នៅថ្ងៃទី១៩ ខែមករា ឆ្នាំ២០២៥ ឯកឧត្តម សៀង ណាំ តំណាងរាស្ត្រមណ្ឌលសៀមរាប បានដឹកនាំលោកគ្រូអ្នកគ្រូ និងសិស្សានុសិស្ស ចំនួន១៥នាក់ មកពីវិទ្យាល័យអឹរ៉ាវ៉ា ហ្គាគឹអ៊ីង នៃប្រទេសជប៉ុន ដើម្បីធ្វើទស្សនកិច្ចសិក្សាស្វែងយល់ពីប្រពៃណី វប្បធម៌ទំនៀមទម្លាប់ សកម្មភាពរស់នៅប្រចាំថ្ងៃរបស់បងប្អូនប្រជាពលរដ្ឋនៅឃុំកំពង់ភ្លុក ស្រុកប្រាសាទបាគងខេត្តសៀមរាប និងចែករំលែកបទពិសោធស្វែងយល់ការសិក្សារៀនសូត្រពីគ្នាទៅវិញទៅមករវាងសិស្សានុសិស្សកម្ពុជា និងសិស្សានុសិស្សប្រទេសជប៉ុន។
ថ្លែងសំណេះសំណាលជាមួយអាជ្ញាធរមូលដ្ឋាន លោកតាលោកយាយ បងប្អូនប្រជាពលរដ្ឋ លោកគ្រូអ្នកគ្រូនិងសិស្សានុសិស្សចំនួនជាង៤០០នាក់នៅទួលវត្តកំពង់ភ្លុក ឯកឧត្តម សៀង ណាំ បានលើទឹកចិត្តដល់ សិស្សានុសិស្សឱ្យខិតខំប្រឹងប្រែងសិក្សារៀនសូត្រ ឱ្យបានគ្រប់កម្រិត ជាពិសេសក្រៅពីភាសាជាតិ ត្រូវនាំគ្នារៀនភាសាបរទេសឱ្យបានម្នាក់មួយយ៉ាងតិច ខំស្តាប់ការពន្យល់ណែនាំរបស់លោកគ្រូអ្នកគ្រូ និងមាតាបិតាអាណាព្យាបាលរបស់ខ្លួន ត្រូវគោរពវិន័យសាលា និងចៀសឱ្យឆ្ងាយពីគ្រឿងញៀន និងអំពើអបាយមុខផ្សេងៗ។
ឯកឧត្តមបានជំរុញ ដល់គណៈគ្រប់គ្រងសាលា លោកគ្រូអ្នកគ្រូ ទាំងអស់ឱ្យយកចិត្តទុកដាក់ គ្រប់គ្រងអប់រំ បង្រៀនឱ្យបានល្អប្រកបដោយគុណភាពហើយម្តាយឪពុកត្រូវ ជួយជំរុញកូនៗ និងផ្តល់លទ្ឋភាពឱ្យកូនទៅសិក្សារៀនសូត្រឱ្យបានគ្រប់ៗគ្នា ដើម្បីមានសមត្ថភាពអភិវឌ្ឍសេដ្ឋកិច្ចគ្រួសារ និងសង្គមជាតិ
ក្នុងនោះផងដែរ ឯកឧត្តម បានឧបត្ថម្ភជូនលោកគ្រូអ្នកគ្រូ លោកយាយលោកតា សិស្សានុសិស្ស និងប្រជាពលរដ្ឋប្រមាណជា១០០០នាក់ដែលចូលរួមក្នុងពិធី ដែលចំណាយថវិកាទាំងអស់ចំនួន៥ពាន់ដុល្លារ៕
គួររម្លឹកដែរថា ឯកឧត្តម សៀង ណាំ បានមានទំនាក់ទំនងជាមួយវិទ្យាល័យអឹរ៉ាវ៉ា ហ្គាគឹអ៊ីង តាំងពីឆ្នាំ២០១៤ និងបានអញ្ជើញលោកគ្រូ អ្នកគ្រូ សិស្សានុសិស្សមកពី ប្រទេសជប៉ុន ដើម្បីមកធ្វើទស្សនៈកិច្ច សិក្សាស្វែងយល់ ពីប្រពៃណី វប្បធម៍ ទំនៀមទម្លាប់ និងសកម្មភាពរស់នៅប្រចាំថ្ងៃ របស់បងប្អូនប្រជាពលរដ្ឋ នៅក្នុងខេត្តសៀមរាប។
អត្ថបទ និងរូបភាព ៖លោក យូ វង្ស
កែសម្រួលអត្ថបទ ៖ លោក ហាំ ម៉េងហួត
