នៅព្រឹកថ្ងៃទី០៧ ខែមិថុនា ឆ្នាំ២០១៩ លោកស្រី យូ សុភា អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានអញ្ជើញជួបសម្តែងការគួរសម ជាមួយប្រតិភូក្រសួងវប្បធម៌ និងទេសចរណ៍ នៃសាធារណរដ្ឋប្រជាមានិតចិន ដែលដឹកនាំដោយ ឯកឧត្តម ZHANG XU អនុរដ្ឋមន្ត្រីក្រសួងវប្បធម៌ និងទេសចរណ៍ចិន និងប្រតិភូអមដំណើរ ហើយក៏មានការអញ្ជើញចូលរួមពីនាយករងរដ្ឋបាលសាលាខេត្ត លោកប្រធានមន្ទីរទេសចរណ៍ខេត្ត លោកស្រី នាយករងទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិ លោកអនុប្រធានមន្ទីរវប្បធម៌ និងវិចិត្រសិល្បៈខេត្ត និងលោកប្រធានការិយាល័យវិនិយោគ នៃទីចាត់ការផែនការ និងវិនិយោគខេត្ត។
ឯកឧត្តម ZHANG XU អនុរដ្ឋមន្ត្រីក្រសួងវប្បធម៌ និងទេសចរណ៍ចិន ក៏មានប្រសាសន៍ថា ប្រទេសកម្ពុជា ជាប្រទេសដែលសំបូរទៅដោយ កន្លែងសម្រាប់ក្រុមហ៊ុនវិនិយោគចូលមកវិនិយោគ ជាពិសេសខេត្តសៀមរាបគឺជាខេត្តមួយ ដែលសំបូរទៅដោយតំបន់តេសចរណ៍ និងកន្លែងកំសាន្តជាច្រើន ដែលអាចទាក់ទាញចំនួនភ្ញៀវទេសចរណ៍ចូលមកជាច្រើន។
ឯកឧត្តម ZHANG XU បន្តថា ការជួបពិភាក្សាជួយជាមួយខេត្តសៀមរាបនោពេលនេះ នឹងអាចជំរុញឲ្យប្រទេសទាំងពីរ កាន់តែមានភាពជិតស្និតជាងនេះបន្ថែមទៀត ហើយរាជរដ្ឋាភិបាលចិន នឹងជួយជម្រុញក្រុមហ៊ុន ក៏ដូចជាអ្នកវិនិយោគទាំងអស់ ឲ្យមកធ្វើកាវិនិយោគនៅប្រទេសកម្ពុជាបន្ថែមទៀត ។
ក្នុងឱកាសនេះដែរ លោកស្រី យូ សុភា អភិបាលរងខេត្តខេត្តសៀមរាប ក៏បានថ្លែងអំណរគុណ ដល់ឯកឧត្តមអនុរដ្ឋមន្ត្រីក្រសួងវប្បធម៌ និងទេសចរណ៍ចិន និងប្រតិភូអមដំណើរ ដែលបានមកធ្វើទស្សនៈកិច្ចប្រទេសកម្ពុជា ជាពិសេសខេត្តសៀមរាបតែម្តង ហើយលោកស្រីក៏បានសំណូមពរដល់ប្រតិភូដែលអញ្ជើញមក ពេលត្រលប់ទៅវិញជួយផ្សព្វផ្សាយដល់វិនិយោគ និងអ្នកទេសចរណ៍ ឲ្យមកធ្វើការវិនិយោគ និងធ្វើដំណើរកំសាន្តកាន់តែច្រើនមកប្រទេសកម្ពុជា ជាពិសេសខេត្តសៀមរាបផ្ទាល់ និងសូមស្វាគមន៍នូវគម្រោងវិនិយោគ និងកិច្ចសហការល្អៗ ដើម្បីភាពរីកចម្រើន និងជោគជ័យទាំងអស់គ្នា ៕
អត្ថបទ និង រូបភាព ៖ គឿនវេត
កែសម្រួល ៖អ៊ុន ណារាជ្យ
