ការងារគាំពារ និងអភិវឌ្ឍកុមារតូច គឺជាកិច្ចការដ៏មានសារៈសំខាន់ ដែលរាជរដ្ឋាភិបាលបានយកចិត្តទុកដាក់ខ្ពស់ និងបានឆ្លុះបញ្ចាំងនៅក្នុងគោលនយោបាយជាតិ ជាផ្នែកមួយរបស់យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ទាក់ទងជាមួយការកសាងធនធានមនុស្សដែលមានគុណភាព និងឆ្លើយតបជាមួយផែនការជាតិស្ដីពីការគាំពារ និងអភិវឌ្ឍន៍កុមារ ២០២៥-២០២៧។
សិក្ខាសាលាតម្រង់ទិសការរៀបចំផែនការសកម្មភាព ស្ដីពីការគាំពារ និងអភិវឌ្ឍកុមារតូច នៅខេត្តសៀមរាប ឆ្នាំ២០២៦-២០២៨ នៅថ្ងៃទី០៦ ខែកុម្ភៈ ឆ្នាំ២០២៥នេះ លោកជំទាវ ស៊ិន ណម សមាជិកក្រុមប្រឹក្សាខេត្តសៀមរាប មានប្រសាសន៍ថា ផែនការខេត្តអំពីគាំពារ និងអភិវឌ្ឍកុមារតូច គឺជាការបង្ហាញពីការប្តេជ្ញាចិត្តរបស់ខេត្ត ដើម្បីផ្លាស់ប្តូរស្ថានភាព និងការចិញ្ចឹមបីបាច់ថែរក្សាកុមារតូច ដោយការពង្រឹងកិច្ចសហការរវាងស្ថាប័នដែលផ្ដល់សេវាឱ្យមានការបំពេញគ្នាទៅវិញទៅមក ដើម្បីឱ្យកុមារទទួលគ្រប់សេវាឱ្យទាន់ពេលវេលា។ ហើយដើម្បីឱ្យការអនុវត្តផែនការនេះសម្រេចបានជោគជ័យ គឺចាំបាច់ត្រូវមានការចូលរួមគាំទ្រពីដៃគូអភិវឌ្ឍ អង្គការមិនមែនរដ្ឋាភិបាល មន្ទីរជំនាញ អាជ្ញាធរក្នុងតំបន់ និងការចូលរួមរបស់អាណាព្យាបាល។
លោកស្រី សំ ស៊ីណា តំណាងអង្គការយូនីសេហ្វ បានលើកឡើងថា ការកសាងផែនការសកម្មភាពខេត្ដសៀមរាប ស្ដីពីការគាំពារនិងអភិវឌ្ឍកុមារតូច ស្របទៅនឹងគោលនយោបាយគាំពារកុមារតូចជាតិ និងអន្ដរជាតិដែរ។ ដូច្នេះការវិនិយោគរបស់រាជរដ្ឋាភិបាលថ្នាក់ក្រោមជាតិ ទៅលើការគាំពារ និងអភិវឌ្ឍកុមារតូច មានប្រយោជន៍ខ្ពស់ និងជួយកាត់បន្ថយចំណាយរបស់រាជរដ្ឋាភិបាលទៅលើការឆ្លើយតបបញ្ហានានាក្នុងសង្គម។ ទន្ទឹមនឹងនេះ ការចូលរួមរបស់មន្ទីរ អង្គភាពពាក់ព័ន្ធ នឹងជួយឱ្យកុមារជំនាន់ក្រោយពោរពេញដោយលក្ខណៈរឹងមាំ សមត្ថភាពខ្ពស់ ដើម្បីត្រៀមខ្លួនរួចជាស្រេចក្នុងបញ្ហាប្រឈមនានាដែលអាចជួបប្រទះនៅថ្ងៃមុខ។
ក្នុងឱកាសនោះ ឯកឧត្តម ប្រាក់ កុសល អគ្គលេខាធិការរងនៃអគ្គលេខាធិការដ្ឋាននៃគណៈកម្មាធិការជាតិគាំពារ និងអភិវឌ្ឍកុមារតូច រួមនឹងមន្រ្តីជំនាញ បានធ្វើបទបង្ហាញស្ដីពីអំពីសារៈសំខាន់នៃការគាំពារ និងអភិវឌ្ឍកុមារតូច និងយន្តការគាំទ្រអនុវត្ត និងយន្តការកិច្ចសហការរវាងមន្ទីរជំនាញ យុទ្ធសាស្រ្តគន្លឹះរៀបចំផែនការ ការវិភាគស្ថានភាពគាំពារ និងអភិវឌ្ឍកុមារតូចខេត្តសៀមរាប ការពិភាក្សាក្រុមកំណត់ពីបញ្ហាអាទិភាពតាមមន្ទីរវិស័យនីមួយៗ និងការចែករំលែកនៃបទពិសោធ និងមតិយោបល់ក្នុងជំហាននៃការរៀបចំផែនការសកម្មភាពស្តីពីការ គាំពារ និងអភិវឌ្ឍកុមារតូច ក្នុងខេត្តរតនគីរី ផងដែរ៕
អត្ថបទ និងរូបភាព៖ លោក ធន់ ពូថេ, អោត រត់
កែសម្រួល៖ លោក អ៊ុន ណារាជ្យ
