ក្រោមក្របខណ្ឌយុទ្ធនាការសាធារណៈដាំដើមឈើឡើងវិញនៅរមណីយដ្ឋានអង្គរ នៅព្រឹកថ្ងៃទី១០ ខែមិថុនា ឆ្នាំ២០១៩ អាជ្ញាធរជាតិអប្សរា ព្រះសង្ឃជាច្រើនអង្គ ពុទ្ធបរិស័ទ វិស័យឯកជន បានចូលរួមដាំដើមឈើប្រមាណ២០០០ដើមនៅខាងមុខបរិវេណប្រាសាទប្រីយ៍។
ព្រះវិជ័យរង្សី បណ្ឌិត លាច លាង ព្រះគ្រូអនុគណក្រុងសៀមរាប មានសង្ឃដីការថា ព្រៃឈើអាចការពារនូវគ្រោះថ្នាក់ផ្សេងៗ និងផ្តល់ជាម្លប់សម្រាប់មនុស្ស សត្វទូទៅ។ ព្រះអង្គមានទឹកព្រះទ័យសប្បាយ រីករាយដែលបានរួមចំណែកជាមួយអាជ្ញាធរជាតិអប្សរាក្នុងការដាំដើមឈើនៅទីនេះ។
ព្រះអង្គមានសង្ឃដីការបន្តថា ក្នុងនាមព្រះអង្គផ្ទាល់ និងតំណាងឱ្យគណៈសង្ឃក្នុងក្រុងសៀមរាប សូមចម្រើនពរ អំពាវនាវដល់ព្រះសង្ឃ និងពុទ្ធបរិស័ទទូទៅ សុំឱ្យមានការចូលរួមដាំដើមឈើឱ្យបានច្រើនជាងការកាប់បំផ្លាញ។
មានប្រសាសន៍ក្នុងកម្មវិធី ឯកឧត្តម យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានថ្លែងអំណរព្រះគុណដល់ព្រះសង្ឃគ្រប់អង្គ និងអរគុណដល់អ្នកចូលរួមគ្រប់មជ្ឈដ្នានទាំងវិស័យឯកជន ស្ថាប័នរដ្ឋ ដែលមានសទ្ធាចូលរួមដាំដើមឈើនាពេលនេះ។
ឯកឧត្តមបន្តថា ការបាត់បង់ព្រៃឈើបណ្តាលឱ្យមនុស្ស និងប្រាសាទមានការរងគ្រោះ។ ដូច្នេះការចូលរួមនាពេលនេះពិតជាសំខាន់ និងជាបុណ្យកុសលមួយដ៏ធំធេងសម្រាប់ប្រទេសជាតិ និងមនុស្សជំនាន់ក្រោយ។ លើសពីនេះ បច្ចុប្បន្នមានជនខិលខូចបានកាប់បំផ្លាញច្រើនទៅៗ ហើយអាជ្ញាធរជាតិអប្សរាតែងព្យាយាមទប់ស្កាត់នូវបទល្មើសនានា និងគ្រោងដាំបន្ថែមឡើងវិញ៣៥ហិចតានៅទីតាំងផ្សេងគ្នា ដែលនឹងបើកយុទ្ធនាការដាំដើមឈើ៤ម៉ឺនដើម នៅរដូវវស្សាក្នុងឆ្នាំនេះ ។
សូមបញ្ជាក់ថា ក្នុងពិធីនេះដែរក៏មានការចូលរួមពីឯកឧត្តម យិត ចាន់ដារដ្ឋ អគ្គនាយករងអាជ្ញាធរជាតិអប្សរា ព្រះវិជ័យរង្សី បណ្ឌិត លាច លាង ព្រះគ្រូអនុគណក្រុងសៀមរាប ក្រុមហ៊ុនម៉ាក្រូ នគរបាលការពារបេតិកភណ្ឌ អង្គការគាំពារសត្វព្រៃ មន្ត្រី-បុគ្គលិកនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន សិស្សានុសិស្ស និងសាធារណជនយ៉ាងច្រើនកុះករ៕
អត្ថបទ និង រូបភាព ៖ ម៉ាត់ អារីហ្វីន
កែសម្រួល ៖ អ៊ុន ណារាជ្យ
