នៅរសៀលថ្ងៃទី ១០ ខែមិថុនា ឆ្នាំ២០១៩ម្សិលមិញនេះ លោក ចៅ ម៉ៅមុន្នី សមាជិកគណៈកម្មាធិការសាខាកាកបាទក្រហមកម្ពុជាខេត្តសៀមរាប តំណាង ឯកឧត្តម ទៀ សីហា ប្រធានគណៈកម្មាធិការសាខា បានអញ្ជើញជួបសួរសុខទុក្ខ និងនាំយកអំណោយមនុស្សធម៌ជូនដល់លោក ស្រី ភិន អាយុ ៤៥ឆ្នាំ រស់នៅភូមិវាលពោធិ៍ ឃុំជាំក្សាន្ត ស្រុកជាំក្សាន្ត ខេត្តព្រះវិហារ ដែលបានរងគ្រោះដោយគ្រាប់មិនទាន់ផ្ទះ កាលពីថ្ងៃទី ០១ ខែមិថុនា ឆ្នាំ២០១៩ នៅក្បែព្រំដែនថៃ ខាងកើតច្រកអានសេះ ចំណុចព្រលានបេះដូង ស្រុកជាំក្សាន្ត ខេត្តព្រះវិហារ ខណៈដែលលោកដើរទៅជាន់មីនអន្ទ្រាក់ជ្រូកនៅតំបន់នោះ បណ្ដាលឱ្យដាច់ជើងខាងស្ដាំ ដែលបច្ចុប្បន្នលោកកំពុងសម្រាកព្យាលបាលជំងឺនៅមន្ទីរពេទ្យបង្អែកខេត្តសៀមរាប។
មានប្រសាសន៍នាឱកាសនោះ លោក ចៅ ម៉ៅមុន្នី បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរ ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
លោកបានបន្តថា អំណោយមនុស្សធម៌ដែលបាននាំយកមកជូននាពេលនេះ គឺជាជួយសម្រាលទុក្ខលំបាកបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។
លោកក៏លើកទឹកចិត្ត និងសំណូមពរដល់ក្រុមគ្រួសារ សូមកុំអស់សង្ឃឹម ត្រូវចេះថែរក្សាសុខភាពឱ្យបានល្អ ព្រោះបន្ទាប់ពីជាសះស្បើយអ្នកជំងឺអាចប្រើជើងសិប្បនិម្មិតបាន ហើយពេលត្រលប់ទៅវិញសូមជួយផ្សព្វផ្សាយដល់ប្រជាពលរដ្ឋនៅតំបន់នោះ ឱ្យចេះប្រយ័ត្នកុំដែលចូលក្នុងតំបន់ដែលមានសញ្ញាគ្រាប់មីន។
អំណោយមនុស្សធម៌ដែលបានផ្ដល់ជូននាពេលនោះដែររួមមាន ៖ អង្ករ៣០គីឡូក្រាម -មុង១ -ភួយ១ -សារុង១ -ក្រមា១ -កន្ទេល១ -មី១កេស -ត្រីខ១យួរ -ស្ករស១គីឡូក្រាម -ទឹកដោះគោខាប់៥កំប៉ុង និងថវិកា ២សែនរៀលផងដែរ ៕
អត្ថបទ និង រូបភាព៖ អ៊ិន សីហរិទ្ធ
កែសម្រួល ៖ អ៊ុន ណារាជ្យ
