំងការលះបង់កម្លាំងកាយចិត្ត ក្នុងការចុះផ្សព្វផ្សាយ អប់រំ និងការកំណត់ឱ្យបាននូវមុខសញ្ញាជនល្មើសក្នុងការងារវិស័យព្រៃឈើ និងវិស័យជលផល ដែលមានការចូលរួមសហការល្អ ជាមួយសមត្ថកិច្ចពាក់ព័ន្ធក្នុងការបង្ក្រាប ធ្វើឱ្យយើងសម្រេចបាននូវសមិទ្ធផលជាច្រើន ក្នុងរយៈពេលមួយឆ្នាំកន្លងមកនេះ។
ឯកឧត្តម ឃុន សាវឿន រដ្ឋលេខាធិការ មានប្រសាសន៍ថា ដើម្បីជំរុញ និងលើកកម្ពស់អភិវឌ្ឍវិស័យកសិកម្ម តាមរយៈយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដែលមាន សម្តេចធិបតី ហ៊ុន ម៉ាណែត ជានាយករដ្ឋមន្ត្រី បានដាក់ចេញនូវគោលនយោបាយអាទិភាពទី៥ និងទី៦ គឺ៖ការលើកស្ទួយផលិតកម្មកសិកម្ម រកទីផ្សារ និងរក្សាលំនឹងថ្លៃកសិផល តាមរយៈកម្មវិធីហិរញ្ញប្បទាន ការដាក់ពង្រាយមន្ត្រីឃុំសង្កាត់ និងការអភិវឌ្ឍសហគមន៍កសិកម្មទំនើប។
ឯកឧត្តម បន្តថា ផ្អែកតាមគោលនយោបាយរបស់រាជរដ្ឋាភិបាល ក្រសួងកសិកម្ម មានចក្ខុវិស័យកសិកម្ម គឺបន្តធានាសន្តិសុខស្បៀងកម្ពុជា ភាពប្រកួតប្រជែងប្រកបដោយនិរន្តរភាព ហើយវិស័យកសិកម្មនៅតែរួមចំណែកយ៉ាងសំខាន់ក្នុងសេដ្ឋកិច្ចជាតិ។ ក្នុងន័យនេះគោលនយោបាយកសិកម្មគឺ៖ ទី១.កសិករមានហូប ទី២.មានប្រើ ទី៣.មានបាន និងទី៤.មានរហូត។ ជាក់ស្ដែងសិក្ខាសាលានាពេលនេះដែរ ពិតជាមានសារៈសំខាន់ណាស់ ក្នុងការរិះរកចំណុចខ្លាំង ចំណុចខ្សោយ ឬបញ្ហាប្រឈមនានា និងការចែករំលែកបទពិសោធ ក៏ដូចជាឱកាស ដើម្បីដាក់វិធានការដោះស្រាយ និងកំណត់សកម្មភាពជាអាទិភាពសំដៅប្រសិទ្ធភាព និងប្រសិទ្ធផលការងារ ឈានឆ្ពោះទៅរកការអភិវឌ្ឍវិស័យកសិកម្មឱ្យកាន់តែរីកចម្រើនថែមទៀត ស្របតាមយុទ្ធសាស្ត្រ បញ្ចកោណ ដំណាក់កាលទី១ របស់រាជរដ្ឋាភិបាល និងគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
