រយៈពេល ៣០ឆ្នាំកន្លងមកនេះ អង្គការមូលនិធិប្រាសាទពិភពលោក (World Monuments Fund) ហៅកាត់ថា WMF បានផ្ដល់ថវិកាប្រមាណ១៤លានដុល្លារ ដើម្បីធ្វើសហប្រតិបត្តិការ ជាមួយកម្ពុជាលើការងារអភិរក្ស និងជួសជុលប្រាសាទ ក្នុងតំបន់រមណីយដ្ឋានអង្គរ។
នៅថ្ងៃទី១០ ខែមិថុនា ឆ្នាំ២០១៩ ក្នុងពិធីខួប ៣០ឆ្នាំ របស់អង្គការមូលនិធិប្រាសាទពិភពលោក (WMF) លើការងារអភិរក្សនិងជួសជុលប្រាសាទ ក្នុងតំបន់រមណីយដ្ឋានអង្គរ លោកស្រី ជីន នីវរ៉ា បូតតូ (Gineavra Boato ) តំណាងរបស់អង្គការនេះ ប្រចាំតំបន់អាស៊ីអាគ្នេយ៍ បានបង្ហាញមោទនភាពរបស់ WMF ថា វាជាបេសកកម្មមួយ ដែលបានជួយផ្នែកបេតិកភណ្ឌនៅប្រទេសកម្ពុជា។ លោកស្រីបន្តថា ក្នុងរយៈពេល ៣ទស្សវត្សចុងក្រោយនេះ WMF បានជួយបណ្ដុះបណ្ដាលកម្មករ និងអ្នកជំនាញការកម្ពុជារាប់រយនាក់ ដោយបានពង្រីកជំនាញរបស់ពួកគេ និងទទួលបាននូវចំណេះដឹងថ្មីៗ ទាក់ទងនឹងការងារអភិរក្ស និងបច្ចេកទេសជួសជុលប្រាសាទ។
លោកស្រី ជីន នីវរ៉ា បូតតូ បានគូសបញ្ជាក់ថា នៅឆ្នាំ ២០០៨ WMF បានចាប់ផ្ដើមគម្រោងជួសជុលរយៈពេលវែងមួយ នៅផ្នែកខាងកើតភ្នំបាខែង នៅឆ្នាំ២០០៨ និងបានបញ្ចប់នៅចុងឆ្នាំ២០១៨ ហើយគម្រោងជួសជុលជំហានទី៣ នៅផ្នែកខាងលិច នឹងចាប់ផ្តើមអនុវត្តន៍ពីឆ្នាំ ២០១៩នេះរហូតដល់ឆ្នាំ ២០២៥។
ព័ត៌មានជាតិ ថ្មីៗ
ក្នុងនាមស្ថានទូតសហរដ្ឋអាមេរិកប្រចាំកម្ពុជា លោក ម៉ៃឃើល ញូប៊ីល(Michael Newbill) បានចាត់ទុកការប្រារព្ធព្រឹត្តិការណ៍នេះ ថាបានបញ្ជាក់ពីទំនាក់ទំនងដ៏យូរអង្វែង និងដោយមានផលិតភាពរវាងសហរដ្ឋអាមេរិក, WMF និងក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា តាមរយៈមូលនិធិឯកអគ្គរដ្ឋទូត សម្រាប់ការអភិរក្សវប្បធម៌ (AFCP)។ លោកភារធារីស្ថានទូតសហរដ្ឋអាមេរិកក៏បានកោតសរសើរ ដល់គម្រោងជួសជុលប្រាសាទភ្នំបាខែង ថាជាគម្រោងមួយ ដ៏លេចធ្លោ និងបានចូលរួមដោយបុគ្គលិកកម្ពុជាភាគច្រើន។ ក្នុងគម្រោងនេះដែរ តាមរយៈមូលនិធិឯកអគ្គរដ្ឋទូត បានផ្តល់ថវិកាជាង ៣,២ លានដុល្លារអាមេរិកចាប់តាំងពីឆ្នាំ ២០០៤ ដែលជាការរួមចំណែកពីវិស័យឯកជន និងសហគមន៍សប្បុរសជននៅសហរដ្ឋអាមេរិក។
មានប្រសាសន៍ក្នុងពិធីនោះដែរ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងអំណរគុណដល់ WMF ដែលបានរួមចំណែកជួយអភិរក្សនិងជួសជុលប្រាសាទនៅកម្ពុជា។ ចាប់ពីឆ្នាំ ១៩៩២ WMF បានធ្វើការអភិរក្សនិងជួសជុលប្រាសាទជាច្រើនគួរឱ្យកត់សម្គាល់ក្នុងតំបន់អង្គរ ជាពិសេសប្រាសាទព្រះខ័ន តាសោម អង្គរវត្ត និងប្រាសាទភ្នំបាខែង។
គួរបញ្ជាក់ថា បើយោងតាមរបាយការណ៍របស់ WMF តាំងពីចូលរួមក្នុងការងារអភិរក្សនិងជួសជុលប្រាសាទក្នុងតំបន់អង្គររយៈពេល៣០ឆ្នាំមកនេះ អង្គការនេះបានចំណាយទឹកប្រាក់ចំនួន ១៤លានដុល្លារអាមេរិក។ ក្រៅពីនោះក៏មានការចូលរួមពីដៃគូផ្សេងៗទៀតដោយមានការគាំទ្រជាទឹកប្រាក់ចំនួន ៥លានដុល្លារពីរដ្ឋាភិបាលសហរដ្ឋអាមេរិក ទឹកប្រាក់ជិត៥លានដុល្លារពីមូលនិធិសប្បុរសធម៌ The Robert W. Wilson, ទឹកប្រាក់ចំនួន១លានដុល្លារពីមូលនិធិស្ថាប័នឯកជន, ទឹកប្រាក់ជិត១លានដុល្លារពីសាជីវកម្មសហរដ្ឋអាមេរិក រួមបញ្ចូលទាំងវិភាគទានសំខាន់របស់ American Express កាលពីទសវត្សឆ្នាំ ១៩៩០, ទឹកប្រាក់ជិត១លានដុល្លារពីប្រជាជនអាមេរិកសម្រាប់រំឮកដល់គុណប្រជាជនកម្ពុជាដែលមានភាពអត់ធន់និងលះបង់ពេលវេលាបំពេញការងារនៅក្នុងតំបន់អង្គរ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
