ផ្លូវក្រាលកៅស៊ូមួយខ្សែ ជាប្រភេទផ្លូវក្រាលកៅស៊ូពីរជាន់(DBST) ប្រវែង១៣.២០០ម៉ែត្រ ទទឹង៧ម៉ែត្រ កម្រាស០,២ម៉ែត្រ ចិញ្ចើមផ្លូវសងខាងម្ខាង១ម៉ែត្រ រួមនឹងប្រព័ន្ធលូមួយចំនួនទៀត ដែលជាអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី ផ្ដល់ជូនបងប្អូនប្រជាពលរដ្ឋក្នុងខេត្តសៀមរាប ជាពិសេសពលរដ្ឋក្នុងស្រុកក្រឡាញ់ តាមរយៈក្រសួងអភិវឌ្ឍន៍ជនបទ ត្រូវបានបើកការដ្ឋានជាផ្លូវការ នៅព្រឹកថ្ងៃទី០៦ ខែកុម្ភៈ ឆ្នាំ២០២៥នេះ។
ឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប មានប្រសាសន៍ថា ផ្លូវមួយខ្សែនេះ ពិតជាមានសារៈសំខាន់ណាស់សម្រាប់បងប្អូនប្រជាពលរដ្ឋក្នុងឃុំចំនួន៥ ស្រុកក្រឡាញ់ ខេត្តសៀមរាប ដែលភ្ជាប់ពីផ្លូវជាតិ៦៨ ឆ្ពោះទៅផ្លូវជាតិ៦ ព្រោះកន្លងមកប្រជាពលរដ្ឋមានការពិបាកក្នុងការធ្វើដំណើរ ហើយការស្ថាបនាផ្លូវនេះឡើង នឹងបង្កភាពងាយស្រួលដល់ពួកគាត់ ចំណេញពេលវេលា កាត់បន្ថយការចំណាយលើការដឹកជញ្ជូនសម្ភារៈ ឬកសិផលផ្សេងៗទៅកាន់ទីផ្សារ និងងាយស្រួលធ្វើដំណើរទៅរកសេវាសាធារណៈផ្សេងៗ ដូចជាទៅផ្សារ សាលារៀន និងមន្ទីរពេទ្យជាដើម។
ឯកឧត្តមបន្តថា ការបើកការដ្ឋានលើកកម្រិតគុណភាពផ្លូវក្រាលកៅស៊ូពីរជាន់នាពេលនេះ គឺកើតឡើងក្នុងស្ថានភាពដែលប្រទេសកម្ពុជាយើង កំពុងស្ថិតលើមាគ៌ាអភិវឌ្ឍយ៉ាងល្អប្រសើរលើគ្រប់វិស័យ ក្នុងក្របខ័ណ្ឌសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ក្រោមការដឹកនាំរបស់សម្ដេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តី ដែលកំពុងដឹកនាំកម្ពុជាអភិវឌ្ឍឆ្ពោះទៅមុខឥតឈប់ឈរ។
ព័ត៌មានជាតិ ថ្មីៗ
ឯកឧត្តម ប៊ុន ច័ន្ទវណ្ណៈ រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា ផ្លូវខាងលើកសាងឡើងក្រោមគោលនយោបាយ និងយុទ្ធសាស្ត្រអភិវឌ្ឍប្រទេសជាតិ ហើយវាក៏ជាចំណងដៃថ្មីសម្រាប់ប្រជាពលរដ្ឋនៅក្នុងមូលដ្ឋានស្រុកក្រឡាញ់ទាំងអស់គ្នា។ ពិតណាស់ការអភិវឌ្ឍហេដ្ឋារចនាសម្ព័ន្ធ រូបវន្ត និងគមនាគមន៍នៅជនបទ ពិតជាមានសារៈសំខាន់ណាស់ក្នុងការជំរុញដំណើរការអន្តរកម្មផ្នែកសេដ្ឋកិច្ច និងសង្គមកិច្ច រវាងតំបន់ជនបទ និងទីប្រជុំជន ហើយផ្លូវជនបទបានដើរតួជាសរសៃឈាមសេដ្ឋកិច្ចក្នុងការតភ្ជាប់សកម្មភាពធុរកិច្ចផ្សេងៗ ក្នុងតំបន់ឱ្យមានភាពរស់រវើក និងកាន់តែសកម្ម ដែលជាមូលដ្ឋានគ្រឹះក្នុងការជំរុញកំណើនប្រាក់ចំណូលរបស់ប្រជាជននៅជនបទ។
ឯកឧត្តមរដ្ឋលេខាធិការ មានប្រសាសន៍ទៀតថា នៅពេលផ្លូវនេះសាងសង់រួចរាល់ សូមបងប្អូនប្រជាពលរដ្ឋ និងអ្នកប្រើប្រាស់ផ្លូវទាំងអស់ រួមគ្នាថែរក្សាសមិទ្ធផលនៃផ្លូវមួយនេះឱ្យបានល្អ តាមរយៈការសម្អាតបរិស្ថានតាមដងផ្លូវ កុំឱ្យមានដក់ទឹក ដាក់លូបង្ហូរទឹក ឬធ្វើស្ពានចូលផ្ទះ សម្អាតប្រឡាយ ឬចង្ហូរទឹកនៅតាម មុខផ្ទះជាប្រចាំ ទុកដាក់សំរាមឱ្យបានត្រឹមត្រូវ ដើម្បីឱ្យភូមិឃុំយើងមានអនាម័យល្អ និងបរិស្ថានស្អាត និងសូមចូលរួមជាមួយអាជ្ញាធរ រក្សាដីចំណីផ្លូវសម្រាប់អភិវឌ្ឍផ្លូវឱ្យធំទូលាយ ជាប្រយោជន៍ដល់កូនចៅយើង និងសូមផ្ដល់កិច្ចសហការជាមួយក្រុមការងារអនុវត្តគម្រោង ធ្វើយ៉ាងណាឱ្យការងារសាងសង់ដំណើរការទៅដោយរលូន ជៀសវាងមានបញ្ហាជាយថាហេតុណាមួយកើតឡើង៕
អត្ថបទ និងរូបភាព៖ លោក យូ វង្ស, ទ្រា ពន្លឺ
កែសម្រួល៖ លោក អ៊ុន ណារាជ្យ
