នៅរសៀលថ្ងៃទី០៩ ខែមិថុនា ឆ្នាំ ២០១៩ នេះ កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភថវិកា ចំនួន ៥០,០០០ដុល្លារសហរដ្ឋអាមេរិច ដល់មន្ទីរពេទ្យ កុមារអង្គរ ខេត្តសៀមរាប ក្នុងឱកាសដែល មន្ទីរពេទ្យនេះ ប្រារព្ធកម្មវិធី បុណ្យផ្កាប្រាក់មហាសាមគ្គី ឆ្នាំទី ៦ ដើម្បីរកមូលនិធិសម្រាប់ការព្យាបាល និងថែទាំសុខភាពកុមារ-ទារកប្រមាណ៥០០ ទៅ៦០០នាក់ក្នុងមួយថ្ងៃ ដោយឥតគិតថ្លៃ។
បន្ទាប់ពីកម្មវិធីប្រគល់ថវិកានេះរួចមក គណៈប្រតិភូកាកបាទក្រហមកម្ពុជា ដែលដឹកនាំដោយ លោកជំទាវ ម៉ែន នារីសោភ័គ អគ្គលេខាធិការរងទី ១ ក៏បានអញ្ជេីញជួបសំណេះសំណាល សួរសុខទុក្ខ និងចែកអំណោយដោយផ្ទាល់ ជូនដល់កុមារ-ទារកសរុបចំនួន ៩៤នាក់ ដែលកំពុងសម្រាកព្យាបាលជំងឺនៅក្នុងមន្ទីរពេទ្យកុមារអង្គរ ដោយក្នុងម្នាក់ៗទទួលបាន ឃីតមួយកញ្ចប់ រួមមាន មុង ភួយ សារុង ក្រមា និងថវិកាចំនួន ៥ម៉ឺនរៀល។ ដោយឡែក ចំពោះកុមារកំពុងសង្គ្រោះបន្ទាន់ធ្ងន់ធ្ងរចំនួន ១៨នាក់ ម្នាក់ៗទទួលបាន ឃីត ១ កញ្ចប់ដូចគ្នា និងថវិកា ១០ម៉ឺនរៀល ដោយឡែកអាណាព្យាបាលដែលនៅកំដរក្នុងម្នាក់ៗទទួលបានថវិកា ២ម៉ឺនរៀល។
ក្នុងឋានៈជាប្រធានកាកបាទក្រហមកម្ពុជា និងជាឥស្សរជនឆ្នេីម ថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដេីម្បីសុខភាពស្ត្រី និងកុមារ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូរ យកចិត្តទុកដាក់បំផុតលេីការលេីកកម្ពស់សុខុមាលភាពរបស់ ប្រជាពលរដ្ឋងាយរងគ្រោះបំផុត ក្នុងនោះការរួមចំណែកជួយព្យាបាល និងលើកកម្ពស់សុខភាពកុមារកម្ពុជារាប់ម៉ឺននាក់ កកាកបាទក្រហមកម្ពុជា បានឧបត្ថម្ភថវិកា ១លាន ដុល្លារសហរដ្ឋអាមេរិក ជារៀងរាល់ឆ្នាំ ដល់មន្ទីរពេទ្យគន្ធបុប្ផា តាំងពីឆ្នាំ២០១២ រហូតដល់បច្ចុប្បន្ន។
ព័ត៌មានជាតិ ថ្មីៗ
សូមបញ្ជាក់ថា នៅក្នុងឱកាសនោះដែរ សាខាកាកបាទក្រហមកម្ពុជា ខេត្តសៀមរាប ក៏បានឧបត្ថម្ភថវិកាចំនួន ៣៥,០០០ដុល្លារសហរដ្ឋអាមេរិក ដល់មន្ទីរពេទ្យកុមារអង្គរផងដែរ៕
អត្ថបទ និងរូបភាព: លោក យូ វង្ស
កែសម្រួលអត្ថបទ: លោក សេង ផល្លី
