នៅព្រឹកថ្ងៃទី០៩ ខែមិថុនា ឆ្នាំ២០១៩នេះ បន្ទាប់ពីបញ្ចប់ពិធី សម្ពោធបើកការដ្ឋានស្ថាបនាផ្លូវចាក់បេតុងចំនួនពីរខ្សែ នៅក្នុងសង្កាត់ស្លក្រាមរួចមក ឯកឧត្តម ទៀ សីហា អភិបាល ខេត្តសៀមរាប អមដំណើរដោយលោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត បានអញ្ជើញចូលរួម ពិសានំបញ្ចុកសាមគ្គីជាតិ ដែលផ្ដួចផ្ដើមឡើងដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយបងប្អូន ប្រជាពលរដ្ឋក្នុងសង្កាត់ស្លក្រាម និងនៅផ្សារសម្តេចតេជោ ហ៊ុន សែន ដើមក្រឡាញ់ ក្នុងសង្កាត់គោកចក ក្រុងសៀមរាប ដើម្បីបង្ហាញឲ្យឃើញភាពស្និទ្ធស្នាលរវាងថ្នាក់ដឹកនាំ និង ប្រជាពលរដ្ឋ ។
ឯកឧត្តម ទៀ សីហា បានឲ្យដឹងថា នៅទូទាំងខេត្តសៀមរាប មាន១០០ឃុំសង្កាត់ ស្មើ ៩៣៧ភូមិ បងប្អូនប្រជាពលរដ្ឋ អាជ្ញាធរមូលដ្ឋាន បាននាំគ្នាទទួលទាននំបញ្ចុកគ្រប់ៗភូមិឃុំសង្កាត់ ដោយភូមិខ្លះហូបអស់ជាង២០០គីឡូក្រាម និង ភូមិខ្លះជិត៣០០គីឡូក្រាម ហេតុនេះយើងអាចប៉ាន់ប្រមាណបានថា នៅថ្ងៃទី៩ ខែមិថុនា ឆ្នាំ២០១៩នេះ នៅតាមបណ្តាក្រុងស្រុក ទាំង១២ ក្នុងទូទាំងខេត្តសៀមរាប យើងបានរៀបចំពិសានំបញ្ចុកសាមគ្គីតេជោសន្តិភាព ទាំងអស់គ្នា ដូច្នេះជារួម បងប្អូនទទួលទាននំបញ្ចុកអស់ប្រមាណ ២០០តោន ដោយមិនបានគិតបន្លែនិងអន្លក់ផ្សេងៗនោះទេ ។
ឯកឧត្តម ទៀ សីហា មានប្រសាសន៍ទៀតថា យើងនាំគ្នាពិសានំបញ្ចុកទាំងអស់គ្នានៅពេលនេះ គឺមិនមានពាក់ព័ន្ឋទៅនឹងនយោបាយអ្វីនោះទេ គឺយើងពិសាទាំងអស់គ្នា ដើម្បីពង្រឹងសាមគ្គីភាព ក្រោមម្លប់សន្តិភាពរបស់រាជរដ្ឋាភិបាល ក្រោមការដឹកនាំដ៍ឈ្លាសវៃនិងប៉ិនប្រសព្វរបស់ សម្តេចតេជោ ហ៊ុន សែន និងដើម្បីលើកតម្កើងអត្តសញ្ញាណជាតិរបស់ ខ្មែរយើងផងដែរ ព្រោះថានំបញ្ចុកគឺមានគុណភាព និងផ្តល់នូវគុណប្រយោជន៍ល្អខ្លាំងណាស់សម្រាប់សុខភាព រាប់តាំងពីសម្លសាច់ត្រី និងគ្រឿងផ្សំដែលសុទ្ឋសឹងជាសារធាតុជំនួយដល់សុខភាពទាំងអស់ ៕
អត្ថបទ : លោក យូ វង្ស
រូបថត : សហការី
