សំណេរអង្គរ ដែលនឹងធ្វើឡើងដោយការសរសេរតាមអាន ក្នុងបំណងស្វែងរកអ្នកសរសេរបានត្រឹមត្រូវតាមក្បួនអក្ខរាវិរុទ្ធ នៃអក្សរសាស្ត្រខ្មែរព្រមទាំងអ្នកមានស្នាដៃសរសេរអក្សរបានស្អាតបំផុតនឹងប្រារព្ធឡើងជាលើកទី២នៅប្រាសាទអង្គរវត្ត នៅថ្ងៃទី១៩ខែមករាឆ្នាំ២០២៥ខាងមុខ។
ថ្លែងនៅក្នុងសន្និសីទសារព័ត៌មាននាមុខប្រាសាទអង្គរវត្តថ្ងៃទី០៥ ខែមករាឆ្នាំ២០២៥ លោក ឡុង កុសល អគ្គនាយករងអាជ្ញាធរជាតិអប្សរា បានលើកឡើងពីគុណតម្លៃនៃរមណីយដ្ឋានអង្គរ ផ្សាភ្ជាប់ជាមួយការប្រកួតសំណេរអង្គរ និងការលើកកម្ពស់អក្សរសាស្រ្តខ្មែរ។
លោក លឹម ប៊ុនហុក គណៈកម្មការរៀបចំសំណេរអង្គរ លើកទី២ នេះមានបេក្ខជនចំនួនជាង១២០០នាក់បានចុះឈ្មោះចូលប្រកួតក្នុងនោះ បេក្ខជនវ័យចាស់ជាងគេអាយុ៨១ឆ្នាំ និងបេក្ខជនក្មេងជាងគេអាយុ៦ឆ្នាំ និងមានជនបរទេសចូលរួមប្រកួតហើយ បេក្ខជនភាគច្រើនជាអ្នកខេត្តសៀមរាប និងមកពីបណ្តារាជធានីភ្នំពេញ ខេត្តផ្សេងៗផងដែរ។
លោកបានបញ្ជាក់ដែលថា បេក្ខជនជាប់ជ័យលាភីទាំង៦នាក់ ក្នុងសម្រាប់ជ័យលាភីលេខ១ នឹងទទួលបានការលើកទឹកចិត្តថវិកាចំនួន៥លានរៀល លេខ២ចំនួន៣លានរៀល និងលេខ៣ ២លានរៀល។ លើសពីនេះក៏បានទទួលការឧបត្ថម្ភពីសប្បុរសជន និងផ្នែកឯកជនខ្លះផងដែរពិសេសនោះក្រុមហ៊ុនអាទីហ្សង់នឹងឆ្លាក់ពានថ្មប្រគល់ជូនជាអនុស្សាវរីយ៍ប្រចាំជីវិតហើយសំណេរជាប់ជ័យលាភីពីលេខ១ដល់លេខ៣នឹងយកទៅតម្កល់ទុកនៅក្រសួងអប់រំ ពិសេសជាងនេះទៅទៀត បេក្ខជនដែលសរសេរអក្សរស្អាតជាងគេនឹងទទួលបានការឧបត្ថម្ភគាំទ្រ និងផ្តល់ឱកាសការងារបន្ថែមពីក្រុមគណៈមេធាវី ឱ្យចម្លងក្រមរដ្ឋប្បវេណីនិងក្រមព្រហ្មទណ្ឌ ជាសំណេរដោយដៃសុទ្ឋសាធ ដើម្បីទុកជាសំណេរឯកសារប្រវត្តិសាស្ត្រសម្រាប់កូនខ្មែរជំនាន់ក្រោយៗយកគំរូតាម។
សូមបញ្ជាក់ថា ការប្រកួតប្រជែងសរសេរតាមអានសំណេរអង្គរ គណៈកម្មការនឹងចាប់ផ្ដើមកែសន្លឹកកិច្ចការបេក្ខជនដោយជ្រើសរើសយកអក្ខរ៉ាវីរុទ្ឋត្រឹមត្រូវតាមអក្ខរក្រមវចនានុក្រមសម្តេចសង្ឃរាជជួនណាត វចនានុក្រមរាជបណ្ឌិតសភាកម្ពុជា និងសន្ទានុក្រមនានា និងជ្រើសរើសយកអ្នកសរសេរអក្សរស្អាតដើម្បីវាយតម្លៃផ្តល់ពិន្ទុទទួលជ័យលាភីក្នុងនោះបែងចែកជា២ គឺបេក្ខជនអាយុ១៨ឆ្នាំចុះក្រោម មានជ័យលាភីលេខ១-៣ និងបេក្ខអាយុ១៩ឆ្នាំឡើង ជ័យលាភីលេខ១-៣ដូចគ្នា ។ ព្រឹត្តិការណ៍សំណេរអង្គរនេះ សហការរៀបចំដោយ ក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ អាជ្ញាធរជាតិអប្សរា រដ្ឋបាលខេត្តសៀមរាប និងសមាគមក្លឹបទេសចរណ៍ខេត្តសៀមរាបព្រមទាំង ទទួលបានការឧបត្ថម្ភគាំទ្រពីវិស័យឯកជនមួយចំនួនទៀត៕
អត្ថបទ និងរូបភាព : លោក យូ វង្ស និងលោក ជា ស្រស់
កែសម្រួល : ហាំ ម៉េងហួត
