ឯកឧត្តម ទៀ សីហា អភិបាលខេត្តសៀមរាប និងជាប្រធានគណ:កម្មាធិការសាខាកាកបាទក្រហមខេត្តសៀមរាប នាំយកអំណោយមនុស្សធម៌របស់សាខាកាកបាទក្រហមកម្ពុជា ខេត្តសៀមរាប ផ្តល់ជូនគ្រួសារប្រជាពលរដ្ឋងាយរងគ្រោះក្នុងឃុំជីក្រែង មកពី៧ភូមិ ចំនួន២១គ្រួសារ ដែលក្នុងនោះរួមមានគ្រួសាររស់នៅជាមួយមេរោគអេដស៍ គ្រួសារមានជំងឺរ៉ាំរៃ គ្រួសារពិការ ស្ត្រីមេម៉ាយ ចាស់ជរា និងគ្រួសារទីទ័លក្រ ។
មានប្រសាសន៍ នៅសាលាឃុំជីក្រែងស្រុកជីក្រែងខេត្តសៀមរាបនាព្រឹកថ្ងៃទី ០៨ ខែមិថុនា ឆ្នាំ ២០១៩ ឯកឧត្តម ទៀ សីហា បានអំពាវនាវ ឲ្យអាជ្ញាធរមូលដ្ឋានគ្រប់លំដាប់ថ្នាក់ រួមទាំងការិយាល័យជំនាញពាក់ព័ន្ធផងដែរ យកចិត្តទុកដាក់់ឲ្យបានខ្ពស់បំផុត ចំពោះសុខុមាលភាពប្រជាពលរដ្ឋ ដែលអាចនឹងប្រឈមចំពោះជំងឺគ្រុនឈាម នាដើមរដូវភ្លៀងធ្លាក់នេះ ។
តាមរបាយការណ៍របស់មន្ទីរពេទ្យកុមារគន្ធបុប្ផាទី៣ខេត្តសៀមរាប បានបង្ហាញថា ក្នុងចំណោមកុមារចំនួន១៥០០នាក់ កំពុងសម្រាកព្យាបាលក្នុងមន្ទីរពេទ្យមួយនេះ ៣០%នៃចំនួននោះ គឺជាកុមារកំពុងទទួលរងការគម្រាមកំហែងនៃជំងឺគ្រុនឈាម ។
ឯកឧត្តមអភិបាលខេត្ត បានបញ្ជាក់ថា របាយការណ៍របស់មន្ទីរពេទ្យកុមារគន្ធបុប្ផាទី៣ ឬ មន្ទីរពេទ្យកុមារជ័យវរ្ម័នទី៧ ខេត្តសៀមរាប បានឲ្យដឹងថា គិតត្រឹមព្រឹកថ្ងៃទី០៨ ខែមិថុនានេះ ក្នុងចំណោមកុមារកំពុងសម្រាកព្យាបាលជំងឺក្នុងមន្ទីរពេទ្យចំនួន ១,៥០៩នាក់ មានកុមារកើតជំងឺគ្រុនឈាមចំនួន ៣១៦នាក់ ។ ក្នុងនេះដែរ ត្រឹមតែរយ:ពេល ១ថ្ងៃប៉ុណ្ណោះ គឺ ថ្ងៃទី០៧ ខែមិថុនា ឆ្នាំ២០១៩ មន្ទីរពេទ្យកុមារនេះ បានទទួលកុមារកើតជំងឺគ្រុនឈាមរហូតដល់ ១១៦នាក់ ។
ឆ្លៀតក្នុងឱកាសនោះ ឯកឧត្តមអភិបាលខេត្ត បានក្រើនរំលឹកដល់ ការិយាល័យសុខាភិបាលស្រុកទាំងអស់ ត្រូវអនុវត្តវិធានការ “ការពារ ប្រសើរជាងព្យាបាល” ដោយសហការជាមួយអាជ្ញាធរមូលដ្ឋាន ក្នុងមកក៏មិនអាចខ្វះ ការចូលរួមពីសំណាក់អាណាព្យាបាលនិងប្រជាពលរដ្ឋទាំងអស់គ្នាផងដែរ ដើម្បីកម្ចាត់ឲ្យអស់ជម្រកមូសខ្លា ដែលជាប្រភពចម្លងជម្ងឺគ្រុនឈាម ។
ប្រសាសន៍របស់ឯកឧត្តម ទៀ សីហា ក៏បានសង្កត់ធ្ងន់ផងដែរថា ៖ បញ្ហាសុខភាព គឺជាចំណែកយ៉ាងសំខាន់ ដែលពាក់ព័ន្ធទៅនឹងកម្មវិធីនយោបាយ កាត់បន្ថយភាពក្រីក្រជូនប្រជាពលរដ្ឋ របស់រាជរដ្ឋាភិបាលកម្ពុជា ។ ស្របគ្នាទៅនឹងកម្មវិធីនយោបាយនេះដែរ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានលើកឡើងពីយុទ្ធសាស្ត្រឆ្នាំ២០១១-២០២០គឺ ៖“រួមចំណែកពន្លឿនការកាត់បន្ថយភាពក្រីក្រ ការពារសេចក្តីថ្លៃថ្នូររបស់មនុស្សជាតិ និង ការពារតម្លៃមនុស្សធម៌របស់ជនរងគ្រោះ ។ ជាប្រចាំកាកបាទក្រហមកម្ពុជា ដែលជាស្ថាប័នបំពេញបេសកកម្មមនុស្សធម៌ធំជាងគេនៅកម្ពុជា ក្រៅពីការផ្តល់អំណោយមនុស្សធម៌សង្គ្រោះបន្ទាន់ដល់គ្រួសារនិងជនរងគ្រោះដោយគ្រោះមហន្តរាយធម្មជាតិ និង បង្កឡើងដោយមនុស្សនោះ ក៏បានកំណត់នូវលក្ខខណ្ឌងាយរងគ្រោះដែលត្រូវយកចិត្តទុកដាក់ជួយដូចជា មនុស្សចាស់ជរាគ្មានទីពឹង ជនពិការ អ្នកផ្ទុកមេរោគអេដស៍ អ្នកជំងឺរ៉ាំរ៉ៃក្រីក្រ កុមារកំព្រា ស្ត្រីមេម៉ាយក្រីក្រមានកូនច្រើន និងអ្នកទីទ័លក្រខ្លាំង ។
អំណោយមនុស្សធម៌ ដែលជនងាយរងគ្រោះក្នុង១គ្រួសារទទួលបានក្នុងឱកាសនោះ រួមមាន ៖ អង្ករ៣០គីឡូក្រាម -មី១កេស -ត្រីខ១យួរ -ទឹកត្រី១យួរ -ទឹកស៊ីអ៊ីវ១យួរ -ប្រេងឆា២ដប -ស្ករស២គីឡូក្រាម -ទឹកដោះគោខាប់៥កំប៉ុង ថវិកា៥ម៉ឺនរៀល ។ ដោយឡែកឯកឧត្តម ទៀ សីហា និង លោកជំទាវ បានឧបត្ថម្ភថវិការបន្ថែមផងដែរ តាមស្ថានភាពជាក់ស្តែងនៃជនរងគ្រោះ ៕
ងិន គឹមឡេង
សេង ផល្លី
