នៅថ្ងៃទី១៩ ខែមករា ឆ្នាំ២០២៥ម្សិលមិញនេះ ក្រុមជំនុំមេភូឌីស្វកម្ពុជា សហការជាមួយក្រុមគ្រូពេទ្យស្ម័គ្រចិត្តមកពីប្រទេសសិង្ហបុរី បានចុះធ្វើការពិនិត្យ ព្យាបាលជំងឺ និងចែកថ្នាំដោយឥតគិតថ្លៃ ជូនដល់បងប្អូនប្រជាពលរដ្ឋរស់នៅក្នុងសង្កាត់សៀមរាប ក្រុងសៀមរាប។
លោក លន់ សូភី ប្រធានក្រុមជំនុំមេភូឌីស្ទកម្ពុជា និងជាអ្នកដឹកនាំក្រុមគ្រូពេទ្យស្ម័គ្រចិត្ត បានឱ្យដឹងថា ដោយមើលពីសេចក្ដីត្រូវការរបស់បងប្អូនប្រជាពលរដ្ឋ ក្នុងការពិនិត្យ និងព្យាបាលជំងឺ ក៏ដូចជាការជួយសម្រាលបន្ទុក ចំពោះការចំណាយថវិកាលើបញ្ហាសុខភាព ទើបក្រុមជំនុំមេភូឌីស្វកម្ពុជា សហការនឹងក្រុមគ្រូពេទ្យស្ម័គ្រចិត្ដមកពីប្រទេសសិង្ហបុរី ចុះពិនិត្យ និងព្យាបាលជំងឺជូនពលរដ្ឋដោយឥតគិតថ្លៃនាពេលនេះ។
លោក លន់ សូភី បានឱ្យដឹងទៀតថា ការចុះពិនិត្យ និងព្យាបាលជំងឺជូនប្រជាពលរដ្ឋនេះ គឺជាស្មារតីមនុស្សធម៌សុទ្ធសាធ ដែលស្តែងចេញពីសេចក្តីស្រឡាញ់បងប្អូនប្រជាពលរដ្ឋ ក្នុងនាមជាឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្ខពួក សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្ររបស់ប្រជាពលរដ្ឋមួយចំណែក។
លោកបន្តថា បញ្ហាសុខភាព គឺជាមូលដ្ឋានគ្រឹះដើម្បីឆ្ពោះទៅរកភាពជោគជ័យសុភមង្គលជូនគ្រួសារ និងសង្គមជាតិ ហើយក៏ចុះពិនិត្យព្យាបាលជំងឺនេះ គឺក្រុមគ្រូពេទ្យ បានចុះពិនិត្យជូនបងប្អូនប្រជាពលរដ្ឋនេះមានរយៈពេល ៣ថ្ងៃ គឺនៅឃុំតាសៀម និងឃុំបឹងមាលា ស្រុកស្វាយលើ កាលពីថ្ងៃទី១៨-១៩ ខែមករា និងនៅថ្ងៃនេះ ក្នុងសង្កាត់សៀមរាបតែម្ដង។ លោកថាការពិនិត្យ ព្យាបាលជំងឺ និងចែកថ្នាំជូនប្រជាពលរដ្ឋនេះ គឺពិនិត្យទៅលើជំងឺទូទៅកម្រិតស្រាល លើសឈាមជាដើម។ ជាមួយនោះ ក្រុមគ្រូពេទ្យព្យាបាលជំងឺផ្លូវចិត្ដ ក៏បានពិនិត្យលើក្មេងដែលមានជំងឺផ្លូវចិត្ដប្រមាណជាង ២០នាក់ផងដែរ ដែលបណ្ដាលមកពីឪពុកម្ដាយទៅធ្វើការនៅទីឆ្ងាយ និងការប្រើប្រាស់ហិង្សាក្នុងគ្រួសារ ធ្វើឱ្យពួកគាត់គ្មានភាពកក់ក្ដៅ។ ហើយនៅពេលខាងមុខក្រុមជំនុំមេភូឌីស្វកម្ពុជា ក៏មានគម្រោងបន្ថែមគ្រូពេទ្យផ្នែកវះកាត់តូច និងគ្រូពេទ្យភ្នែក ដើម្បីជួយសម្រួលតាមតម្រូវរបស់ពលរដ្ឋនៅតាមមូលដ្ឋាននាផងដែរ។
លោកក៏បានថ្លែងអំណរគុណដល់ថ្នាក់ដឹកនាំខេត្តគ្រប់ជាន់ថ្នាក់ អាជ្ញាធរមូលដ្ឋាន និងអ្នកពាក់ព័ន្ធ ដែលបានជួយសម្របសម្រួល ធ្វើឱ្យដំណើរការនៃការចុះពិនិត្យ ព្យាបាលជំងឺ និងចែកថ្នាំដល់បងប្អូនប្រជាពលរដ្ឋរយៈពេល ៣ថ្ងៃនេះ ប្រកបដោយភាពរលូន និងទទួលបានជោគជ័យថែមទៀតផង៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
