កាលពីថ្ងៃទី១៨ ខែកុម្ភៈ ឆ្នាំ២០២៥នេះ គរុសិស្សនៃសាលាគរុកោសល្យ និងវិក្រឹតការខេត្តសៀមរាប ជាច្រើននាក់ បានស្ម័គ្រចិត្តចូលរួមបរិច្ចាគឈាម ដើម្បីទុកជួយសង្គ្រោះអាយុជីវិតជនរងគ្រោះ នៅមន្ទីរពេទ្យបង្អែកខេត្តសៀមរាប ខណៈមន្ទីរមន្ទីរពេទ្យមួយនេះកំពុងមានតម្រូវការខ្ពស់លើការប្រើប្រាស់ឈាម ដើម្បីសង្គ្រោះជីវិតអ្នកជំងឺមកពីគ្រប់ទិសទីដែលមករកសេវានៅមន្ទីរមួយនេះ។
លោក លឹម ហេង អនុប្រធានមន្ទីរពេទ្យបង្អែកខេត្ដ មានប្រសាសន៍ថា មន្ទីរពេទ្យបង្អែកខេត្ដសៀមរាប មានអ្នកមករកការព្យាបាលច្រើនជាងមន្ទីរពេទ្យខេត្ដផ្សេងៗទៀត ដោយក្នុងមួយថ្ងៃៗមានអ្នកមកពិគ្រោះជំងឺប្រមាណ៥០០នាក់ អ្នកសម្រាកពេទ្យប្រហែល៥០០នាក់ និងការវះកាត់ពី៣០ ទៅ៥០នាក់ក្នុងមួយថ្ងៃ។ ជាមួយគ្នានេះ ករណីអ្នកជំងឺគ្រោះថ្នាក់ចរាចរ ផ្នែកសម្ភពរោគស្ដ្រីក៏មានតម្រូវការឈាមច្រើន ដែលករណីខ្លះមានតម្រូវការរហូតដល់១០កំប្លោក ពិសេសក្នុងពេលស្ត្រីសម្រាលកូន ដែលប្រកាសទាំងនេះហើយ ទើបមន្ទីរពេទ្យតែកៀងគរសប្បុរសជនដើម្បីចូលរួមបរិច្ចាគឈាម។ លោកក៏សូមអំណរគុណដល់ប្អូនគរុសិស្សទាំងអស់ ដែលផ្ដល់ឈាមណាពេលនេះ ដែលវាព្រោះមានសារៈសំខាន់ណាស់ក្នុងជួយដល់សង្គមជាតិ និងប្រជាជន។
បើតាមក្រុមគរុសិស្ស ពួកគាត់បានបង្ហាញក្ដីរីករាយ ដែលបានចូលរួមក្នុងការងារសង្គម តាមរយៈការផ្ដល់ឈាមជូនមន្ទីរពេទ្យបង្អែកខេត្តនាពេលនេះ ព្រោះពួកគាត់គិតថា ឈាមពួកគាត់ពិតជាមានប្រយោជន៍ និងមានតម្រូវការចាំបាច់ណាស់របស់សង្គ្រោះបងប្អូនប្រជាពលរដ្ឋទូទៅ។ ពួកគាត់ក៏បានអំពាវនាវដល់យុវជនកម្ពុជា ចូលរួមបរិច្ចាគឈាមទាំងអស់គ្នា ព្រោះឈាមទាំងអស់នោះពិតជាមានសារសំខាន់ណាស់ក្នុងការជួយសង្គ្រោះអាយុជីវិតមនុស្សគ្រប់គ្នា៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
